ງາມໜ້າ ໄວລຸ້ນລາວລວມກຸ່ມຕີກັນແຄມຂອງ ຈັບໄດ້ 11 ຄົນ

ງາມໜ້າ ໄວລຸ້ນລາວລວມກຸ່ມຕີກັນແຄມຂອງ ຈັບໄດ້ 11 ຄົນ

3rd April 2020 0 By Education

ໄວລຸ້ນໄວຄຶກຄະນອງເຫັນຂ່າວແລ້ວໃຈຫາຍແທນພໍ່ແມ່ ລູກຫຼານຮຽນເປັນນັກເລງແຕ່ນ້ອຍພາກັນກໍ່ເເຫດລຸມທຳຮ້າຍຮ່າງກາຍອີກຝ່າຍຈົນໄດ້ຮັບບາດເຈັບສາຫັດ, ຢູ່ເສັ້ນທາງແຄມຂອງ ( ດ້ານຫຼັງໂຮງແຮມດອນຈັນ ) ໃນຄືນວັນທີ 20 ມີນາທີ່ຜ່ານມາ; ເຈົ້າໜ້າທີ່ສາມາດເກັບກຳຂໍ້ມູນຫຼັກຖານ ແລະ ຕິດຕາມນຳຈັບພວກທີ່ລົງມືກໍ່ເຫດໄດ້ທັງໝົດລວມມີ 11 ຄົນ ມາດຳເນີນຄະດີຕາມລະບຽບກົດໝາຍ ໂດຍໃຊ້ເວລາໃນການນຳຈັບ 9 ວັນ.

ຕາມແຫຼ່ງຂ່າວຈາກ ປກສ ນວ ໂດຍອ້າງອີງຄຳໃຫ້ສຳພາດຂອງ ທ່ານພັທ ອິນປັນ ຫາດາວເຮືອງ ຮອງຫົວໜ້າກອງບັນຊາການ ປກສ ເມືອງສີສັດຕະນາກ ໃຫ້ຮູ້ວ່າ: ໃນວັນທີ 21 ມີນາ 2020 ນາງ ໂສພາ ບ້ານທາດຫຼວງເໜືອ ເມືອງໄຊເສດຖາ ໄດ້ເຂົ້າແຈ້ງຄວາມກັບເຈົ້າໜ້າທີ່ວ່າ ຫຼານຊາຍຂອງຕົນ ຊື່ ທ້າວ ຈັນທະມາລີ ຫຼື ຈັນ ອາຍຸ 15 ປີ, ອາຊີບ ນັກຮຽນ ຖືກກຸ່ມໄວລຸ້ນລຸມທໍາຮ້າຍຮ່າງກາຍ ຢູ່ເສັ້ນທາງແຄມຂອງ (ດ້ານຫຼັງໂຮງແຮມຫາດດອນຈັນ ) ຈົນໄດ້ຮັບບາດເຈັບສາຫັດ; ເມື່ອຮູ້ແນວນັ້ນ ກໍ່ໄດ້ມອບໝາຍໃຫ້ໜ່ວຍງານວິຊາສະເພາະສົມທົບກັບພາກສ່ວນທີ່ກ່ຽວຂ້ອງ ລົງກວດກາສະຖານທີ່ເກີດເຫດ ແລະ ບັນທຶກຄໍາໃຫ້ການຂອງຜູ້ຖືກທໍາຮ້າຍຮ່າງກາຍ;

ໂດຍໃນເບື້ອງຕົ້ນ ທ້າວ ຈັນ ໄດ້ໃຫ້ການຕໍ່ເຈົ້າໜ້າທີ່ວ່າ: ເວລາ 20:00 ໂມງ-24:00 ໂມງ ຂອງວັນທີ 20 ມີນາ 2020 ຕົນເອງ ແລະ ໝູ່ອີກ 10 ກວ່າຄົນ ໄດ້ພາກັນໄປນັ່ງຫຼິ້ນຊຸມກັນ ຢູ່ເສັ້ນທາງແຄມຂອງ, ຕໍ່ມາໄດ້ມີ ທ້າວ ວັນນະພາ ຫຼື ອາເລັກ ແລະ ໝູ່ອີກປະມານ 20-30 ກວ່າຄົນ ໄດ້ແລ່ນເຂົ້າມາລຸມຕີຜູ້ກ່ຽວຈົນສະຫຼົບຄາທີ່. ຕໍ່ກັບເຫດການດັ່ງກ່າວເຈົ້າໜ້າທີ່ ປກສ ເມືອງສີສັດຕະນາກ ກໍ່ໄດ້ສົມທົບກັບກໍາລັງວິຊາສະເພາະ, ປກສ ກຸ່ມ ແລະ ອໍານາດການປົກຄອງບ້ານໜອງດ້ວງ ເມືອງສີໂຄດຕະບອງ ເພື່ອວາງແຜນເຂົ້າຈັບກຸມໄວລຸ້ນທີ່ກໍ່ເຫດດັ່ງກ່າວ; ຕົກມາວັນທີ 22 ມີນາ 2020 ຈິ່ງສາມາດຈັບຕົວ ທ້າວ ວັນນະພາ ຫຼື ອາເລັກ ອາຍຸ 15 ປີ ແລະ ທ້າວ ກັນຍາ ຫຼື ກ້ວຍ ອາຍຸ 14 ປີ, ທັງສອງຢູ່ບ້ານໜອງດ້ວງ ເມືອງສີໂຄດຕະບອງ ມາສອບສວນ.

ຜ່ານການສອບສວນ ທ້າວ ອາເລັກ ແລະ ທ້າວ ກ້ວຍ ໄດ້ໃຫ້ການຕໍ່ເຈົ້າໜ້າທີ່ວ່າ: ໃນການລົງມືກໍ່ເຫດໃນຄັ້ງນີ້ ທ້າວ ອາເລັກ ແມ່ນເປັນຫົວໂປ້ໂຕການ; ເຊິ່ງພວກກ່ຽວໄດ້ລົງມືຕີ ທ້າວ ຈັນ ແທ້. ຈາກນັ້ນພວກກ່ຽວກໍ່ຊັດທອດຫາກຸ່ມແກ້ງທີ່ລົງມືກໍ່ເຫດນໍາກັນອີກ 9 ຄົນ ຄື: 1. ທ້າວ ບັນຊາ ອາຍຸ 17 ປີ, ບ້ານໜອງດ້ວງທົ່ງ; 2. ທ້າວ ເສິກ ອາຍຸ 17 ປີ, ຢູ່ບ້ານໜອງດ້ວງທົ່ງ ; 3. ທ້າວ ໂອເວັ້ນ ອາຍຸ 16 ປີ, ຢູ່ບ້ານໜອງດ້ວງເໜືອ ; 4. ທ້ານ ຈັນທະສອນ ອາຍຸ 17 ປີ, ຢູ່ບ້ານອາກາດ; 5. ທ້າວ ອານຸສິດ ອາຍຸ 16 ປີ, ບ້ານປາກທ້າງ; 6. ທ້າວ ສອນໄຊ ອາຍຸ 17 ປີ, ຢູ່ບ້ານດົງນາໂຊກເໜືອ; 7. ທ້າວ ທະນຸໄລ ອາຍຸ 14 ປີ, ຢູ່ບ້ານດົງນາໂຊກເໜືອ; 8. ທ້າວ ຫົງຄໍາ ອາຍຸ 14 ປີ, ຢູ່ບ້ານໜອງດ້ວງທົ່ງ; 9. ແສງປັນຍາ ອາຍຸ 15 ປີ, ຢູ່ບ້ານໜອງດ້ວງທົ່ງ.

ພວກກ່ຽວແມ່ນຢູ່ເມືອງສີໂຄດຕະບອງ. ຫຼັງຈາກນັ້ນ ນັບແຕ່ວັນທີ 23-30 ມານີ 2020 ເຈົ້າໜ້າທີ່ກໍ່ສືບຕໍ່ນໍາຈັບທັງ 9 ຄົນ ໄດ້ທັງໝົດ; ສ່ວນສາເຫດທີ່ພວກກ່ຽວກໍ່ເຫດທໍາຮ້າຍຮ່າງກາຍ ທ້າວ ຈັນ ໃນຄັ້ງນີ້ ຍ້ອນວ່າຜ່ານມາເຄີຍຜິດຖຽງກັນ ແລະ ເຄີຍມີເລື່ອງກັນມາແລ້ວ 2-3 ຄັ້ງ.

ຕໍ່ກັບເຫດການທີ່ເກີດຂຶ້ນ ພັທ ອິນປັນ ຫາດາວເຮືອງ ຍັງໄດ້ຝາກເຖິງບັນດາພໍ່-ແມ່ ຜູ້ປົກຄອງ ຈົ່ງຊ່ວຍກັນຕິດຕາມ ແລະ ເບິ່ງແຍງພຶດຕະກໍາຂອງລູກຫຼານຢ່າງໃກ້ຊິດ. ເພາະວ່າໃນໄລຍະເວລາດັ່ງກ່າວ, ພັກ-ລັດ ໄດ້ມີຄໍາສັ່ງໃຫ້ສະຖາບັນການສຶກສາຕ່າງໆໃນຂອບເຂດທົ່ວປະເທດ, ນັບທັງພາກລັດ-ເອກະຊົນ ແມ່ນຢຸດໂຈະການຮຽນການສອນຊົ່ວຄາວ ເພື່ອເປັນການປ້ອງກັນ ແລະ ສະກັດກັ້ນ ການແຜ່ລະບາດຂອງພະຍາດໂຄວິດ-19, ທັງເປັນການປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ.