ອາດຍັງຈະແປປ່ວນ ທຸກແຂວງລະວັງຟ້າລົມຝົນຕົກ ໂດຍສະເພາະພາກກາງ-ໃຕ້

ອາດຍັງຈະແປປ່ວນ ທຸກແຂວງລະວັງຟ້າລົມຝົນຕົກ ໂດຍສະເພາະພາກກາງ-ໃຕ້

6th March 2020 0 By Education

ຮູ້ສຶກແປກໆໄປ ປີນີ້ຝົນມາໄວກວ່າປົກກະຕິເດືອນມີນາຕົ້ນໆ ເລີ່ມມີພາຍຸຝົນຕົກໜັກລົມພັດແຮງ ເຊິ່່ງຕະຫຼອດອາທິດນີ້ທາງພາກກາງ ແລະພາກເໜືອຖືກມາແລ້ວ ເສຍຫາຍບໍ່ໜ້ອຍເປັນຕົ້ນເສົາໄຟຟ້າຫັກ, ຕົ້ນໄມ້ຫັກທັບລົດ, ເຮືອນຊານ ຂະນະທີ່ແຕ່ວັນທີ 6-12 ຍັງຈະມີລົມພັດແຮງ ພ້ອມຝົນຕົກຢູ່ບັນດາແຂວງທາງພາກກາງຫາພາກໃຕ້ ຂໍໃຫ້ທຸກຄົນມີສະຕິ.


ຕາມລາຍງານຂ່າວພະຍາກອນອາການຂອງກົມອຸຕຸນິຍົມ ແລະອຸທົກກະສາດໃນມື້ນີ້ ໃຫ້ຮູ້ວ່າ: ສະເພາະວັນທີ 6 ຈະມີຝົນຕົກແຮງຢູ່ເມືອງໂພນໂຮງແຂວງວຽງຈັນ ຈາກນັ້ນໃນວັນທີ 8-9 ມີນາຍັງຈະມີລົມພັດແຮງໃນເຂດດັ່ງກ່າວຕື່ມ.


ຈາກນີ້ຢູ່ເມືອງທ່າແຂກແຂວງຄຳມ່ວນ, ນະຄອນໄກສອນພົມວີຫານ ແຂວງສະຫວັນນະເຂດໃນວັນທີ 8-10 ມີນາ 2020 ຈະມີລົມພັດແຮງ.


ສຳລັບແຂວງສາລະວັນຈະມີຝົນຕົກທົ່ວໄປພ້ອມລົມພັດແຮງແຕ່ວັນທີ 6-12 ມີນາ, ແຂວງເຊກອງ ລົມພັດແຮງຈະເຂົ້າພື້ນທີ່ໃນວັນທີ 9 ຫຼັງຈາກນັ້ນວັນທີ 10 ຈະມີລົມຝົນຕົກໜັກ ແລະຝົນຕົກທົ່ວໄປຈົນຮອດວັນທີ 12 ມີນາ ເຊັ່ນດຽວກັນກັບແຂວງອັດຕະປືກໍ່ຈະມີລົມພັດແຮງພ້ອມຝົນຕົກທົ່ວໄປແຕ່ວັນທີ9-12.

ກ່ຽວກັບແຂວງທາງພາກເໜືອແມ່ນບໍ່ມີຝົນຕົກແຮງ ແຕ່ຍັງຈະມີຝົນຕົກທົ່ວໄປ ພ້ອມລົມພັດແຮງແຕ່ມື້ນີ້ຮອດວັນທີ 12 ມີນາ

ສິ່ງສຳຄັນດິນຟ້າອາກາດເປັນສິ່ງທີ່ຄາດເດົາໄດ້ຍາກກ່ຽວກັນອິດທິລິດຂອງມັນສະນັ້ນ ຝາກທຸກຄົນທີ່ຢູ່ໃນເຂດທີ່ອຸຕຸແຈ້ງເຕືອນມີສະຕິຕໍ່ການໃຊ້ຊີວິດເປັນຕົ້ນການຈອດລົດ, ພັກເຊົາຢູ່ກ້ອງຮົ່ມໄມ້ໃຫຍ່, ຕຶກອາຄານກຳລັງກໍ່ສ້າງຕ້ອງຢູ່ໃຫ້ຫ່າງໄວ້ໃນລະຫວ່າງທີ່ເກີດຝົນຕົກລົມພັດແຮງ ທັງນີ້ກໍ່ເພື່ອຫຼີກລ່ຽງຜົນເສຍຫາຍທີ່ອາດເກີດຂຶ້ນໄດ້.

.