ລີເດຍຝາກຂໍ້ຄິດ! ໃນຖານະຜູ້ທີ່ຫາກໍ່ກວດພົບວ່າຕົນເອງຕິດເຊື້ອໂຄວິດ-19

ລີເດຍຝາກຂໍ້ຄິດ! ໃນຖານະຜູ້ທີ່ຫາກໍ່ກວດພົບວ່າຕົນເອງຕິດເຊື້ອໂຄວິດ-19

16th March 2020 0 By Education

ສາວລີເດຍ ເມຍຮັກຂອງໜຸ່ມແມັດທີວ ດິນ ໄດ້ໂພສລົງໃນໂອຈີສ່ວນຕົວເຊົ້າມື້ນີ້ບອກເຖິງຜົນກວດໂຄວິດ-19 ອອກມາເປັນບວກ ພ້ອມຝາກຂໍ້ມູນຫຼາຍຢ່າງທີ່ເປັນປະໂຫຍດໃຫ້ບັນດາແຟນຄັບພ້ອມປະຊາຊົນໄດ້ຮູ້ ພື້ນການກ່ຽວກັບພະຍາດປອດອັກເສບສາຍພັນໃໝ່, ສິ່ງສຳຄັນສາວລີເດຍບອກວ່າທຸກຄົນຕ້ອງຕັ້ງສະຕິຢ່າຕົກໃຈໃນຊ່ວງວິກິດແບບນີ້ຕ້ອງເຂັ້ມແຂງເອົາໄວ້ທັງໃນດ້ານຈິດໃຈ ແລະສຸຂະພາບ.

ສາວລີເດຍ ນັກຮ້ອງດັງຂອງໄທ ໄດ້ຕິດໂຄວິດນຳຜົວ ພ້ອມໂພສດ້ວຍຄວາມຄິດຮອດລູກໆວ່າ ຈັກລູກໆຈະໄດ້ຢູ່ໂດຍທີ່ບໍ່ມີພໍ່ແມ່ໄປອີກດົນປານໃດ ແຕ່ຢ່າງໜ້ອຍຍັງມີພໍ່ເຖົ້າແມ່ເຖົ້າ ຫວັງວ່າເດມີ່ຈະບໍ່ລືມແມ່ ແລະ ດີແລນຈະບໍ່ຄຽດວ່າຢູ່ໆພໍ່ແມ່ກໍ່ຫາຍຕົວໄປ ດຽວມ່າມີ່ແດດດີ້ຈະກັບມານະລູກ ຫ້າມຮ້ອງໄຫ້ ເພາະນ້ຳຕາອາດມີໄວຣັສ.

ພ້ອມນີ້ສາວລີເດຍຍັງ ຝາກຂໍ້ມູນທີ່ເປັນປະໂຫຍດໄວ້ໃຫ້ທຸກຄົນຄື: ສິ່ງທີ່ຮູ້ຕອນນີ້ຄືຕິດໂຄວິດມາຈາກ ແມັດທີວ ສ່ວນໃຫຍ່ທຸກເຄສທີ່ເປັນໂຄວິດຄົນໃກ້ຊິດຢ່າງຜົວເມຍຈະມີໂອກາດຕິດສູງກວ່າໝູ່ ລີເດຍບໍ່ໄດ້ອອກໄປໃສ ເດຍຕິດຈາກພາຍໃນເຮືອນ, ສ່ວນນ້ອງດີແລນຜົນກວດເປັນລົບ, ນ້ອງເດມີ່ບໍ່ໄດ້ໄປ ເພາະເປັນຫ່ວງຈະໄປຮັບໄວຣັສມາຈາກທາງນອກ ແຕ່ຕອນນີ້ລູກໆທັງສອງລ່າເລີງກິນນອນ, ຫຼິ້ນ ແຂງແຮງດີ ຕ້ອງຕິດຕາມອາການຕໍ່ໄປ.

ສ່ວນຄົນອື່ນໆທີ່ໃກ້ຊິດຈາກຮ້ານອາຫານ, ຄ້າຍມວຍ ຜົນກວດລ້ວນເປັນລົບ, ເຖິງຈະເປັນລົບກໍ່ຕາມ ຕ້ອງໄດ້ເຝົ້າຕິດຕາມອາການ ຖ້າມີອາການຄືຈະເລີ່ມ ຫຼື ມີໄຂ້ໃຫ້ໄປກວດຊ້ຳ ລະຫວ່າງນີ້ການປະຕິບັດຂອງຄົນໃນເຮືອນທີ່ຢູ່ໃກ້ຊິດກັນຕ້ອງປ້ອງກັນໃຫ້ຫຼາຍທີ່ສຸດ ໝັ່ນລ້າງມື, ບໍ່ໃຊ້ອຸປະກອນການກິນຮ່ວມກັນ ລະວັງນ້ຳຕາ ນ້ຳລາຍ ເພາະວ່າຜູ້ປ່ວຍຕ້ອງມີໄວຣັສໃນຈຳນວນທີ່ວັດໄດ້ໄປກວດຈຶ່ງເຫັນຜົນວ່າເປັນບວກ ຂໍຢ້ຳວ່າໄປກວດເປັນລົບ ບໍ່ໄດ້ໝາຍຄວາມວ່າໃນຮ່າງກາຍບໍ່ມີໄວຣັສ ແຕ່ເປັນຜູ້ສ່ຽງທີ່ຕ້ອງເຝົ້າລະວັງຢ່າງໃກ້ຊິດ.

ສຳລັບອາການ ສາວລີເດຍບອກວ່າ: ຮູ້ສືກຕັນດັງ ໄອແຫ້ງໆບໍ່ມີຂີ້ກະເທີ້, ໄຂ້ສູງ 38 ອົງສາ ແຕ່ບໍ່ເຖິງຂັ້ນໄຂ້ແຮງ ຮູ້ສຶກຄືໆຈະເປັນຫວັດ ຫຼື ເປັນພູມແພ້ ທັງໝົດນີ້ເລີ່ມມື້ຄືນວັນທີ 13 ມີນາ ແລະຕະຫຼອດວັນທີ 14.

ສ່ວນອາການຂອງໜຸ່ມແມັດທີວ ຜົວສາວລີເດຍ ຕອນນີ້ບໍ່ມີຫຍັງປ່ຽນແປງຫຼາຍ ບໍ່ມີໄຂ້ແລ້ວ ໄປເອັກສະເຣເບິ່ງປອດແມ່ນເພິ່ນເປັນພູມແພ້ ແລະຫອບຫືດ ເຊິ່ງໝໍບອກວ່າບໍ່ໜ້າຈະມີບັນຫາຫຍັງ ແຕ່ຍັງຕ້ອງກວດເຊັກຢູ່ຕະລອດ…

ແນວໃດກໍ່ຕາມ ຝາກໄວ້ອີກຄັ້ງໜຶ່ງ ຂໍໃຫ້ພໍ່ແມ່ເດມີ່ກັບດີແລນກັບມາແຂງແຮງ ຫາຍຈາກໂລກໄພໄຂ້ເຈັບໄວໆເດີ້ ເປັນກຳລັງໃຈໃຫ້, ສ່ວນຝັ່ງລາວເຮົາກໍ່ຢ່າປະໝາດ ຢ່າຢູ່ໃກ້ບ່ອນຊຸມຊົນ, ຫຼຸດຜ່ອນງານສ້າງສັນກິນດື່ມແບບທີ່ເຄີຍປະຕິກັນມາ ໝັ່ນລ້າງມື ແລະໃສ່ຜ້າອັດປາກຫາກໄປໃນເຂດສ່ຽງ.