ຫຼາຍປະເທດທະຍອຍນຳພົນລະເມືອງກັບຄືນຖິ່ນ

ຫຼາຍປະເທດທະຍອຍນຳພົນລະເມືອງກັບຄືນຖິ່ນ

6th April 2020 0 By Education

ນັບແຕ່ເລີ່ມກວດພົບເຊື້ອຜູ້ປ່ວຍໂຄວິດ-19ຢູ່ປະເທດເຮົາ ຫຼາຍປະເທດເພື່ອນມິດທີ່ມີພົນລະເມືອງຢູ່ ສປປ ລາວກໍ່ທະຍອຍຈັດສົ່ງພົນລະເມືອງຂອງຕົນກັບຄືນບ້ານເກີດເມືອງນອນ ເພື່ອຄວາມປອດໄພ ເຊິ່ງບາງປະເທດກໍ່ເໝົາຍົນມາເປັນລຳ ບາງກໍ່ເໝົາຍົນຂອງການບິນລາວນຳສົ່ງໃຫ້ຮອດຈຸດໝາຍ.

ຫຼ້າສຸດວັນທີ  6 ເມສາ 2020 ,ເຮືອບິນ ຊະນິດ Airbus A320 , ລັດວິສາຫະກິດການບີນລາວຖ້ຽວເໝົາລຳພິເສດ ກໍໄດ້ນໍາຄົນຍີ່ປຸ່ນທີ່ອາໄສ ຢູ່ ສປປລາວ ທີ່ປະສົງຢາກກັບປະເທດ , ຂຶ້ນບິນຈາກ ສະໜາມບິນ ສາກົນວັດໄຕ ນະຄອນຫຼວງວຽງຈັນ ເວລາ00:40ນາທີ ແລະ ຈະເຖິງ ສະໜາມບິນ ສາກົນ ນາຣິຕະ ,ນະຄອນຫຼວງໂຕກຽວ ເວລາ 8:00 ນາທີ.

ເຊັ່ນດຽວກັນກັບຖ້ຽວບິນພິເສດLX181 ,Swiss air ເຮືອບິນຊະນິດ Boeing 777,ຈາກ ຊູຣິກ -ບາງກອກ -ວຽງຈັນ , ເວລາ 14:00 ໄດ້ລົງສູ່ສະໜາມບິນ ສາກົນວັດໄຕ ຂອງວັນທີ 05 ເມສາ 2020 ຕາມເວລາໃນປະເທດລາວ ເຊິ່ງຖ້ຽວບິນພິເສດດັ່ງກ່າວໄດ້ປະຕິບັດພາລະກິດ ຮັບພົນລະເມືອງຂອງຕົນ ໃນ ສປປ ລາວ ທີ່ປະສົງຢາກກັບຄືນປະເທດ.

ແລະກ່ອນໜ້ານັ້ນໃນວັນທີ 02 ເມສາ 2020 ຢູ່ທີ່ສະໜາມບິນ ສາກົນວັດໄຕ ກໍ່ໄດ້ມີການຈັດສົ່ງ ຊາວ ເຢຍລະມັນ ທີ່ອາໄສ ຢູ່ ສປປ ລາວ ກັບຄືນປະເທດ, ໂດຍ ມີຜູ້ໂດຍສານຂຶ້ນເຮືອບິນ ທັງໝົດ 231 ຄົນ ຂຶ້ນບິນຈາກ ສະໜາມບິນວັດໄຕ ນະຄອນຫຼວງວຽງຈັນ ເຖິງສະໜາມບິນ ແຟຣງເຟີດ ປະເທດເຢຍລະມັນ ດ້ວຍສາຍການບິນ Condor Airlines.

.

ບໍ່ໝົດເທົ່ານັ້ນ ຣັດເຊຍເອງກໍ່ເໝົາລຳພິເສດມາຮັບເອົາພົນລະເມືອງຂອງຕົນທີ່ອາໄສໃນລາວກັບຄືນຖິ່ນຖານບ້ານເກີດເຊັ່ນດຽວກັນ ຕາມການເປີດເຜີຍໃນຕອນເຊົ້າ ວັນທີ 31 ມີນາ 2020 ຈາກສະຖານເອກອັກຄະລັດຖະທູດຣັດເຊຍປະຈໍາ ສປປ ລາວ ພາຍຫລັງທີ່ມີການກວດພົບຜູ້ຕິດເຊື້ອໂຄວິດ-19 ຈຳນວນ 9 ຄົນ.

ນອກນີ້ກໍ່ຍັງມີອີກຫຼາຍປະເທດທີ່ຈັດຖ້ຽວບິນພິເສດມາຮັບເອົາພົນລະເມືອງຂອງຕົນເຊັ່ນ: ປະເທດສະເປນ, ເກົາຫຼີໃຕ້  ແລະປະເທດອື່ນໆອີກ, ກໍບໍໄດ້ວ່າຫຍັງ ພົນລະເມືອງປະເທດໃຜກໍ່ຕ້ອງມີຄວາມເປັນຫ່ວງເປັນເລື່ອງທຳມະດາ ຂໍໃຫ້ທຸກທ່ານເດີນທາງກັບບ້ານດ້ວຍຄວາມສະຫວັດດີພາບ, ມື້ໜ້າພະຍາດເຊົາເຮົາພໍ້ກັນໃໝ່!!!