​ຕຳ​ນານ ພະພຸດທະຮູບອົງສະມະທິ ເມືອງເກົ່າສຸວັນນະໂຄມຄໍາ ແຂວງບໍ່ແກ້ວ

​ຕຳ​ນານ ພະພຸດທະຮູບອົງສະມະທິ ເມືອງເກົ່າສຸວັນນະໂຄມຄໍາ ແຂວງບໍ່ແກ້ວ

6th April 2020 0 By Entertain

ເມືອງເກົ່າສຸວັນນະໂຄມຄໍາ ຖືກສ້າງຂຶ້ນໃນປະມານ 1000 ປີກ່ອນ, ມີໄລຍະຫ່າງ ຈາກເທດສະບານແຂວງ ແຂວງບໍ່ແກ້ວ 40km, ໄລຍະຫ່າງຈາກເທດສະບານເມືອງຕົ້ນເຜິ້ງ 5km.

ເມືອງເກົ່າສຸວັນນະໂຄມຄຳອັນເປັນຊື່ກົກເຄົ້າຂອງນະຄອນບູຮານແຫ່ງນີ້ ທີ່ຜ່ານຂະບວນການ ຖືກທຳລາຍ ແລະ ການຟື້ນຟູຫຼາຍຄັ້ງຫຼາຍຫົນ ພາຍໃຕ້ຊື່ຕ່າງໆ ກວ່າຈະມາເຖິງສະພາບ ນະຄອນຮ້າງ ເຫຼືອໄວ້ແຕ່ເສດຮ່ອງຮອຍປະໄວ້.

ຕາມການສຳຫຼວດໃນເບື້ອງຕົ້ນ ໃນສະຖານທີ່ ປະມານ 10.000 ເຮັກຕາ ພົບວ່າມີ 44 ບູຮານສະຖານ ແລະ ຖານກໍ່ສ້າງດ້ວຍອິດ ແລະ ປະທາຍ. ອັນເປັນພຸດທະສີມມາ, ພະທາດ, ພະພຸດທະຮູບ, ນ້ຳສ້າງ ແລະ ສະຖານທີ່ອື່ນໆ.

ສິ່ງທີ່ຊົງຄວາມງົດງາມ ແລະ ຄວາມສະຫງ່າຕະການຕາ ອັນຍັງຫລົງເຫຼືອຈາກສີມືຂອງໂຈນປຸ້ນສົມບັດທັງລາວ ແລະ ໄທ ໃນສະໄໝກ່ອນນັ້ນ ອັນໄດ້ແກ່ ພະພຸດທະຮູບອົງສະມະທິ ທີ່ເຮັດດ້ວຍອິດ ແລະ ປະທາຍ, ເປັນພະພຸດທະຮູບອົງໃຫຍ່ ມີໜ້າຕັກກວ້າງ 7,10 ແມັດ, ລວງສູງ 7,22 ແມັດ (ບໍ່ນັບຍອດເກດ), ບ່າແຕ່ລະຂ້າງ 1,10 ແມັດ, ດ້ານຂ້າງ ແຕ່ກະໂພກຫາເຂົ່າ 3,60 ແມັດ,

ນັບວ່າເປັນພະພຸດທະຮູບອົງໜຶ່ງ ທີ່ໃຫຍ່ທີ່ສຸດຂອງປະເທດລາວ ແລະ ໃນຍ່ານອາຊີ ອາຄະເນ ຕາມຂະໜາດ ຂອງພະພຸດທະຮູບອົງນີ້ ໄດ້ສັນນິຖານວ່າ ແມ່ນ ພະພຸດທະຮູບປະຈຳທີ່ວັດພະຣາດຊະວັງ, ຮອດປະຈຸບັນນີ້ ຍັງເຫຼືອພຽງແຕ່ຮ່າງຄີງ, ສ່ວນພະຫັດ, ພະເກດ, ແຖ່ນ ແລະ ອື່ນໆ ໄດ້ຖືກຂຸດ, ເຈາະ, ກິດຫ້ຽນ ແລະ ກົ່ນເອົາຂອງດີໄປໝົດແລ້ວ.

ຮູບພາບຈາກ: Art And Culture of Laos , Miss Laos, ຊ່າງພາບ Houmphet Manisouk