ເລັ່ງປັບປຸງຂະແໜງອາຊີວະສຶກສາ ເພື່ອແກ້ໄຂການບໍ່ມີວຽກເຮັດງານທຳ

ເລັ່ງປັບປຸງຂະແໜງອາຊີວະສຶກສາ ເພື່ອແກ້ໄຂການບໍ່ມີວຽກເຮັດງານທຳ

26th December 2019 0 By Admin

ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ໃຫ້​ສຳ­ພາດ​ໃນ​ໂອ­ກາດ​ເຂົ້າ​ຮ່ວມ​ກອງ​ປະ­ຊຸມ​ລັດ­ຖະ­ບານ​ເປີດ​ກວ້າງ ຄັ້ງ​ທີ II ວ່າ: ກະ­ຊວງ ສສກ ກຳ­ລັງ​ເລັ່ງ​ປັບ­ປຸງ​ຂະ­ແໜງ​ອາ­ຊີ­ວະ​ສຶກ​ສາ ເພື່ອ​ແກ້​ໄຂ​ບັນ­ຫາ​ການ​ບໍ່​ມີ​ວຽກ​ເຮັດ​ງານ​ທຳ​ຂອງ​ນັກ­ຮຽນ​ທີ່​ຈົບ​ມັດ­ທະ­ຍົມ​ຕົ້ນ ແລະ ຕອນ​ປາຍ ທີ່​ບໍ່​ໄດ້​ຮຽນ​ຕໍ່ ໂດຍ​ການ​ປັບ­ປຸງ​ຫຼັກ­ສູດ​ໄລ ຍະ​ສັ້ນ ແລະ ໄລ­ຍະ​ຍາວ​ໃຫ້​ນັກ­ຮຽນ​ທີ່​ບໍ່​ຈົບ​ຊັ້ນ​ປະ­ຖົມ ຫຼື ຈົບ​ຊັ້ນ​ປະ­ຖົມ ແລະ ມັດ­ທະ­ຍົມ​ຕົ້ນ ເຊິ່ງ​ໄດ້​ເປີດ​ໂອ­ກາດ​ໃຫ້​ເຂົາ­ເຈົ້າ​ໄດ້​ເຂົ້າ​ມາ​ຮຽນ​ຄືນ ເຊັ່ນ: ໄລ­ຍະ 3 ເດືອນ 6 ເດືອນ 9 ເດືອນ ໂດຍ​ເນັ້ນ​ໃສ່​ພາກ​ປະ­ຕິ­ບັດ​ຕົວ​ຈິງ ເປີດ​ຮຽນ-ສອນ​ຢູ່​ທຸກໆ​ວິ­ທະ­ຍາ­ໄລ​ເຕັກ­ນິກ​ວິ­ຊາ​ຊີບ ແລະ ຢູ່​ບັນ­ດາ​ໂຮງ­ຮຽນ​ໃນ​ແຕ່​ລະ​ແຂວງ​ທົ່ວ​ປະ­ເທດ ເຊິ່ງ​ສາ­ມາດ​ເຮັດ​ໃຫ້​ນັກ­ຮຽນ​ທີ່​ຈົບ​ໄປ​ປະ­ກອບ​ອາ­ຊີບ​ດ້ວຍ​ຕົນ​ເອງ ເປັນ­ຕົ້ນ ຊ່າງ​ຕັດ­ຫຍິບ ການ​ຊ່າງ ສ້ອມ­ແປງ ປຸງ​ແຕ່ງ­ອາ­ຫານ ເສີມ​ຄວາມ​ງາມ ແລະ ປູກ­ຝັງ ລ້ຽງ­ສັດ.

ເມື່ອ​ກ່ອນ​ຄວາມ​ນິ­ຍົມ​ຂອງ​ນັກ­ຮຽນ ແລະ ຜູ້​ປົກ­ຄອງ ຫຼື ພໍ່-ແມ່​ນັກ­ຮຽນ ຢາກ​ໃຫ້​ລູກ​ຮຽນ​ຈົບ​ໄດ້​ຮັບ​ໃບ​ປະ­ກາ­ສະ­ນີ­ຍະ­ບັດ​ປະ­ລິນ­ຍາ​ຕີ ຫຼື ລະ­ດັບ​ມະ­ຫາ­ວິ­ທະ­ຍາ­ໄລ​ຂຶ້ນ​ໄປ ເຮັດ​ໃຫ້​ຫຼາຍ​ຄົນ​ທີ່​ຮຽນ​ຈົບ​ມາ​ບໍ່​ມີ​ວຽກ​ເຮັດ ປັດ­ຈຸ­ບັນ ການ​ສົ່ງ­ເສີມ​ວິ­ຊາ​ຊີບ​ເຫັນ​ວ່າ ມີ​ນັກ­ຮຽນ​ເຂົ້າ​ມາ​ສະ­ໝັກ​ຮຽນ​ອາ­ຊີ­ວະ​ຫຼາຍ​ຂຶ້ນ ເຮັດ​ໃຫ້​ຫໍ​ພັກ​ນັກ​ສຶກ​ສາ​ບາງ​ບ່ອນ​ບໍ່​ພຽງ­ພໍ ເພາະ​ຫຼັງ​ຈາກ​ຮຽນ​ຈົບ​ແລ້ວ​ເຂົາ­ເຈົ້າ​ກໍ​ສາ­ມາດ​ປະ­ກອບ​ອາ­ຊີບ​ໄດ້​ເລີຍ ການ​ສົ່ງ­ເສີມ​ວິ­ຊາ​ຊີບ​ໃນ​ຂະ­ແໜງ​ອາ­ຊີ­ວະ​ສຶກ​ສາ­ມີ​ຫຼັກ­ສູດ ການ​ຮຽນ-ການ​ສອນ ເປັນ​ຫຼັກ­ສູດ​ພື້ນ­ຖານ ທີ່​ເຮັດ​ໃຫ້​ນັກ­ຮຽນ​ອາ­ຊີ­ວະ​ສຶກ​ສາ​ໄດ້​ຮຽນ ປັດ­ຈຸ­ບັນ ໄດ້​ຮ່ວມ​ມື​ກັບ​ໂຮງ­ແຮມ ໂຮງ­ງານ​ຕ່າງໆ ສ້າງ​ຫຼັກ­ສູດ​ນຳ​ກັນ ໂດຍ​ສະ­ເພາະ ຮຽນ​ທິດ​ສະ​ດີ​ຢູ່​ໂຮງ­ຮຽນ​ແລ້ວ ຕ້ອງ​ໄດ້​ປະ­ຕິ­ບັດ​ຕົວ​ຈິງ​ຢູ່​ນຳ​ໂຮງ­ງານ ໂຮງ­ແຮມ ແລະ ສະ­ຖານ­ທີ່​ປະ­ກອບ​ການ​ຕ່າງໆ​ທີ່​ເຂົາ­ເຈົ້າ​ສະ­ໜອງ​ໃຫ້.

ຄຽງ​ຄູ່​ກັນ​ນີ້ ຍັງ​ມີ​ສິ່ງ​ທ້າ​ທາຍ​ກ່ຽວ​ກັບ​ວຽກ​ງານ​ອາ­ຊີ­ວະ​ສຶກ​ສາ ເປັນ­ຕົ້ນ ການ​ເຂົ້າ​ຫາ​ແຫຼ່ງ​ທຶນ ໂດຍ​ສະ­ເພາະ ນັກ­ຮຽນ​ທີ່​ຈົບ​ໄປ ແຕ່​ຈະ​ໄປ​ປະ­ກອບ​ອາ­ຊີບ​ດ້ວຍ​ຕົນ​ເອງ ເຊິ່ງ​ການ​ເຂົ້າ​ຫາ​ແຫຼ່ງ​ທຶນ​ເປັນ​ອຸ­ປະ­ສັກ​ຢ່າງ​ໃຫຍ່​ຫຼວງ ບາງ​ຄົນ​ມີ​ທຶນ​ຈາກ​ພໍ່-ແມ່ ແລະ ພີ່­ນ້ອງ​ສະ­ໜັບ­ສະ­ໜູນ​ທຶນ ກໍ​ສາ­ມາດ​ເຮັດ​ທຸ­ລະ​ກິດ ຫຼື ປະ­ກອບ​ການ​ໄດ້ ແຕ່​ນັກ­ຮຽນ​ທີ່​ທຸກ​ຍາກ​ຢູ່​ເຂດ​ຫ່າງ​ໄກ​ສອກ­ຫຼີກ​ບໍ່​ມີ​ທຶນ ເພື່ອ​ມາ​ປະ­ກອບ​ອາ­ຊີບ​ດ້ວຍ​ຕົນ​ເອງ ເປັນ­ຕົ້ນ ການ​ເຮັດ​ທຸ­ລະ​ກິດ​ຂະ­ໜາດ​ນ້ອຍ ເຖິງ​ຢ່າງ­ໃດ​ກໍ​ຕາມ ພວກ​ເຮົາ​ຈະ​ມີ​ການ​ສິດ­ສອນ​ແບບ​ໃດ ເພື່ອ​ໃຫ້​ເຂົາ­ເຈົ້າ​ໄດ້​ເຂົ້າ​ຫາ​ແຫຼ່ງ​ທຶນ.

ພາຍ­ຫຼັງ​ເຂົາ­ເຈົ້າ​ຮຽນ​ຈົບ​ແລ້ວ ບໍ່​ຕ້ອງ​ກັງ­ວົນ​ເລື່ອງ​ໄປ​ສະ­ໝັກ​ວຽກ​ນຳ​ສຳ­ນັກ­ງານ ອົງ­ການ​ລັດ ຫຼື ເອ­ກະ​ຊົນ ຕ້ອງ​ຄິດ​ວ່າ​ຈະ​ໄປ​ປະ­ກອບ​ການ​ແນວ­ໃດ ແລະ ຈະ​ເຂົ້າ​ຫາ​ແຫຼ່ງ​ທຶນ​ນັ້ນ​ໄດ້​ແນວ­ໃດ ສະ­ນັ້ນ ພວກ​ເຮົາ​ຕ້ອງ​ໄດ້​ຮ່ວມ​ມື​ກັບ​ຫຼາຍ​ພາກ­ສ່ວນ ໂດຍ​ສະ­ເພາະ ອົງ​ການ­ຈັດ­ຕັ້ງ​ສາ­ກົນ ເອ­ກະ​ຊົນ ເພື່ອ​ສະ­ໜັບ­ສະ­ໜູນ​ທຶນ­ຮອນ ເຂົ້າ​ໃນ​ຂະ­ແໜງ­ການ​ດັ່ງ­ກ່າວ​ໃຫ້​ນັບ​ມື້​ມີ​ການ​ພັດ­ທະ­ນາ​ດີ​ຂຶ້ນ ຕອບ​ສະ­ໜອງ​ດ້ານ​ສີ­ມື​ແຮງ​ງານ ແລະ ການ​ປະ­ກອບ​ອາ­ຊີບ​ດ້ວຍ​ຕົນ​ເອງ ຫຼັງ​ຈາກ​ຈົບ​ການ​ສຶກ​ສາ.

ທີ່ມາ: ໜັງສືພິມວຽງຈັນໃໝ່