ຄິດຮອດຕ້ອງອົດເອົາ! ເຫັນໃຈຄົນໄກບ້ານ ຫຼັງຫຼາຍແຂວງເຂັ້ມງວດກວດຄົນເຂົ້າ-ອອກ ຕ້ານໂຄວິດ-19

ຄິດຮອດຕ້ອງອົດເອົາ! ເຫັນໃຈຄົນໄກບ້ານ ຫຼັງຫຼາຍແຂວງເຂັ້ມງວດກວດຄົນເຂົ້າ-ອອກ ຕ້ານໂຄວິດ-19

6th April 2020 0 By Education

ຫຼັງຈາກທີ່ລັດຖະບານໄດ້ປະກາດການຈັດຕັ້ງປະຕິບັດມາດຕະການເຂັ້ມງວດ ຄໍາສັ່ງນາຍົກເລກທີ 06/ນຍ ລົງວັນທີ 29 ມີນາ 2020 ເຮັດໃຫ້ທຸກແຂວງທົ່ວປະເທດຕ້ອງໄດ້ເຂັ້ມງວດເພື່ອປ້ອງກັນ, ສະກັດກັ້ນ ແລະ ຄວບຄຸມການລະບາດຂອງພະຍາດດັ່ງກ່າວດ້ວຍຫຼາຍວິທີທາງ ແຕ່ສິ່ງທີ່ເປັນໜຶ່ງດຽວນັ້ນຄືການຈໍາກັດຄົນເຂົ້າ-ອອກພາຍໃນແຂວງຂອງຕົນຢ່າງລະອຽດ ແລະ ການປະຕິບັດມາດຕະການຈໍາກັດບໍລິເວນ 14ວັນ.

ແນວໃດກໍ່ຕາມ ຈາກການຕິດຕາມຂໍ້ມູນຂ່າວສານຕ່າງໆ ແອັດສັງເກດເຫັນໄດ້ກ່ຽວກັບແຈ້ງການການຫ້າມຄົນນອກເດີນທາງເຂົ້າໄປໃນເຂດແຂວງຂອງຕົນ, ຫ້າມຈັດງານບຸນອັນເຮັດໃຫ້ມີຄົນຊຸມນຸມຈໍານວນຫຼາຍ ແລະ ອີກຫຼາຍໆແຈ້ງ ທັງໝົດນີ້ ລ້ວນແຕ່ເປັນສະກັດກັ້ນ, ກັນການລະບາດບໍ່ໃຫ້ໂຄວິດ-19 ແຜ່ລາມເປັນວົງກ້ວາງອອກ.

ແນ່ນອນວ່າ ໄລຍະນີ້ ເປັນຊ່ວງໃກ້ບຸນປີໃໝ່ລາວ ຫຼາຍຄົນທີ່ຢູ່ຫ່າງໄກບ້ານດ້ວຍຫຼາຍເຫດຜົນ ທັງອອກມາຮໍ່າຮຽນ ຫຼື ຫາເງິນຕ່າງໆນາໆ ແຕ່ຮອດປີໃໝ່ລາວຍາມໃດມັນຄືສັນຍານເຕືອນອັດຕະໂນມັດວ່າ ເຮົາຈະໄດ້ກັບໄປຫາຄອບຄົວທີ່ຮັກ ແຕ່ປີນີ້ຕ່າງຈາກປີຜ່ານມາ ຍ້ອນໂລກລະບາດນີ້ ເຮັດໃຫ້ທຸກຄົນຕ້ອງຢູ່ກັບທີ່ຫຼີກເວັ້ນການສັນຈອນໄປມາໂດຍບໍ່ຈໍາເປັນ ເພາະເຈົ້າອາດຈະກາຍເປັພາຫະນນໍາເຊື້ອໄປປ່ອຍໃສ່ຄົນໃນຄອບຄົວຂອງເຈົ້າເອງແບບບໍ່ຮູ້ໂຕກໍ່ເປັນໄດ້.

ແນວໃດກໍ່ຕາມ ແອັດເຊື່ອວ່າມີອີກຫຼາຍໆຄົນທີ່ຢາກຖືເອົາໂອກາດປີໃໝ່ນີ້ ສົມມາພໍ່ແມ່ ຫຼື ຜູ້ໃຫຍ່ຜູ້ມີພະຄົນຕໍ່ຕົນເອງ ເພື່ອສະແດງຄວາມກະຕັນຍູຮູ້ບຸນຄຸນ  ແຕ່ປີນີ້ ໃຫ້ຖືເອົາການຢູ່ຫ່າງກັນເປັນຂອງຂວັນ ຫຼື ສິ່ງທີ່ສະແດງໃຫ້ເຫັນເຖິງຄວາມເປັນຫ່ວງເປັນໄຍ ທີ່ມີໃຫ້ແກ່ພວກເພິ່ນເພື່ອຫ່າງໄກຈາກໂຄວິດແທນຈະດີກວ່າ.

ນອກຈາກນີ້, ສິ່ງທີ່ແອັດມິນຢາກຝາກໄວ້, ຂໍໃຫ້ທຸກຄົນເອົາໃຈໃສ່ປະຕິດບັດທຸກໆມາດຕະການທີ່ພາກລັດວາງອອກ ເພາະທຸກສິ່ງນັ້ນຄືການປົກປ້ອງໂຕທ່ານເອງ ແລະ ຄົນທີ່ທ່ານຮັກໃຫ້ລອດພົ້ນຈາກມັດຈຸລາດໂຕນີ້ ແລະ ໃຫ້ຄິດບວກໄວ້ ການທີ່ເຮົາບໍ່ໄດ້ກັບບ້ານໃນຍາມວິກິດແບບນີ້ ມັນຄືຄວາມໂຊກດີ ທີ່ຈະເຮັດໃຫ້ເຮົາລອດຊີວິດຈາກໄວຣັດນີ້ ເພື່ອກັບໄປຫາຄອບຄົວໄດ້ໃນປີຕໍ່ໆໄປ.