ອີຕາລີໜັກໜ່ວງ! ກາຍເປັນປະເທດທໍາອິດໃນເອີຣົບ ທີ່ວິກິດຮຸນແຮງ ມີຜູ້ຕິດເຊື້ອໂຄວິດ-19 ສູງຂຶ້ນນັບມື້

ອີຕາລີໜັກໜ່ວງ! ກາຍເປັນປະເທດທໍາອິດໃນເອີຣົບ ທີ່ວິກິດຮຸນແຮງ ມີຜູ້ຕິດເຊື້ອໂຄວິດ-19 ສູງຂຶ້ນນັບມື້

13th March 2020 0 By Education

ຈໍານວນຜູ້ເສຍຊີວິດຈາກໄວຣັດໂຄວິດ-19 ໃນອີຕາລີເພີ່ມຂຶ້ນ 1.000ລາຍແລ້ວ ແຕ່ລັດຖະບານຍັງໝັ້ນໃຈມາດຕະການສຸດເຂັ້ມງວດທີ່ເຂົາເຈົ້າໃຊ້ນັ້ນມີປະສິດທິພາບ, ຂະນະທີ່ຍອດຜູ້ຕິດເຊື້ອໃນ 24ຊົ່ວໂມງ ພຸ່ງຂຶ້ນສູງເຖິງ 2.651ຄົນ ທໍາລາຍສະຖິຕິເກົ່າໄປແລ້ວ.

ສໍານັກຂ່າວຕ່າງປະເທດລາຍງານວ່າ: ວັນທີ 12 ມີນາ 2020 ສໍານັກງານປ້ອງກັນພົນລະເຮືອນແຫ່ງອີຕາລີ ເປີດເຜີຍວ່າພົບຜູ້ຕິດເຊຶື້ອໄວຣັດໂຄວິດ-19 ລາຍໃໝ່ 2.651 ລາຍພາຍໃນເວລາ 24 ຊົ່ວໂມງ ນັບເປັນສະຖິຕິໃໝ່ຂອງການຕິດເຊື້ອລາຍວັນໃນອີຕາລີ ແຊງໜ້າສະຖິຕິເມື່ອງວັນພຸດທີ່ຜ່ານມາ ເຮັດໃຫ້ຍອດລວມຢູ່ທີ່ 15.113 ລາຍແລ້ວ ແລະ ຮັກສາຫາຍພຽງ 1.258 ລາຍ.

ນອກຈາກນີ້ ຍັງພົບວ່າມີຜູ້ເສຍຊີວິດເພີ່ມອີກ 189ຄົນ ໃນຊ່ວງເວລາດຽວກັນ ເຮັດໃຫ້ຍອດລວມເປັນ 1.016 ຄົນ ຫຼື ຫຼາຍກວ່າ 20%ຂອງຜູ້ເສຍຊີວິດຈາກໂຄວິດ-19 ທົ່ວໂລກທີ່ຕອນນີ້ແຕະຢູ່ 4.965 ຄົນ

ເຖິງຢ່າງໃດກໍ່ຕາມ ທ່ານ ລຸຍຈິ ດີ ມາໂຍ ລັດຖະມົນຕີວ່າການກະຊວງຕ່າງປະເທດຂອງອີຕາລີ ຢືນຢັນວ່າ: ມາດຕະການຕ່າງໆ ທີ່ເຂົາເຈົ້າໃຊ້ ເພື່ອຮັບມືກັບການລະບາດໂຄວິດ-19 ເຊິ່ງລວມເຖິງການປິດເມືອງ, ປິດໂຮງຮຽນ ແລະ ປິດຮ້ານຄ້າໃນທົ່ວປະເທດນັ້ນມີປະສິດທິພາບ ແລະ ທ່ານຍັງກ່າວອີກວ່າ ເຖິງແມ່ນວ່າອີຕາລີຈະເປັນຊາດາອິດໃນເອີຣົບທີ່ປະເຊີນວິກິດຮຸນແຮງແບບນີ້ ແຕ່ອີຕາລີກໍ່ຈະເປັນປະເທດທໍາອິດທີ່ຈະຝ່າຟັນວິກິດນີ້ໄດ້ໄດ້ເຊັ່ນກັນ.