ນັກວິໄຈພົບ ຜູ້ປ່ວຍໂຄໂຣນາກວ່າ 25% ບໍ່ມີອາການສະແດງເລີຍ

ນັກວິໄຈພົບ ຜູ້ປ່ວຍໂຄໂຣນາກວ່າ 25% ບໍ່ມີອາການສະແດງເລີຍ

4th April 2020 0 By Education

 

ໃນວັນທີ 3 ເມສາ 2020 ສຳນັກຂ່າວນິວຢອກທາມ ໄດ້ລາຍງານວ່າ ທ່ານໂຣເບີດ ເຣດຟີວ ຜູ້ອຳນວຍການສູນຄວບຄຸມ ແລະປ້ອງກັນໂຣກຕິດຕໍ່ແຫ່ງຊາດ (C.D.C) ຂອງສະຫະລັດ ເຕືອນພົບຂໍ້ມູນໃໝ່ ຜູ້ຕິດເຊື້ອໄວຣັສໂຄໂຣນາສາຍພັນໃໝ່ໂຄວິດ 19 ມີຜູ້ປ່ວຍໃນຊັດສ່ວນ 25% ແມ່ນບໍ່ສະແດງອາການຫຍັງເລີຍ.

ສິ່ງນີ້ສາມາດອະທິບາຍຄຳຕອບໄດ້ວ່າເປັນຫຍັງໂຄວິດຈິ່ງແຜ່ລະບາດຕິດຕໍ່ກັນໃນສະຫະລັດຢ່າງວ່ອງໄວຂະໜາດນີ້ ຈາກຂໍ້ມູນໃໝ່ນີ້ ເຮັດໃຫ້ C.D.C ຈຳເປັນຕ້ອງທົບທວນຂໍ້ແນະນຳທີ່ບອກປະຊາຊົນວ່າຖ້າບໍ່ມີອາການປ່ວຍດ້ວຍໄຂ້ຫວັດ ບໍ່ຈຳເປັນສວມໜ້າກາກອະນາໄມ.

ນອກຈາກນີ້ຍັງມີຂໍ້ມູນລາຍງານວ່າ: ຜູ້ໂດຍສານໃນເຮືອສຳລານໄດມອນ ປີຣີນເຊວທີ່ຖືກກັກຕົວເທິງເຮືອທຽບທ່າທີ່ຍີ່ປຸ່ນໃນອ່າວໂຢໂກຮາມາ ກໍ່ພົບວ່າຜູ້ໂດຍສານທີ່ຕິດເຊື້ອຈຳນວນ 18% ແມ່ນບໍ່ມີອາການສະແດງອອກ.

ໃນປະເດັນດຽວກັນ ທີມນັກວິໄຈຂອງຮ່ອງກົງກໍ່ຊີ້ໃຫ້ເຫັນວ່າ ມີຜູ້ຕິດເຊື້ອປະມານ 20-40%ໃນຈີນແມ່ນໄດ້ແຜ່ເຊື້ອກ່ອນອາການສະແດງອອກ ເມື່ອມີຜູ້ປ່ວຍທີ່ບໍ່ມີອາການຫຼາຍຄືແນວນັ້ນຈິ່ງຍາກທີ່ຈະອະທິບາຍວ່າເປັນຫຍັງໄວຣັສໂຄວິດຈິ່ງລະບາດໄປທົ່ວໂລກຢ່າງວ່ອງໄວ ມາຮອດຂະນະນີ້ມີຜູ້ປ່ວຍສະສົມທັງໝົດ 1,1 ລ້ານຄົນ, ເສຍຊີວິດແລ້ວຫຼາຍກວ່າ 52.000 ສົບ.