ຄວາມໝາຍຂອງ ເຫຼົ້າ ທີ່ກ່ຽວພັນວັດທະນະທຳ-ສັງຄົມຂອງຄົນລາວ

ຄວາມໝາຍຂອງ ເຫຼົ້າ ທີ່ກ່ຽວພັນວັດທະນະທຳ-ສັງຄົມຂອງຄົນລາວ

9th March 2020 0 By Entertain

ເຫຼົ້າ ຫຼື ເອີ້ນກັນອີກຊື່ ໜຶ່ງວ່າ “ສຸລາ” ໝາຍເຖິງນໍ້າເມົາຊະນິດໜຶ່ງ ທີ່ຜະລິດດ້ວຍການໝັກດອງຈາກເຂົ້າ, ສາລີ ແລະໝາກໄມ້.ເຫຼົ້າທີ່ບໍ່ຕົ້ມ, ບໍ່ກັ່ນເອີ້ນວ່າ ເຫຼົ້າສາໂທ ສ່ວນເຫຼົ້າທີ່ຜ່ານການຕົ້ມກັ່ນອອກມາ ແລ້ວເອີ້ນວ່າ “ເຫຼົ້າເດັດ” ຫຼື ເຫຼົ້າຂາວ ເຊິ່ງມັນມີຄວາມກ່ຽວພັນ ຕິດພັນກັບ ການດໍາລົງຊີວິດຂອງປະຊາຊົນ ບັນດາເຜົ່າມາຕັ້ງແຕ່ດຶກດຳບັນ ບໍ່ວ່າຈະເປັນພິທີກຳທາງຄວາມເຊື່ອຖື, ງານບາສີສູ່ຂວັນ, ງານປະເພນີຕ່າງໆ ກໍຕ້ອງມີເຫຼົ້າຖື ເປັນຮີດຄອງປະເພນີໜຶ່ງທີ່ປະຕິບັດກັນມາແຕ່ອາດີດສູ່ປັດຈຸບັນ.

.

ດັ່ງທີ່ເຮົາມັກໄດ້ຍິນໄດ້ເຫັນຢູ່ ໃນງານ ພິທີກຳຕ່າງໆຂອງ ລາວເຮົາເຊັ່ນ: ພິທີການສູ່ຂວັນ, ການລ້ຽງຜີມັກມີ “ເຫຼົ້າແກ້ວໄຂ່ໜ່ວຍ” ຖ້າພິທີກຳໃຫຍ່ແດ່ກໍຈະເວົ້າວ່າ “ເຫຼົ້າ ໄຫ ໄກ່ໂຕ” ແລະ ອື່ນໆ.

ດັ່ງເລື່ອງທ້າວຮຸ່ງ ທ້າວ ເຈືອງ ວັນນະຄະດີລາວບູຮານກໍມັກກ່າວເຖິງການກິນເຫຼົ້າໃນງານບຸນ, ພິທີ ກຳຕ່າງໆ ເຊິ່ງມັນໄດ້ຕິດ ແໜ້ນໃນຊີວິດປະຈຳວັນຂອງຄົນເຮົາເຊັ່ນ: ການວານ ແຂກລົງນາ ກໍມີການລ້ຽງ ເຫຼົ້າ, ການໂຫ່ເນື້ອສຳເລັດ, ການກິນດອງ, ງານສົ່ງສະການສະຫຼອງໄຊຊະນະ ແລະ ງານ, ປະເພນີຕ່າງໆ ລ້ວນແຕ່ມີການກິນເຫຼົ້າ ຢ່າງມ່ວນຊື່ນລື່ນເລີງແລະ ຖ້າກ່າວເຖິງເຫຼົ້າແລ້ວກໍບໍ່ພຽງແຕ່ ຢູ່ປະເທດເຮົາເທົ່ານັ້ນ

.

ເຊິ່ງ ປະເທດອື່ນໆໃນທົ່ວໂລກຕ່າງກໍມີການດື່ມເຫຼົ້າ,ດື່ມເບຍມາ ແຕ່ດຶກດຳບັນເຊັ່ນກັນຍັງມີປຶ້ມຂຽນ ແລະ ເອກະສານ ຕ່າງໆຍັງໄດ້ກ່າວເຖິງຄວາມສຳຄັນ ແລະ ສັບພະຄຸນຂອງເຫຼົ້າວ່າ: “ນໍ້າອັນນີ້ເອີ້ນ ນໍ້າກ້ານໍ້າຫານ ໃຜຈັດທຳ ການມຸງຄຸນ ຫາກເອົາຍັງນໍ້າເຫຼົ້າ ນັບແຕ່ເພິ່ນຫຼໍ່ພະ ເຈົ້າຍັງເອົາໄປເຮັດຄາຍພິດສະນຸ ຫວິດໄປຮອດຜີພູ ຜີ ແຖນ ແລະ ຜີຟ້າ ຊາວເມືອງ ພະມ້າຍັງເອົາໄປຂຶ້ນຜີທຳ ມະດານໍ້າອັນນີ້ມີມາສຳລັບ ໂລກ ໃຜໄດ້ກິນກໍຫາຍໂສກ ຫາຍໂລກໂພຍໄພ ຜູ້ຂີ້ໄຮ້ໄດ້ ກິນ ກໍກ່າວຄວາມຮັ່ງຄວາມມີ ດີກວ່າພໍ່ກວ່າແມ່ ດີກວ່າຜີ ດໍ້າຜີດວງ …”

ນອກຈາກນີ້ເຫຼົ້າຍັງ ເປັນເຄື່ອງມືສື່ສານສາຍສຳພັນບາງຄົນຮູ້ຈັກນິດໄສໃຈຄໍ ສະໜິດສະໜົມກັນ, ໄດ້ສ່ຽວຮັກສ່ຽວແພງເວົ້າຖືກຄໍກັນກໍຍ້ອນການຮ່ວມວົງເຫຼົ້າອີກດ້ວຍ.

.

ແຕ່ເຖິງຢ່າງໃດ ກໍດີການດື່ມເຫຼົ້າ ຫຼື ສຸລາ ຍັງຖືວ່າເປັນ ສິ່ງທີ່ໃຫ້ໂທດສຳລັບຜູ້ທີ່ດື່ມ ຈົນເກີນຄວາມພໍດີ, ດື່ມໃຫ້ມຶນເມົາຈົນເກີດຄວາມ ປະໝາດຂາດສະຕິ ແລ້ວກໍ່ ເຫດອາລະວາດ, ຂີ່ລົດໄວ ເຊິ່ງເປັນໄປໃນທາງປາກົດການຫຍໍ້ທໍ້ຕໍ່ສັງຄົມ ແລະ ຍັງເປັນການລະເມີດລະບຽບກົດໝາຍບ້ານເມືອງ, ຜິດຕໍ່ ເຈດຈຳນົງຮີດຄອງປະເພນີ ອັນດີງາມຂອງເຖົ້າແກ່ບູ ຮານທີ່ນັບຖືນໍ້າເຫຼົ້າເປັນໜຶ່ງ ໃນວັດທະນະທຳການກິນ ດື່ມສັງສັນທີ່ຂາດບໍ່ໄດ້ຂອງສັງຄົມລາວເຮົາ.

ໂດຍ: ຄຳພຸດ ເທບພະນົມ