ອັບເດດ 9ເມສາ! ພົບຜູ້ຕິດເຊື້ອໂຄວິດ-19 ເພີ່ມອີກ 1ຄົນ ເຮັດໃຫ້ຍອດລວມຢູ່ທີ່ ​16ຄົນແລ້ວ

ອັບເດດ 9ເມສາ! ພົບຜູ້ຕິດເຊື້ອໂຄວິດ-19 ເພີ່ມອີກ 1ຄົນ ເຮັດໃຫ້ຍອດລວມຢູ່ທີ່ ​16ຄົນແລ້ວ

9th April 2020 0 By Education

ໃນວັນທີ 9 ເມສາ 2020 ສາທາຢືນຢັນພົບຜູ້ຕິດເຊື້ອເພີ່ມອີກ 1 ຄົນ ເພດຍິງ ອາຍຸ 23 ປີ ຢູ່ບ້ານໜອງດ້ວງ ເມືອງຈັນທະບູລີ ນະຄອນຫຼວງວຽງຈັນ ເຄີຍໃີປະຫວັດໃກ້ຊິດສໍາຜັດກັບກໍລະນີທີ 10, ເຮັດໃຫ້ມາຮອດປັດຈຸບັນລວມຕົວເລກຜູ້ຕິດເຊື້ອທັງໝົດຢູ່ ສປປ ລາວ ມີ 16 ກໍລະນີ, ຈາກຜົນກວດຕົວຢ່າງທັງໝົດ 903 ຄົນໃນທົ່ວປະເທດ.

ໃນວັນທີ 9 ເມສາ 2020 ທີ່ກະຊວງສາທາລະນະສຸກ, ໄດ້ມີພິທີຖະແຫຼງຂ່າວ ກ່ຽວກັບສະພາບການແຜ່ລະບາດຂອງເຊື້ອພະຍາດໂຄວິດ-19 ຂຶ້ນໂດຍການໃຫ້ຖະແຫຼງຂອງ ທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ທັງເປັນຜູ້ປະຈຳການຄະນະສະເພາະກິດຄວບຄຸມພະຍາດໂຄວິດ-19 ພ້ອມດ້ວຍຄະນະ ແລະ ມີບັນດາສື່ມວນຊົນເຂົ້າຮ່ວມ.

ທ່ານ ຮສ.ດຣ ພູທອນ ເມືອງປາກ ໃຫ້ຮູ້ວ່າ: ວັນທີ 8 ເມສາ 2020 ໄດ້ເກັບຕົວຢ່າງມາກວດ 122 ຄົນ, ໃນນີ້ແມ່ນຜູ້ສຳພັດໃກ້ຊິດກັບຜູ້ຕິດເຊື້ອ ມີ 73 ຄົນ, ຈາກບໍລິສັດພູເບັຍມາຍນິງ 42, ແຮງງານລາວມາຈາກປະເທດໄທ 2, ກໍລະນີ ສົງໃສ 5, ໃນນີ້ ພົບຜູ້ຕິດເຊື້ອ 1 ຄົນ ເປັນເພດຍິງ ອາຍຸ 23 ປີ, ນັກສຶກສາຢູ່ວິທະຍາໄລລັດຕະນະ, ບ້ານໜອງດ້ວງ, ເມືອງ ສີໂຄດຕະບອງ, ນະຄອນຫຼວງວຽງຈັນ ເຊິ່ງຜູ້ກ່ຽວມີປະຫວັດໃກ້ຊິດສໍາຜັດກັບຜູ້ຕິດເຊື້ອກໍລະນີທີ 10 ພະນັກງານໃນບໍລິສັດ DHL.

ດັ່ງນັ້ນ, ນັບແຕ່ເດືອນ ມັງກອນ ຮອດ ວັນທີ 8 ເມສາ 2020 ໄດ້ເກັບຕົວຢ່າງມາກວດຫາເຊື້ອທັງໝົດ 903 ຄົນ, ພົບຕິດເຊື້ອ ທັງໝົດ 16 ຄົນ. ດ້ານສະຖານະການທົ່ວໂລກ ປັດຈຸບັນມີ 209 ປະເທດທີ່ມີການແຜ່ລະບາດຂອງເຊື້ອພະຍາດໂຄວິດ-19 ແລະ ມາຮອດຕອນບ່າຍຂອງວັນທີ 9 ເມສາ 2020 ມີຕົວເລກຜູ້ຕິດເຊື້ອທັງໝົດ 1.519.195 ຄົນ, ເສຍຊີວິດ 88.529 ຄົນ ແລະ ປິ່ນປົວຫາຍດີ ຈຳນວນ 330.860 ຄົນ.

ຂອບໃຈຮູບພາບ: ຂ່າວເສດຖະກິດການຄ້າ