ໜ້າເຫັນໃຈ ພຽງມື້ດຽວ! ໂຄວິດ-19 ພາກຊີວິດປະຊາຊົນອີຕາລີໄປແລ້ວ 133ຄົນ

ໜ້າເຫັນໃຈ ພຽງມື້ດຽວ! ໂຄວິດ-19 ພາກຊີວິດປະຊາຊົນອີຕາລີໄປແລ້ວ 133ຄົນ

9th March 2020 0 By Education

ປະເທດອີຕາລີມີຜູ້ເສຍຊີວິດຢ່າງໜ້ອຍ 366ຄົນ ຈາກເຊື້ອໄວຣັດໂຄວິດ-19, ເຊິ່ງໂຕເລກທີ່ໜ້າຢ້ານກົວແມ່ນເພີ່ມຂຶ້ນ 133ຄົນພາຍໃນມື້ດຽວ ຂະນະດຽວກັນ ມາດຕະການຄວບຄຸມພະຍາດດັ່ງກ່າວແມ່ນການປິດເມືອງ ໃຊ້ວິທີດຽວກັນກັບປະເທດຈີນ.

ສຳນັກຂ່າວຕ່າງປະເທດລາຍງານຈາກນະຄອນຫຼວງໂຣມ ປະເທດອິຕາລີ ເມື່ອວັນຈັນ ທີ 9 ມີນາ ວ່າ ກະຊວງສາທາລະນະສຸກອິຕາລີລາຍງານສະຖານະການເຊື້ອໄວຣັສໂຄໂຣນາສາຍພັນໃໝ່ ຫຼື ໂຄວິດ-19 ວ່າ ມີຜູ້ເສຍຊີວິດຢ່າງໜ້ອຍ 366 ຄົນ ເພິ່ມຂຶ້ນ 133 ຄົນ ພາຍໃນ 24 ຊົ່ວໂມງ ຜ່ານມາ ຖືວ່າເປັນສະຖິຕິຜູ້ເສຍຊີວິດປະຈຳວັນສູງທີ່ສຸດ ເປັນປະຫວັດການ ດ້ານຈຳນວນຜູ້ຕິດເຊື້ອໃໝ່ ເພິ່ມຂຶ້ນ 25% ຈາກ 5.883 ຄົນ ເປັນຢ່າງໜ້ອຍ 7.375 ຄົນ ສູງທີ່ສຸດໃນທະວີບເອີຣົບ ແລະ ເປັນພື້ນທີ່ວິກິດທີ່ສຸດຮອງຈາກຈີນ.

ທັງນີ້ ລັດຖະບານອິຕາລີຕັດສິນໃຈໃຊ້ມາດຕະການຄວບຄຸມພະຍາດຢ່າງ “ເຂັ້ມງວດ ແລະ ຕັດສິນໃຈ” ແບບດຽວກັບປະເທດຈີນ ທີ່ກຳລັງດຳເນີນການດ້ວຍການປະກາດປິດເມືອງ ຫຼື ປິດພື້ນທີ່ທັງໝົດໃນເຂດພາກເໜືອ ເຊິ່ງເປັນຈຸດວິກິດທີ່ສຸດຂອງປະເທດ ໄດ້ແກ່ແຄວ້ນລອມບາເດຍທັງໝົດ ເຊິ່ງມີເມືອງເອກ ຄືເມືອງມິລານ ແລະ ອີກ 14 ເມືອງ ໃນແຄວ້ນເວເນໂຕ ທີ່ມີເມືອງເວນິສ ເປັນເມືອງເອກ ແລະ ແຄວ້ນເອມີເລຍ-ໂຣມັນຢາ ທີ່ມີເມືອງປາມາເປັນເມືອງເອກ ໂດຍໃຫ້ພາຍໃຕ້ມາດຕະການຄວາມຄຸມພະຍາດເປັນກໍລະນີພິເສດ ຕັ້ງແຕ່ວັນທີ 8 ມີນາ ຈົນເຖິງ ວັນທີ 3 ເມສາ ເປັນຢ່າງໜ້ອຍ ເພື່ອຫຼຸດຜ່ອນການລະບາດຂອງເຊື້ອໄວຣັສດັ່ງກ່າວ.

ຂະນະທີ່ ສະຖານທີ່ສາທາລະນະທົ່ວປະເທດປິດໃຫ້ບໍລິການ ຍົກເວັ້ນຮ້ານອາຫານ, ຫ້າງສັບພະສິນຄ້າ ແລະ ຮ້ານສະ ດວກຊື້ ເປີດໃຫ້ບໍລິການພາຍໃຕ້ກົດລະບຽບຢ່າງເຂັ້ມງວດ ເຊັ່ນດຽວກັບສະໜາມບິນ ແລະ ສະຖານີລົດໄຟທຸກແຫ່ງ ຍັງເປີດໃຫ້ບໍລິການຕາມປົກກະຕິ ແຕ່ມີການຍົກລະດັບມາດຕະການກວດກາຢ່າງເຂັ້ມງວດ.

ດ້ານສົມເດັດພະສັນທະປາປາ ຟຣານຊິສ ປະມຸກແຫ່ງນະຄອນລັດວາຕິກັນ ປະເທດນ້ອຍ ແລະ ບໍ່ມີຊາຍແດນຕິດກັບທະເລໂດຍກົງ ຕັ້ງຢູ່ໃນນະຄອນຫຼວງໂຣມ ພະອົງໄດ້ສູດມົນວັນອາທິດ ໂດຍຖ່າຍທອດສົດຜ່ານທາງສະຕຣິມມິ່ງ ເປັນຄັ້ງທຳອິດໃນປະຫວັດສາດຂອງວາຕິກັນ. ໂດຍສຳນັກງານເລຂາທິການແຫ່ງລັດວາຕິກັນ ໄດ້ອອກຖະແຫຼງການກ່ຽວກັບການໃຫ້ຄວາມຮ່ວມມືຢ່າງເຕັມທີ່ກັບລັດຖະບານອິຕາລີ ເພື່ອປະສິດທິພາບໃນການຈັດການກັບວິກິດການດ້ານສາທາລະນະສຸກ ໃນຄັ້ງນີ້.