ຊົມເຊີຍ! ເຈົ້າໜ້າທີ່ ປກສ ແຂວງສະຫວັນນະເຂດ ເອົາໃຈໃສ່ເຮັດໜ້າທີ່ຕ້ານໂຄວິດ-19 ຢ່າງເຄັ່ງຄັດ

ຊົມເຊີຍ! ເຈົ້າໜ້າທີ່ ປກສ ແຂວງສະຫວັນນະເຂດ ເອົາໃຈໃສ່ເຮັດໜ້າທີ່ຕ້ານໂຄວິດ-19 ຢ່າງເຄັ່ງຄັດ

8th April 2020 0 By Education

ຫຼັງຈາກທີ່ຄໍາສັ່ງເລກທີ 06/ນຍ ໄດ້ອອກມາເຜີຍແຜ່ໃຫ້ທຸກຄົນໃນທົ່ວປະເທດໄດ້ຮັບຮູ້ ເຮັດໃຫ້ທຸກພາກສ່ວນໃນສັງຄົມລ້ວນເອົາໃຈໃສ່ໃນການຈັດຕັ້ງປະຕິບັດ ຢ່າງເຄັ່ງຄັດ ເຊັ່ນດຽວກັນກັບແຂວງສະຫວັນນະເຂດ ທີ່ເຈົ້າໜ້າທີ່ເລັ່ງອອກລາດຕະເວນກວດກາຄວາມເແປແັນລະບຽບຮຍບຮ້ອຍ ພ້ອມໂຄສະນາເຜີຍແຜ່ທຸກມາດຕະການໃຫ້ປະຊາຊົນໄດ້ຮັບຮູ້ຢ່າງທົ່ວເຖິງ.

ປັດຈຸບັນທຸກພາກສ່ວນ, ທຸກຂະແໜງການພາຍໃນແຂວງສະຫວັນນະເຂດ ຕ່າງກໍ່ເປັນເຈົ້າການນຳກັນໃນການຈັດຕັ້ງປະຕິບັດຄຳສັ່ງເລກທີ 06 ຂອງນາຍົກລັດຖະມົນຕີ ກໍ່ຄືຄຳສັ່ງແນະນຳຂອງທ່ານເຈົ້າແຂວງສະຫວັນນະເຂດ ວ່າດ້ວຍການເພີ່ມມາດຕະການສະກັດກັ້ນ, ປ້ອງກັນການລະບາດ ແລະ ກຽມຄວາມພ້ອມເພື່ອຕ້ານພະຍາດໂຄວິດ-19 ໂດຍປະຕິບັດຕາມຄຳສັ່ງແນະນຳສະບັບດັ່ງກ່າວຢ່າງເຄັ່ງຄັດ ທາງເຈົ້າໜ້າທີ່ຕຳຫຼວດຈະລາຈອນ ສົມທົບກັບເຈົ້າໜ້າທີ່ຫ້ອງຕຳຫຼວດ ປກສ ແຂວງ ແລະ ເຈົ້າໜ້າທີ່ຕຳຫຼວດນະຄອນໄກສອນ ພົມວິຫານ ໄດ້ເຮັດໜ້າທີ່ລາດຕະເວນໂຄສະນາ, ແຈ້ງການໃຫ້ປະຊາຊົນ,ຜູ້ປະກອບການ, ລວມທັງບຸກຄົນທົ່ວໄປ ໃຫ້ຢຸດຕິການສັນຈອນຕາມເສັ້ນທາງ,ຢຸດຕິການຄ້າຂາຍຕາມຮ້ານຄ້າຕ່າງໆເຂດເທດສະບານນະຄອນໄກສອນ ພົມວິຫານ ນັບແຕ່ເວລາ 20 ໂມງເປັນຕົ້ນໄປ.

ພ້ອມນີ້ເຈົ້າໜ້າຕຳຫຼວດຍັງເຮັດໜ້າທີ່ປ້ອງກັນເວນຍາມຢູ່ຕາມຈຸດຕ່າງໆໃນນະຄອນໄກສອນພົມວິຫານ ລວມທັງໝົດມີ 4 ຈຸດຄື: ຈຸດກວດກາທ່າອຸດົມ,ເສັ້ນທາງເລກ 9 ຈຸດກວດກາຫຼັກ 26,ຈຸດກວດກາບ້ານຫ້ວຍ ແລະ ຈຸດກວດກາບ້ານສົ້ມປ່ອຍ ເພື່ອກວດກາບໍ່ໃຫ້ມີການເຂົ້າ – ອອກບັນດາລົດໂດຍສານທຸກປະເພດ ເລີ່ມຈັດຕັ້ງປະຕິບັດແຕ່ວັນທີ 5 ຈົນຮອດວັນທີ 19 ເມສາ 2020 ທັງນີ້ກໍ່ເພື່ອເປັນການສະກັດກັ້ນ ແລະ ປ້ອງກັນການລະບາດຂອງພະຍາດໂຄວິດ-19. ນີ້ແມ່ນຄໍາໃຫ້ສໍາພາດຂອງຮ້ອຍໂທ ໄກສອນ ພົມມະລີ ເຈົ້າໜ້າທີ່ຕຳຫຼວດຈະລາຈອນແຂວງ ຮອງຫົວໜ້າຈຸດກວດກາທ່າອຸດົມ ໄດ້ໃຫ້ສຳພາດຕໍ່ຜູ້ສື່ຂ່າວວິທະຍຸກະຈາຍສຽງແຂວງຂອງພວກເຮົາໃນຄັ້ງວັນທີ 6 ເມສາ 2020 ນີ້.

ທັງນີ້ ທ່ານ ພັນໂທ ຄຳສີ ທູນທະວົງສັກ ຫົວໜ້າກອງບັນຊາການ ປກສ ນະຄອນໄກສອນ ພົມວິຫານ ໄດ້ໃຫ້ສຳພາດຕໍ່ຜູ້ສື່ຂ່າວວິທະຍຸກະຈາຍສຽງແຂວງພວກເຮົາວ່າ: ພາຍຫຼັງທີ່ໄດ້ຮັບຄຳສັ່ງເລກທີ 06 ຂອງນາຍົກລັດຖະມົນຕີ,ຄຳສັ່ງແນະນຳຂອງທ່ານເຈົ້າແຂວງ ກໍ່ຄຳສັ່ງຂອງເຈົ້ານະຄອນໄກສອນ ພົມວິຫານ ຈຶ່ງໄດ້ຈັດກຳລັງລົງຕັ້ງຈຸດກວດກາພາຍໃນເທດສະບານນະຄອນລວມມີ 3 ຈຸດຄື: ຈຸດກວດກາຖະໜົນພໍ່ກະດວດ,ຈຸດກວດກາຖະໜົນລາດຊະວົງເສິກ ແລະ ຈຸດກວດກາຖະໜົນສີສະຫວ່າງວົງ ໃນການຕັ້ງຈຸດກວດກາແມ່ນຈະໄດ້ເຮັດໜ້າທີ່ໂຄສະນາປະຊາສຳພັນໄປນຳກ່ຽວກັບລະບຽບການ,ຂໍ້ຫ້າມຕ່າງໆ ທີ່ນອນຢູ່ໃນຄຳສັ່ງ ວ່າດ້ວຍການເພີ່ມມາດຕະການສະກັດກັ້ນ,ປ້ອງກັນການລະບາດ ແລະ ກຽມຄວາມພ້ອມເພື່ອຕ້ານພະຍາດໂຄວິດ-19

ພາບ-ຂ່າວ: ອັກສອນສິນ ພົມມະຈັນ