ແມ່ຄ້າຫົວແຂງ! ຂາຍຊີ້ນໝູເກີນລາຄາລັດກໍານົດ ຖືກການຄ້າສັ່ງສອນ ແລະມີພຽງຕະຫຼາດ 2ແຫ່ງທີ່ປະຕິບັດຕາມແຈ້ງການ

ແມ່ຄ້າຫົວແຂງ! ຂາຍຊີ້ນໝູເກີນລາຄາລັດກໍານົດ ຖືກການຄ້າສັ່ງສອນ ແລະມີພຽງຕະຫຼາດ 2ແຫ່ງທີ່ປະຕິບັດຕາມແຈ້ງການ

7th April 2020 0 By Education

ໃນໄລຍະທີ່ມີການລະບາດຂອງພະຍາດໂຄວິດ-19 ເຮັດໃຫ້ຄວາມຕ້ອງການບໍລິໂພກສິນຄ້າຂອງປະຊາຊົນມີຈໍານວນເພີ່ມຂຶ້ນຢ່າງເຫັນໄດ້ຊັດເຈນ ເຊິ່ງມັນກາຍເປັນຊ່ອງຫວ່າງໃຫ້ແມ່ຄ້າຫົວໃສຈໍານວສນໜຶ່ງສວຍໂອກາດຂຶ້ນລາຄາສິນຄ້າຕາ່ມລໍາພັງໃຈ. ຕໍ່ກັບບັນຫາດັ່ງກ່າວ ພາກສ່ວນກ່ຽວຂ້ອງກໍ່ບໍ່ໄດ້ນິ້ງນອນໃຈ ລົງກວດກາພື້ນທີ່ຕົວຈິງ ພ້ອມປັບໄໝແມ່ຄ້າທີ່ຝ່າຝືນ ບໍ່ປະຕິບັດຕາມແຈ້ງການຂອງພະແນກອຸດສາຫະກໍາ ແລະ ການຄ້າ ເຊິ່ງພົບມີຖຽງ 2ຕະຫຼາດເທົ່ານັ້ນ ຈາກ 8ຕະຫຼາດ ທີ່ຂາຍຊີ້ນໝູໃນລາຄາລັດກໍານົດ.

ຫຼັງຈາກທີ່ພະແນກອຸດສາຫະກໍາ ແລະ ການຄ້ານະຄອນຫຼວງວຽງຈັນ ໄດ້ອອກແຈ້ງການກໍານົດລາຄາຈໍາໜ່າຍສິນຄ້າ ໃນໄລຍະທີ່ມີການລະບາດຂອງພະຍາດໂຄວິດ-19, ເຊິ່ງໜຶ່ງໃນນັ້ນແມ່ນກໍານົດລາຄາຊີ້ນໝູຫ້າມເກີນ 40.000ກີບ/ກິໂລ ແຕ່ເມື່ອເຈົ້າໜ້າທີ່ລົງກວດກາຕົວຈິງກັບພົບພຽງ 2 ຕະຫຼາດ ຈາກ 8ຕະຫຼາດຫຼັກ ເທົ່ານັ້ນທີ່ຂາຍຊີ້ນໝູຕາມເພດານທີ່ລັດກໍານົດ.

ພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ອອກແຈ້ງການເລື່ອງ ແຈ້ງລາຄາ ໃນໄລຍະມີສະພາບການແຜ່ລະບາດພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ໂຄວິດ-19 ສະບັບເລກທີ 0653/ອຄ.ນວ.ຄພນ, ລົງວັນທີ 3 ເມສາ 2020 ໂດຍໄດ້ກໍານົດລາຄາຈໍາໜ່າຍສິນຄ້າຫຼາຍປະເພດໄວ້ ໜຶ່ງໃນນັ້ນແມ່ນກໍານົດຂາຍຍ່ອຍລາຄາຊີ້ນໝູ 40.000ກີບ / ກິໂລ, ຫຼ້າສຸດວັນທີ 7 ເມສາ 2020 ທີມຂ່າວເສດຖະກິດການຄ້າ ໄດ້ລົງພື້ນທີ່ຮ່ວມກັບເຈົ້າໜ້າທີ່ກ່ຽວຂ້ອງລົງກວດກາຕົວຈິງຕາມ 8ຕະຫຼາດຫຼັກໃນນະຄອນຫຼວງວຽງຈັນ ພົບພຽງ 2ຕະຫຼາດເທົ່ານັ້ນທີ່ຂາຍຊີ້ນໝູຕາມລາຄາທີ່ໄດ້ແຈ້ງການໄປກ່ອນໜ້ານີ້.

ທ່ານ ນັນຕາ ສຸນາວົງ ຮອງຫົວໜ້າພະແນກອຸດສາຫະກໍາ ແລະ ການຄ້າ ນະຄອນຫຼວງໃຫ້ຮູ້ວ່າ: ບັນດາຕະຫຼາດທີ່ພະແນກອຸດສາຫະກຳ ແລະການຄ້າ ນະຄອນຫຼວງວຽງຈັນ ລົງໄປສໍາຫຼວດກວດກາໃນຄັ້ງນີ້ ຫຼັກໆແມ່ນ 8ຕະຫຼາດໃຫຍ່ຄື ຕະຫຼາດໄຮຄໍາ, ໂນນຄໍ້, ໜອງຈັນ, ໂພນສະຫວ່າງ, ໂພນຕ້ອງຈອມມະນີ, ຫ້ວຍຫົງ, ສີໄຄ ແລະ ຕະຫຼາດລາວອົດຊີ ເຊິ່ງຈາກການເກັບກໍາຂໍ້ມູນຈາກຈັດສັນຕະຫຼາດ ພົບພຽງ 2ຕະຫຼາດເທົ່ານັ້ນທີ່ຂາຍຊີ້ນໝູໃນລາຄາລັດກໍານົດຄື ໜອງຈັນ ແລະ ລາວ-ອົດຊີ. ນອກຈາກນີ້ ຍັງໄດ້ປັບໄໝແມ່ຄ້າ 2ຫົວໜ່ວຍຢູ່ຕະຫຼາດໂນນຄໍ້ ທີ່ຂຶ້ນລາຄາສິນຄ້າຕາມລໍາພັງໃຈ.

ແນວໃດກໍ່ດີ ຮຽກຮ້ອງມາຍັງແມ່ຄ້າໃຫ້ປະຕິບັດຕາມແຈ້ງການຢ່າງເຂັ້ມງວດ, ເນື່ອງຈາກສິນຄ້າແຕ່ລະຊະນິດລ້ວນມີໂຄງປະກອບລາຄາ ກ່ອນຈະຂຶ້ນ ຫຼື ລົງຕ້ອງມີການສະເໜີໃຫ້ຄະນະຄຸ້ມຄອງລາຄາສິນຄ້າແຕ່ລະຂັ້ນຢ່າງລະອຽດ ຫາກບໍ່ປະຕິບັດຕາມກໍ່ຈະຕ້ອງໄດ້ປະຕິບັດຕາມລະບຽບກົດໝາຍທີ່ລັດຖະບານວາງອອກ.

ຂໍ້ມູນ: ຂ່າວເສດຖະກິດການຄ້າ