ສະເໜີໂຈະການເດີນທາງໄປເຮັດວຽກຢູ່ປະເທດທີ່ມີການລະບາດຂອງໂຄວິດ-19

ສະເໜີໂຈະການເດີນທາງໄປເຮັດວຽກຢູ່ປະເທດທີ່ມີການລະບາດຂອງໂຄວິດ-19

2nd March 2020 0 By Education

ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ສະເໜີເຖິງທຸກພາກສ່ວນ ທັງພາກລັດ ແລະ ເອກະຊົນ ເພື່ອພິຈາລະນາເລື່ອນ ຫຼື ໂຈະ ການໄປປະຕິບັດວຽກງານຂອງພະນັກງານລັດຖະກອນຢູ່ປະເທດທີ່ມີການລະບາດຂອງພະຍາດ ໂຄວິດ-19 ເພື່ອປ້ອງກັນການນໍາເຊື້ອພະຍາດດັ່ງກ່າວເຂົ້າມາແຜ່ລະບາດໃນລາວ.


ອີງຕາມໜັງສືແຈ້ງການສະບັບເລກທີ 003/ສພກ ລົງວັນທີ 2 ມີນາ 2020 ເລື່ອງພິພິຈາລະນາເລື່ອນ ຫຼື ໂຈະ ການໄປປະຕິບັດວຽກງານຂອງພະນັກງານລັດຖະກອນຢູ່ປະເທດທີ່ມີການລະບາດຂອງພະຍາດ ໂຄວິດ-19 ໂດຍລະບຸວ່າ: ປັດຈຸບັນສະພາບການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່(COVID-19) ແຜ່ຂະຫຍາຍເປັນວົງກ້ວາງໃນຫຼາຍປະເທດ, ສືບຕໍ່ມີຜູ້ຕິດເຊື້ອ ແລະ ເສຍຊີວິດເພີ່ມຂຶ້ນໃນແຕ່ລະວັນ, ອົງການອະນາໄມໂລກໄດ້ປະເມີນວ່າເຊື້ອພະຍາດດັ່ງກ່າວມີຄວາມສ່ຽງສູງສຸດທີ່ຈະແຜ່ລະບາດໄປທົ່ວໂລກ, ການເດີນທາງໄປປະເທດທີ່ມີການລະບາດ ມີຄວາມສ່ຽງສູງທີ່ຈະຕິດເຊື້ອ ແລະ ນໍາມາແຜ່ລະບາດໃນປະເທດເຮົາ ຍ້ອນປັດຈຸບັນນີ້ ສປປ ລາວ ຍັງບໍ່ມີກໍລະນີຜູ້ຕິດເຊື້ອ.


ສະນັ້ນຈຶ່ງສະເໜີມາຍັງຍັງທຸກພາກສ່ວນກ່ຽວຂ້ອງເພື່ອພິຈາລະນາການອະນຸມັດໃຫ້ພະນັກງານເດີນທາງໄປປະຕິບັດງານຢູ່ໃນບັນດາປະເທດທີ່ມີການຕິດເຊື້ອ ຕາມການແນະນໍາຂອງປະເທດເຈົ້າພາບຢ່າງເຂັ້ມງວດ ໂດຍສະເພາະການປ້ອງກັນຕົນເອງບໍ່ໃຫ້ຕິດເຊື້ອ. ກໍລະນີຖ້າພະນັກງານໄດ້ໄປເຄື່ອນໄຫວວຽກງານ ແລະ ກັບມາຈາກປະເທດທີ່ມີການລະບາດຂອງພະຍາດນີ້ ແມ່ນໃຫ້ປະຕິບັດຕາມຂໍ້ແນະນໍາທີ່ກະຊວງສາທາລະນະສຸກວາງອອກຢ່າງເຄັ່ງຄັດ.