ຊາວອີຣ່ານພາກັນດື່ມເຫຼົ້າຂ້າໂຄວິດ, ປິດຊີບຄົນບໍລິສຸດໄປ 27 ຄົນ

ຊາວອີຣ່ານພາກັນດື່ມເຫຼົ້າຂ້າໂຄວິດ, ປິດຊີບຄົນບໍລິສຸດໄປ 27 ຄົນ

10th March 2020 0 By Education

ຕາມລາຍງານຂອງສຳນັກຂ່າວໄອອາເອັນເອັສຂອງທາງການອີຣ່ານ ໃນວັນທີ 9 ມີນາ 2020 ນີ້ໃຫ້ຮູ້ວ່າ ມີຊາວອີຣ່ານດັບເຖິງ 27 ລາຍຍ້ອນໄດ້ຍິນຂ່າວວ່າດື່ມເຫຼົ້າແລ້ວສາມາດຂ້າເຊື້ອໄວຣັສໃນຮ່າງກາຍໄດ້ ທັ້ງນີ້ກໍ່ຍ້ອນມີຄວາມກັງວົນຫຼາຍທີ່ຕອນນີ້ເຊື້ອໄວຣັສກະຈາຍໄປທົ່ວ 31 ແຂວງໃນທົ່ວປະເທດ, ຈົບຊີວິດໄປແລ້ວ 237 ລາຍ ແລະຜູ້ຕິດເຊື້ອເພີ່ມຂຶ້ນເປັນ 7.161 ຄົນ.


ສຳນັກຂ່າວໄອອາເອັນເອັສ ລະບຸວ່າ: ກຸ່ມຜູ້ທີ່ຈາກໄປຢ່າງບໍ່ມີວັນກັບນັ້ນແມ່ນຢູ່ແຂວງຊູເຊສສະຖານທາງຕາເວັນຕົກສຽງໃຕ້ຂອງປະເທດ 20 ຄົນ ແລະ ອີກ 7 ຄົນ ພົບໃນເຂດແອວໂບ ທາງຕອນເໜືອ ພວກເພິ່ນລັກດື່ມເຫຼົ້າເຖື່ອນ ໂດຍປົກກະຕິແລ້ວເຫຼົ້າເປັນສິ່ງຕ້ອງຫ້າມໃນອີຣ່ານຢູ່ແລ້ວ ເພາະເປັນປະເທດມຸສລີມເປັນສ່ວນໃຫຍ່.


ໃນຈຳນວນ 27 ຄົນທີ່ວ່ານີ້ຍັງບໍ່ໝົດຜູ້ທີ່ລັກດື່ມເຫຼົ້າເຖື່ອນ ອີກຈຳນວນໜຶ່ງຕ້ອງເຂົ້າຮັກສາຕົວໃນໂຮງໝໍລວມແລ້ວ 218 ຊີວິດ, ອາຈານຈາກມະຫາວິທະຍາໄລຈັນຄິຊາປູ ໃນແຂວງທີ່ເກີດເຫດບອກວ່າ ສາເຫດທີ່ມີການລັກດື່ມເຫຼົ້າເຖື່ອນດັ່ງກ່າວກໍ່ຍ້ອນຂ່າວລືທີ່ວ່າ ການດື່ມເຫຼົ້າສາມາດຮັກສາການຕິດເຊື້ອໄວຣັສໂຄວິດສາຍພັນໃໝ່ໄດ້.


ຂະນະທີ່ທາງໄອຍະການເຂດບອກວ່າ ຊາວອີຣ່ານເຫຼົ່ານີ້ເຂົາເຈົ້າພາກັນດື່ມເຫຼົ້າເອທານອນ ແອກໍຮໍທີ່ບໍ່ໄດ້ໃຊ້ສຳລັບບໍລິໂພກຢູ່ແລ້ວ ເຂົ້າໄປໃນຮ່າງກາຍຈິ່ງເຮັດໃຫ້ອາການຮຸນແຮງຫຼາຍ ຍ້ອນວ່າພວກເຂົາບໍ່ຮູ້ປະເພດເຫຼົ້າພຽງແຕ່ອ່ານຂ່າວທາງອອນລາຍວ່າ ເຫຼົ້າສາມາດຕໍ່ສູ້ກັບໄວຣັສອັກເສບປອດໄດ້.

ລິ້ງຂ່າວທີ່ກ່ຽວຂ້ອງ http://www.saudigazette.com.sa/article/590638/World/Mena/Bootleg-booze-in-Iran-kills27-after-virus-cure-rumors