ສຸດສະເທືອນໃຈ! ເອກົວດໍສູ້ວິກິດໂຄວິດບໍ່ໄຫວ ເລັ່ງເກັບສົບປະຊາຊົນຕາມແຄມທາງຈໍານວນຫຼາຍ

ສຸດສະເທືອນໃຈ! ເອກົວດໍສູ້ວິກິດໂຄວິດບໍ່ໄຫວ ເລັ່ງເກັບສົບປະຊາຊົນຕາມແຄມທາງຈໍານວນຫຼາຍ

5th April 2020 0 By Education

ເຈົ້າໜ້າທີ່ເອກົວດໍ ເລັ່ງຕາມເກັບສົບຜູ້ປ່ວຍທີ່ເສຍຊີວິດຈາກການຕິດເຊື້ອໂຄວິດ-19 ທີ່ນອນຕາຍຢູ່ຕາມທ້ອງຖະນົນຈໍານວນຫຼາຍ ມາໃສ່ຕູ້ຄອນເທນເນີ້ ຫຼັງຈາກລະບົບສາທາລະນະສຸກໃນເມືອງກົວຢາກິວ ສູນກາງການລະບາດແບກຮັບບໍ່ໄຫວອີກຕໍ່ໄປ.

ເມື່ອວັນທີ 5 ເມສາ 2020 ສໍານັກຂ່າວຕ່າງປະເທດ ແລະ ຣອຍເຕີ ລາຍງານສະຖານະການການລະບາດຂອງເຊື້ອໄວຣັດໂຄໂຣນາສາຍພັນໃໝ່ ຫຼື ໂຄວິດ-19 ໃນເອກົວດໍ ປະເທດຍາກຈົນໃນພາກຕາເວັນຕົກສ່ຽງເໜືອຂອງທະວີບອາເມລິກາໃຕ້ໄດ້ສ້າງຄວາມຫົດຫູ່ເສົ້າໃຈເປັນຢ່າງໜັກ ເນື່ອງຈາກປະສົບບັນຫາ ມີຜູ້ເສຍຊີວິດໂລກໂຄວິດ-19 ຈໍານວນຫຼາຍ ຈົນຫ້ອງເກັບສົບໃນໂຮງໝໍພື້ນທີ່ບໍ່ພຽງພໍ ຂະນະດຽວກັນ ເຈົ້າໜ້າທີ່ໃນໂຮງໝໍກໍ່ແບກຮັບການດູແລຮັກສາຜູ້ປ່ວຍຈໍານວນຫຼາຍບໍ່ໄຫວເຊັ່ນກັນ ຈົນເຮັດໃຫ້ຜູ້ປ່ວຍໂຄວິດ-19 ບໍ່ໄດ້ປິ່ນປົວໃນໂຮງໝໍ ແລະ ຕ້ອງເສຍຊີວິດຕາມທ້ອງຖະໜົນຈໍານວນຫຼາຍຢ່າງໜ້າສະເທືອນໃຈ ຈົນເຈົ້າໜ້າທີ່ທາງການຕ້ອງເລັ່ງຕາມເກັບສົບຂອງຜູ້ເສຍຊີວິດເຫຼົ່ານີ້.

ເຖິງຢ່າງໃດກໍ່ຕາມ ຣອຍເຕີລາຍງານວ່າ ເມື່ອວັນເສົາທີ່ຜ່ານມາ ທາງການເອກົວດໍ ໄດ້ເລີ່ມດໍາເນີນການຂົນຍ້າຍສົບຜູ້ເສຍຊີວິດໄປເກັບໄວ້ໃນຕູ້ຄອນເທນເນີ້ເຢັນຂະໜາດໃຫຍ່ແລ້ວ ຫຼັງຈາກມີຜູ້ເສຍຊີວິດຈາກໂຄວິດຈໍານວນຫຼາຍຮ້ອຍຄົນ ໃນເມືອງ ກົວຢາກິວ ເມືອງໃຫຍ່ທີ່ສຸດ ແລະ ມີປະຊາກອນຫຼາຍທີ່ສຸດໃນປະເທດ ປະມານ 2,29ລ້ານຄົນ.

ລັດຖະບານເອກົວດໍ ໄດ້ມີການຕັ້ງຕູ້ຄອນເທນເນີ້ເຢັນຂະໜາດໃຫຍ່ 3ຕູ້ ໂດຍມີຄວາມຍາວປະມານ 12ແມັດ ເຊິ່ງນໍາມາຕັ້ງໄວ້ໃນໂຮງໝໍເພື່ອເກັບສົບ ກ່ອນຈະນໍາຮ່າງໄຮ້ວິນຍານນັ້ນໄປປະກອບພິທີທາງສາສະໜາ ດ້ານຫົວໜ້າເຂດ ເມືອງກົວຢາກິວ ເຊິ່ງເປັນເມືອງສູນກາງການລະບາດຂອງເຊື້ອໂຄວິດໃນເອກົວດໍ ໂດຍພົບຜູ້ຕິດເຊື້ອ ແລະ ເສຍຊີວິດຫຼາຍທີ່ສຸດກວ່າເມືອງອື່ນ ກ່າວວ່າ: ຂະນະທີ່ມີຜູ້ຕິດເຊື້ອໂຄວິດໃນເມືອງຖືກນໍາໄປຝັງແລ້ວ ປະມານ 150ສົບ.

ທັງນີ້, ທາງການເອກົວດໍ ຢືນຢັນ ມີຜູ້ເສຍຊີວິດຈາກໂຄວິດ-19 ຢູ່ທີ່ 31ຂສົບ ເຮັດໃຫ້ປະເທດດັ່ງກ່າວກໍາລັງເປັນໜຶ່ງໃນປະເທດທີ່ມີຜູ້ເສຍຊີວິດຈາກພະຍາດນີ້ ຫຼາຍທີ່ສຸດໃນທະວີບອາເມລິກາໃຕ້ ແລະ ມີຜູ້ຕິດເຊື້ອ 3.465ລາຍ, ຂະນະທີ່ລັດຖະບານເອກົວດໍ ຄາດວ່າຈະມີຜູ້ເສຍຊີວິດໃນເມືອງກົວຢາກິວ ແລະ ແຂວງເພື່ອນບ້ານເຖິງ 3.500ສົບ ຈົນຕ້ອງມີການຕັ້ງແຄ້ມພິເສດສໍາລັບຝັງສົບຈໍານວນຫຼາຍ ອີກທັງເມື່ອວັນເສົາທີ່ຜ່ານມາ ລັດຖະບານເອກົວດໍ ຍັງໄດ້ເລີ່ມໃຊ້ລະບົບດິຈິຕອລແບບໃໝ່ ເພື່ອໃຫ້ສະມາຊິກໃນຄອບຄົວສາມາດຕິດຕາມຫາຍາດພີ່ນ້ອງທີ່ເສຍຊີວິດວ່າຖືກນໍາຕົວໄປຝັງໄວ້ຢູ່ໃສ.