ຕົວເລກເພີ່ມຂຶ້ນອີກແລ້ວ ພົບເພີ່ມ 1 ຜູ້ຕິດເຊື້ອໂຄວິດໃນລາວ

ຕົວເລກເພີ່ມຂຶ້ນອີກແລ້ວ ພົບເພີ່ມ 1 ຜູ້ຕິດເຊື້ອໂຄວິດໃນລາວ

6th April 2020 0 By Education

ບັນຫາການລະບາດຂອງເຊື້ອໂຄວິດຄົງບໍ່ຢຸດງ່າຍ ແຕ່ກຳລັງປະກົດໂຕໃນໄລຍະທີ່ພວກເຮົາຢຸດຢູ່ເຮືອນນີ້ ສະນັ້ນຈົ່ງສືບຕໍ່ປະຕິບັດຄຳສັ່ງຂອງທ່ານນາຍົກ ແລະພວກເຮົາຈະປອດໄພ. ຕາມຜົນການອັບເດດມື້ນີ້ ວັນທີ 6ເມສາ 2020 ພົບຜູ້ຕິດເຊື້ອເພີ່ມອີກ 1 ກໍລະນີ ຍອດລວມທັງໝົດຢູ່ທີ່ 12 ກໍລະນີ ຈາກການກວດຫາເຊື້ອທັງໝົດ 621 ຄົນ.

ໃນວັນທີ 6 ເມສາ 2020 ທີ່ກະຊວງສາທາລະນະສຸກ ໄດ້ຈັດພິທີຖະແຫຼງຂ່າວຕາມປົກກະຕິ ເພື່ອລາຍງານສະພາບການລະບາດຂອງພະຍາດໂຄວິດ-19 ເຊິ່ງມື້ນີ້ດຳເນີນການຖະແຫຼງໂດຍທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ພ້ອມຄະນະ .

ທ່ານ ຮສ.ດຣ ພູທອນ ເມືອງປາກ ໃຫ້ຮູ້ວ່າ: ໃນວັນທີ 5 ເມສາ 2020 ມີການເກັບຕົວຢ່າງກໍລະນີສົງໄສ ເພື່ອກວດຫາເຊື້ອທັງໝົດ 17 ຄົນ, ໃນນັ້ນ ນະຄອນຫຼວງ 12ຄົນ, ຕ່າງແຂວງ 5 ຄົນ ເຊິ່ງກວດພົບເຊື້ອ 1ຄົນ ເພດຍິງ ອາຍຸ 20 ປີ ອາໄສຢູ່ບ້ານນາໄຊ ເມືອງໄຊເສດຖາ ນະຄອນຫຼວງວຽງຈັນ.

ເຮັດໃຫ້ຍອດລວມທັງໝົດມີຜູ້ຕິດເຊື້ອໂຄວິດ-19 ໃນລາວທັງໝົດ 12 ຄົນ. ສ່ວນຍອດລວມການເກັບຕົວຢ່າງເພື່ອກວດຫາເຊື້ອ ມາຮອດປັດຈຸບັນມີທັງ 621 ຄົນ. ນອກຈາກນີ້ ຍັງຕ້ອງຕິຕາມຫາຜູ້ໃກ້ຊິດກັບຜູ້ຕິດເຊື້ອທັງໝົດອີກ 71 ຄົນ.