ຊົມເຊີຍ! ກະຊວງ ຮສສ ມອບເຂົ້າຊ່ວຍເຫຼືອຜູ້ປະສົບໄພຢູ່ຈໍາປາສັກ 1ພັນກວ່າໂຕນ

ຊົມເຊີຍ! ກະຊວງ ຮສສ ມອບເຂົ້າຊ່ວຍເຫຼືອຜູ້ປະສົບໄພຢູ່ຈໍາປາສັກ 1ພັນກວ່າໂຕນ

4th March 2020 0 By Education

ກະຊວງແຮງງານ ແລະ ສະຫວັດດີການສັງຄົມ ( ຮສສ ) ໄດ້ມອບເຂົ້າສານຈຳນວນ 1.636 ໂຕນ ລວມມູນຄ່າ 14,676 ຕື້ກີບ ໃຫ້ກັບແຂວງຈຳປາສັກເພື່ອນຳໄປຊ່ວຍເຫຼືອປະຊາຊົນທີ່ປະສົບກັບໄພພິບັດນ້ຳຖ້ວມໄລຍະຜ່ານມາ.

ພາບຂ່າວ

ພິທີມອບ-ຮັບຈັດເຂົ້າຈໍານວນດັ່ງກ່າວ ຈັດຂຶ້ນໃນວັນທີ 25 ກຸມພາ 2020 ທີ່ພະແນກ ຮສສ ແຂວງຈຳປາສັກ ໃຫ້ກຽດມອບໂດຍ ທ່ານ ນາງ ໃບຄຳ ຂັດຕິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ແລະ ໃຫ້ກຽດຮັບໂດຍ ທ່ານ ບົວສອນ ວົງສອງຄອນ ຮອງເຈົ້າແຂວງຈຳປາສັກ, ມີບັນດາຄະນະນຳຈາກພະແນກ ຮສສ ແຂວງຈຳປາສັກ ແລະ ຄະນະກຳມະການຄວບຄຸ້ມໄພພິບັດຂັ້ນນແຂວງເຂົ້າຮ່ວມເປັນສັກຂີພະຍານ.

ພາບຂ່າວ

ໃນໂອກາດສຳຄັນດັ່ງກ່າວ ທ່ານ ຍົກດາ ໄຊຍະຈັກ ຮອງຫົວໜ້າພະແນກ ຮສສ ແຂວງ ໄດ້ກ່າວລາຍງານວ່າ: ນັບແຕ່ວັນທີ 31 ສິງຫາ 2019 ຈາກຜົນກະທົບຂອງພາຍຸລະດູຮ້ອນໂພດຸນ ແລະ ພະຍຸກາຈິກິ ເຮັດໃຫ້ມີສະພາບຝົນຕົກໜັກຕິດຕໍ່ກັນເປັນເວລາຫຼາຍວັນ ໄດ້ສົ່ງຜົນກະທົບເຮັດໃຫ້ເກີດນ້ຳຖ້ວມເນື້ອທີ່ການຜະລິດ 42.443ເຮັກຕາ, ກວມເອົາ 483 ບ້ານ, ມີ 48.914 ຄອບຄົວ, ພົນລະເມືອງທີ່ຖືກຜົນກະທົບ 2 ແສນກວ່າຄົນ, ບ້ານເຮືອນ, ຊັບສິນ, ສິ່ງສາທາລະນະ, ພື້ນຖານໂຄງລ່າງ, ຂົວ-ເສັ້ນທາງເສຍຫາຍລວມມູນຄ່າ 289 ຕື້ກີບ

ພາບຂ່າວ

ນອກນັ້ນຍັງມີໄພພິບັດທີ່ເກີດຈາກໄຟໄໝ້ເຮືອນຈໍານວນ 30 ບ້ານໃນນັ້ນມີ 53 ຫຼັງມູນຄ່າເສຍຫາຍ 3,4 ຕື້ກີບ ລົມພະຍຸພັດທຳລາຍຈຳນວນ 27 ບ້ານ,ມີ 432 ຫຼັງມູນຄ່າເສຍຫາຍ 2,1 ຕື້ກີບ. ຈາກຜົນກະທົບດັ່ງກ່າວ ທາງແຂວງກໍ່ໄດ້ຊ່ວຍເຫຼືອສຸກເສີນບັນເທົາທຸກທີ່ໄດ້ຮັບຈາກສູນກາງ ແລະ ການລະດົມຂອງທ້ອງຖິ່ນຢ່າງຫຼວງຫຼາຍ

ທີ່ມາ: champamai newspaper