ການແຜ່ເຊື້ອພະຍາດທີ່ຮ້າຍແຮງສູ່ບຸກຄົນອື່ນໂດຍເຈດຕະນາມີຄວາມຜິດທາງອາຍາ

ການແຜ່ເຊື້ອພະຍາດທີ່ຮ້າຍແຮງສູ່ບຸກຄົນອື່ນໂດຍເຈດຕະນາມີຄວາມຜິດທາງອາຍາ

26th March 2020 0 By Entertain

ວ່າດ້ວຍເລື່ອງທີ່ຫຼາຍໆຄົນວິຕົກກັງວົນເມື່ອລາວເຮົາມີຜູ້ຕິດເຊື້ອໂຄວິດ ຫຼື ພະຍາດອັກເສບປອດສາຍພັນໃໝ່ 2019 ຫຼ້າສຸດວັນທີ 25 ມີນາ 3 ກໍລະນີ ໂດຍທຳອິດແມ່ນຕິດ 2 ກໍລະນີ ແລະ ກໍລະນີທີ 3 ແມ່ນຕິດຈາກການໃກ້ຊິດ 1 ໃນກໍລະນີທຳອິດ.

.
ທັງນີ້ຕາມແຫຼ່ງຂ່າວຫຼາຍແຫ່ງຂ່າວໃຫ້ຮູ້ວ່າ ບຸກຄົນຜູ້ຕິດເຊື້ອ 1 ໃນນັ້ນທ່ານໝໍໄດ້ແນະນຳໃຫ້ກັກວໍລິເວນຕົນເອງເພື່ອຕິດຕາມອາການ ແຕ່ບຸກຄົນດັ່ງກ່າວກັບຍັງໃຊ້ຊີວິດປົກກະຕິ ໄປກິນເຂົ້າ ສັງສັນກັບໝູ່ເພື່ອນ ພໍຮູ້ອາການໄປກວດຈຶ່ງໄດ້ແຍກປ່ຽວ ແລະກວດພົບເຊື້ອ ໂດຍທີ່ມີໝູ່ອີກຄົນຕິດເຊື້ອນຳເປັນກໍລະນີທີ 3.

.
ຈຸດປະສົງຄື ຈະອະທິບາຍໃຫ້ທຸກຄົນເຂົ້າໃຈວ່າ ພະຍາດດັ່ງກ່າວບໍ່ແມ່ນເລື່ອງຫຼິ້ນທໆອີກຕໍ່ໄປ ເພາະມັນສາມາດແຜ່ກະຈາຍເຊື້ອຜ່ານການສຳຜັດ, ໃກ້ຊິດກັບຜູ້ທີ່ຕິດເຊື້ອ ທັງນີ້ຖ້າຮູ້ວ່າຕົນເອງມາແຕ່ປະເທດທີ່ມີຄວາມສ່ຽງກໍຄວນປະຕິບັດຕາມມາດຕະການຢ່າງເຄັ່ງຄັດ, ຕິດຕາມອາການຕົນເອງ ແລະ ບໍ່ຄວນອອກໄປໃສ ພົວພັນກັບໃຜ ທັງນີ້ກໍເພື່ອປ້ອງກັນບໍ່ໃຫ້ມີການແຜ່ເຊື້ອເພີ່ມຕື່ມ ແລະ ຄວນໄປພົບແພດໝໍເພື່ອທຳການປິ່ນປົວໃຫ້ທັນການ.

.
ແຕ່ໃນທາງກົງຂັນຂ້າມຍັງປະກົດເຫັນຫຼາຍໆຄົນທີ່ອາດຈະຫົວແຂງ ບໍ່ປະຕິບັດຕາມມາດຕະການ, ບໍ່ສົນໃຈຕໍ່ເຫດການດັ່ງກ່າວ ຮູ້ວ່າຕົນເອງມີອາການ, ຮູ້ວ່າຕົນເອງຕິດແຕ່ບໍ່ປະຕິບັດຕາມມາດຕະການ ເຈດຕະນາແຜ່ເຊື້ອພະຍາດທີ່ຮ້າຍແຮງສູ່ບຸກຄົນອື່ນ ຈະມີຄວາມຜິດທາງອາຍາ ມາດຕາ 199 ການແຜ່ເຊື້ອພະຍາດທີ່ຮ້າຍແຮງ.


ໂດຍໃນມາດຕານີ້ລະບຸວ່າ: ຜູ້ຕິດເຊື້ອພະຍາດທີ່ຮ້າຍແຮງ ຫາກນຳເອົາເຊື້ອພະຍາດນັ້ນ ໄປແຜ່ຂະຫຍາຍສູ່ບຸກຄົນອື່ນໂດຍເຈດຕະນາຈະຖືກລົງໂທດຕັດອິດສະລະພາບ ແຕ່ ສອງປີ ຫາ ຫນ້າປີ ແລະ ຈະຖືກປັບໃຫມແຕ່ 10.000.000 ກີບ ຫາ 50.000.000 ກີບ. ບຸກຄົນໃດ ໂດຍເຈດຕະນາ ນຳເອົາເຊື້ອພະຍາດທີ່ຮ້າຍແຮງ ໄປແຜ່ຂະຫຍາຍສູ່ບຸກຄົນອື່ນ ຈະຖືກລົງໂທດຕັດອິດສະລະພາບ ແຕ່ຫ້າຫາສິບປີ ແລະ ຈະ ຖືກປັບໃຫມ ບໍ່ເກີນ 30.000.000 ກີບ 70.000.000 ກີບ.

ໃນກໍລະນີທີ່ຜູ້ກະທໍາຜິດ ຫາກໄດ້ນຳເອົາເຊື້ອພະຍາດທີ່ຮ້າຍແຮງ ໄປແຜ່ຂະຫຍາຍ ສູ່ບຸກຄົນອື່ນ ເປັນອາຈິນ ຫຼື ມີການຈັດຕັ້ງເປັນກຸ່ມ ຈະຖືກລົງໂທດຕັດອິດສະລະພາບ ແຕ່ ເຈັດປີ ຫາ ສິບຫ້າປີ ແລະ ຈະຖືກປັບໃຫມແຕ່ 50.000.000 ກີບ ຫາ 70.000.000 ກີບ.