ມາອີກແຈ້ງການ! ເມືອງພຽງປະກາດລະດົມທຶນຢ່າງຕໍ່າຜູ້ລະ 10ພັນກີບ ເພື່ອຊ່ວຍຕ້ານໂຄວິດ-19

ມາອີກແຈ້ງການ! ເມືອງພຽງປະກາດລະດົມທຶນຢ່າງຕໍ່າຜູ້ລະ 10ພັນກີບ ເພື່ອຊ່ວຍຕ້ານໂຄວິດ-19

10th April 2020 0 By Education

ເປັນກະແສກັນຫຼາຍສົມຄວນສໍາລັບປະກາດແຈ້ງການລະດົມທຶນຈາກປະຊາຊົນໃນຊ່ວງວິກິດແບບນີ້ເຊິ່ງມື້ວານນີ້ວັນທີ 8 ເມສາ 2020 ໄດ້ມີແຈ້ງການຈາກເມືອງໄຊເສດຖາ ນະຄອນຫຼວງວຽງຈັນໃນການເຮັດບັດເຂົ້າ-ອອກເມືອງແຕ່ຕ້ອງຈ່າຍເງິນຄ່າເຮັດບັດ ເຊິ່ງມັນກາຍເປັນສຽງວິພາກວິຈານໄປຕ່າງໆນາໆ ແລະ ແຈ້ງການດັ່ງກ່າວຖືກຍົກເລີກໄປແລ້ວ, ແຕ່ມື້ນີ້ປາກົດເຫັນອີກຄັ້ງເປັນແຈ້ງການຈາກເມືອງພຽງ ແຂວງໄຊຍະບູລີ ປະກາດຂໍລະດົມທຶນຈາກພະນັກງານ, ທະຫານ, ຕໍາຫຼວດ, ລັດວິສາຫະກິດທົ່ວເມືອງຂັ້ນຕໍ່າ 10ພັນກີບ.

ໂດຍແຈ້ງການດັ່ງກ່າວຖືກນໍາມາເຜີຍແຜ່ໃນສື່ສັງຄົມອອນລາຍໃນມື້ນີ້ວັນທີ 10 ເມສາ 2020 ແຕ່ແຈ້ງການດັ່ງກ່າວແມ່ນຂໍເລີ່ມລະດົມທຶນມາແຕ່ວັນທີ 7 ເມສາ 2020 ໂດຍເນັ້ນໃສ່ການເກັບຈາກຄະນະປະຈໍາພັກເມືອງ ຜູ້ລະ 1ແສນກີບ, ຈາກພະນັກງານລັດຖະກອນ, ທະຫານ, ຕໍາຫຼວດ, ລັດວິສາຫະກິດ ຜູ້ລະ 10ພັນກີບ.

ແນວໃດກໍຕາມໃນສະພາບທີ່ປະເທດພົບວິກິແບບນີ້ ແອັດເອງກໍ່ເຂົ້າໃຈທຸກພາກສ່ວນ ໃນການຕ້ອງນໍາໃຊ້ທຶນຮອນເພື່ອປະກອບເຂົ້າໃນວຽກງານການສະກັດກັ້ນການລະບາດຂອງພະຍາດໂຄວິດ-19 ແຕ່ໃນວິກິດແບບນີ້ທຸກຄົນລ້ວນໄດ້ຮັບຜົນກະທົບຕ້ອງໄດ້ຊ່ວຍເຫຼືອເຊິ່ງກັນແລະກັນ ດັ່ງນັ້ນ, ມັນອາດກາຍເປັນການຊໍ້າເຕີມຄວາມທຸກຍາກກັນຫຼືບໍ່ຫາກຕ້ອງມີລາຍຈ່າຍເພີ່ມໃນສະພາບແບບນີ້ ການຊ່ວຍເຫຼືອ ຫຼື ບໍລິຈາກຄວນມາຈາກຄວາມສະໝັກໃຈຂອງຜູ້ກ່ຽວເອງ.