ຊ້າງປ່າບໍ່ຢູ່ປ່າ? ເກີດເຫດຊ້າງປ່າບຸກທໍາລາຍຊັບສິນປະຊາຊົນເສຍຫາຍຈໍານວນຫຼາຍ

ຊ້າງປ່າບໍ່ຢູ່ປ່າ? ເກີດເຫດຊ້າງປ່າບຸກທໍາລາຍຊັບສິນປະຊາຊົນເສຍຫາຍຈໍານວນຫຼາຍ

13th March 2020 0 By Education

ໃນຕອນເຊົ້າຂອງວັນທີ 12 ມີນາ 2020 ທີ່ຜ່ານມາໄດ້ຮັບການລາຍງານຈາກການຈັດຕັ້ງບ້ານ ນໍ້າ ອອກຮູ ເມືອງບົວລະພາ, ແຂວງຄຳມ່ວນ ວ່າມີຊ້າງປ່າຈຳນວນ 3 ຫາ 4 ໂຕ ບຸກເຂົ້າທຳລາຍເລົ້າເຂົ້າ ແລະ ເຄື່ອງປູກຂອງຝັງພໍ່ແມ່ປະຊາຊົນ ບ້ານ ນໍ້າອອກຮູ ເມືອງບົວລະພາ ດັ່ງນັ້ນ ເຈົ້າໜ້າທີ່ຈຶ່ງອອກເຄື່ອນໄຫວເກັບກຳຂໍ້ມູນຕົວຈິງ.

ຕາມການບອກເລົ່າຂອງ ທ້າວ ບຸນຍືນ ປະຊາຊົນ ບ້ານ ນໍາອອກຮູ ເມືອງບົວລະພາ ຄອບຄົວຜູ້ທີ່ຖືກຜົນກະທົບຈາກຊ້າງປ່າເຂົ້າມາທຳລາຍເລົ້າເຂົ້າ ເເລະ ສວນປູກພືດຂອງພໍ່ແມ່່ປະຊາຊົນໄດ້ໃຫ້ຮູ້ວ່າ ໃນຕອນເຊົ້າເວລາປະມານ 4ໂມງເຊົ້າ ຂອງວັນທີ່ 12 /3/ 2020 ທີ່ຜ່ານມາ ໄດ້ມີຊ້າງປ່າປະມານ 3-4 ໂຕ ໄດ້ບຸກເຂົ້າທຳລາຍເລົ້າເຂົ້າ ແລະ ກີນເຂົ້າເປືອກຂອງຕົນ ເຊິ່ງຜົນເສຍຫາຍເບື້ອງຕົ້ນມີ ເລົ້າເຂົ້າຖືກເປ່ເພ, ເຂົ້າໃນເລົ້າເສຍຫາຍ 46ເປົາ ນອກຈາກນັ້ນຊ້າງຍັງໄປທຳລາຍເຮືອນຄົວ ແລະ ຫ້ອງນໍ້າອີກ.

ຈາກນັ້ນຝູງຊ້າງປ່າດັ່ງກ່າວ ກໍ່ໄປທຳລາຍຜົນລະປູກພືດ ຂອງ ທ້າວ ໂຕ້ຍ ປະຊາຊົນ ບ້ານ ນຳອອກຮູ ເປັນຕົ້ນແມ່ນສ່ວນປູກກ້ວຍເຮັດໃຫ້ຕົ້ນກ້ວຍທີ່ປູກໃນສວນມີຄວາມເສຍຫາຍຫຼາຍກວ່າ 200 ຕົ້ນ, ເຊີ່ງເຮັດໃຫ້ການຈັດຕັ້ງບ້ານ ຕະຫລອດຮອດພໍ່ແມ່ປະຊາຊົນພາຍໃນບ້ານ ມີຄວາມຕົກໃຈຢ້ານກົວ ແຕ່ກໍ່ຍັງດີທີ່ຝຸງຊ້າງບໍ່ສາມາດທຳຮ້າຍພໍ່ແມ່ປະຊາຊົນພາຍໃນບ້ານ ເກີດຜົນກະທົບ ແລະ ບາດເຈັບແຕ່ຢ່າງໃດ.

ທັ້ງນີ້, ຕາມການບອກເລົ່າຂອງພໍ່ແມ່ປະຊາຊົນໃຫ້ຮູ້ວ່າ ຝຸງຊ້າງ ດັ່ງກ່າວ ແມ່ນໄດ້ເດີນທາງມາຊອກຢູ່ຫາກີນໃນບໍລິເວນທີ່ໃກ້ບ້ານທີມີຄວາມອຸດົນສົມບູນ. ແນວໃດກໍ່ດີ ປັດຈຸບັນນີ້ເພື່ອຫຼີກລ່ຽງ ຕໍ່ຜົນກະທົບທາງດ້ານຊີວິດສັບຊີນລວມໄປເຖີງເຄື່ອງປູກຂອງຝັງຂອງພໍ່ແມ່ປະຊາຊົນໃນຂອບເຂດດັ່ງກ່າວ ການຈັດຕັ້ງບ້ານ ແລະ ພໍ່ແມ່ປະຊາຊົນຈື່ງຮຽກຮ້ອງໃຫ້ພາກສ່ວນທີ່ກຽ້ວຂ້ອງຈົ່ງຊ່ວຍຄວບຄຸມ ແລະ ຕິດຕາມການເຄື່ອນໄຫວຂອງຊ້າງຝູງນີ້ເພື່ອປ້ອງກັນບໍ່ໃຫ້ອອກມາທໍາລາຍຊັບສິນ ຫຼື ທໍາຮ້າຍປະຊາຊົນໄດ້.