ຟັງແລ້ວດີຕໍ່ໃຈ! ຜູ້ຕິດເຊື້ອໂຄວິດໄດ້ຮັບການປິ່ນປົວຫາຍດີ 62.000 ກວ່າຄົນໃນທົ່ວໂລກ

ຟັງແລ້ວດີຕໍ່ໃຈ! ຜູ້ຕິດເຊື້ອໂຄວິດໄດ້ຮັບການປິ່ນປົວຫາຍດີ 62.000 ກວ່າຄົນໃນທົ່ວໂລກ

9th March 2020 0 By Education

ນັບວ່າເປັນຂ່າວດີທີ່ຫຼາຍລ້ານຄົນໃນທົ່ວໂລກຮັບຮູ້ແລ້ວຈະດີໃຈຫຼາຍ ເມື່ອມີຂໍ້ມູນບອກມາວ່າສາມາດປິ່ນປົວຜູ້ຕິດເຊື້ອໂຄວິດ-19 ໃຫ້ຫາຍດີໄດ້ແລ້ວ 62.000ກວ່າຄົນໃນທົ່ວໂລກ ຫຼັງຫຼາຍປະເທດພວມຕໍ່ສູ້ກັບການລະບາດຂອງເຊື້ອໄວຣັດ ໂຄວິດ-19 ທີ່ໄດ້ພາກເອົາຊີວິດປະຊາກອນໂລກໄປແລ້ວຈໍານວນຫຼາຍ ເຊິ່ງມັນສ້າງຄວາມສະເທືອນໃຈ, ເສົ້າສະລົດໃຈ ພ້ອມສ້າງຄວາມຢ້ານກົວຕໍ່ທຸກຄົນ ເຮັດໃຫ້ບັນດາປະເທດຕ່າງໆລ້ວນແລ້ວແຕ່ອອກມາດຕະການເພື່ອປ້ອງກັນ ແລະ ຄວບຄຸມເຊື້ອພະຍາດນີ້.

ຕາມສື່ South China Morning Post ລາຍງານເວລາ 9:37 ນາທີຂອງວັນທີ 9 ມີນາ 2020 ນີ້ວ່າຈໍານວນຜູ້ຕິດເຊື້ອພະຍາດອັກເສບປອດໂຄວິດ-2019 ໃນ 101 ປະເທດທົ່ວໂລກເພີ່ມຂຶ້ນ 109.045 ຄົນ, ເສຍຊີວິດ 3.818 ຄົນ ແລະ ປິ່ນປົວຫາຍດີ 62.111 ຄົນ ຂະນະທີ່ ສປ ຈີນປະກາດສາມາດຄວບຄຸມພະຍາດດັ່ງກ່າວໄດ້ແລ້ວ ຖ້າປຽບທຽບກັບໄລຍະການລະບາດໃນເບື້ອງຕົ້ນເຫັນວ່າປັດຈຸບັນອັດຕາຜູ້ຕິດເຊື້ອມີຈໍານວນຕໍ່າທີ່ສຸດ ແລະ ໂຮງຫມໍຊົ່ວຄາວຫລາຍແຫ່ງໄດ້ປະກາດປິດໃຫ້ບໍລິການແລ້ວຍ້ອນຜູ້ປ່ວຍຮັກຕົວຫາຍດີແລ້ວກັບຫາຄອບຄົວ ແລະ ໄປປະຕິບັດຫນ້າທີ່ຂອງໃຜມັນ.

ຕົວເລກສະເພາະຜູ້ຕິດເຊື້ອມື້ນີ້ຈາກການລາຍງານຄື: ສປ ຈີນ ມີຜູ້ຕິດເຊື້ອ 80.700 ກວ່າຄົນ ແລະ ເສຍຊີວິດ 3.000 ກວ່າຄົນ; ສ ເກົາຫລີ ມີຜູ້ຕິດເຊື້ອ 7.300 ກວ່າຄົນ ແລະ ເສຍຊີວິດ 51 ຄົນ; ອີຕາລີ ມີຜູ້ຕິດເຊື້ອ 7.300 ກວ່າຄົນ ແລະ ເສຍຊີວິດ 366 ຄົນ; ອີຣານ ມີຜູ້ຕິດເຊື້ອ 6.500 ກວ່າຄັນ ແລະ ເສຍຊີວິດ 194 ຄົນ; ຝຣັ່ງ ມີຜູ້ຕິດເຊື້ອ 1.100 ກວ່າຄົນ ແລະ ເສຍຊີວິດ 19 ຄົນ; ສະຫະລັດອາເມລິກາ ມີຜູ້ຕິດເຊື້ອ 213 ຄົນ ແລະ ເສຍຊີວິດ 11 ຄົນ ແລະ ອື່ນໆ.

ທີ່ມາ: ປະເທດລາວ