ດ່ວນ! ສພກ ສະເໜີປິດໂຮງຮຽນອະນຸບານ ຊົ່ວຄາວ ປ້ອງກັນໂຄວິດ-19

ດ່ວນ! ສພກ ສະເໜີປິດໂຮງຮຽນອະນຸບານ ຊົ່ວຄາວ ປ້ອງກັນໂຄວິດ-19

16th March 2020 0 By Education

ຕໍ່ກັບສະພາບການລະບາດຂອງພະຍາດໂຄວິດ-19 ທີ່ແຜ່ຂະຫຍາຍເປັນວົງກ້ວາງຢູ່ຫຼາຍປະເທດໃນທົ່ວໂລກ ເຮັດໃຫ້ລາວເຮົາຕ້ອງມີມາດຕະການເຄັ່ງຄັດເພື່ອປ້ອງກັນ ແລະ ສະກັດກັ້ນພະຍາດດັ່ງກ່າວ ດ້ວຍຫຼາຍວິທີທາງ ເຊິ່ງຫຼ້າສຸດ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງ ໂຄວິດ-19 (ສພກ) ສະເໜີ ປິດຊົ່ວຄາວໂຮງຮຽນລ້ຽງເດັກ ແລະ ໂຮງຮຽນອະນຸບານ ເພື່ອຍົກສູງມາດຕະການເຝົ້!ລະວັງໂຄວິດ-19.

ອີງຕາມແຈ້ງການຂອງ ສພກ ເລື່ອງສະເໜີພິຈາລະນາປິດໂຮງຮຽນລ້ຽງເດັກ ແລະ ໂຮງຮຽນອະນຸບານ ເພື່ອຍົກສູງມາດຕະການເຝົ້!ລະວັງໂຄວິດ-19 ສະບັບເລກທີ 011/ສພກ, ລົງວັນທີ 16 ມີນາ 2020 ໃຫ້ຮູ້ວ່າ: ເຖິງແມ່ນວ່າ ປັດຈຸບັນ ສປປ ລາວ ຍັງບໍ່ມີກໍລະນີຜູ້ຕິດເຊຂື້ອໂຄວິດ-19 ແຕ່ຖືວ່າຍັງມີຄວາມສ່ຽງສູງ ຍ້ອນປະເທດໃກ້ຄຽງມີການລະບາດແລ້ວ ແລະ ຍັງມີຜູ້ເດີນທາງມາຈາກປະເທດທີ່ມີການລະບາດເຂົ້າ-ອອກ ສປປ ລາວ ເປັນຕົ້ນ ນັກລົງທຶນ, ພະນັກງານຊ່ຽວຊານ, ກໍາມະກອນໂຄງການກໍ່ສ້າງ, ນັກຮຽນນັກສຶກສາ ແລະ ອື່ນໆ.

ສະນັ້ນ, ເພື່ອເປັນການຫຼຸດຄວາມສ່ຽງ ໂດຍສະເພາະກຸ່ມຄົນທີ່ມີຄວາມສ່ຽງສູງເຊັ່ນ: ຜູ້ສູງອາຍຸ, ເດັກນ້ອຍ ແລະ ຜູ້ມີພູມຄຸ້ມກັນຕໍ່າ ເຊິ່ງໃນນັ້ນເຂດສ່ຽງມີທັງບັນດາສະຖານທີ່ລ້ຽງເດັກ ແລະ ໂຮງຮຽນອະນຸບານແຫ່ງຕ່າງໆ ດັ່ງນັ້ນ ຈຶ່ງສະເໜີມາຍັງກະຊວງ ສສກ ເພື່ອພິຈາລະນາອອກແຈ້ງການປິດຊົ່ວຄາວໂຮງຮຽນລ້ຽງເດັກ ແລະ ໂຮງຮຽນອະນຸບານ ເລີ່ມແຕ່ວັນທີ 17 ມີນາ 2020 ເປັນຕົ້ນໄປ ຈົນກວ່າສະຖານະການລະບາດຂອງໂຄວິດ-19 ຈະສາມາດຄວບຄຸມໄດ້ ພ້ອມທັງແນະນໍາວິທີການເບິ່ງແຍງດູແລລູກຫຼານໃຫ້ຢູ່ໃນສະຖານທີ່ປອດໄພ ຖືກຫຼັກສຸຂາອານາໄມ.