ພັກຕໍ່ອີກສອງອາທິດ ເພື່ອຕ້ານໂຄວິດຢ່າງຈີງຈັງ

ພັກຕໍ່ອີກສອງອາທິດ ເພື່ອຕ້ານໂຄວິດຢ່າງຈີງຈັງ

15th April 2020 0 By Entertain

ທ່ານ ທອງລຸນ ສີສຸລິດ, ນາຍົກລັດຖະມົນຕີ, ໄດ້ຖະແຫຼງຂ່າວຕໍ່ສື່ມວນຊົນລາວ ໃນວັນທີ 15 ເມສາ 2020 ນີ້ກ່ຽວກັບສະພາບການສະກັດກັ້ນ ແລະ ຕ້ານການແຜ່ລະບາດ ຂອງພະຍາດ COVID-19 ຢູ່ ສປປ ລາວ ໂດຍລະບຸວ່າການຕໍ່ສູ້ກັບສັດຕູຕົວຮ້າຍຈາກພະຍາດໂຄວິດ-19 ຍັງບໍ່ທັນຈົບລົງເທື່ອ ຂໍໃຫ້ທຸກໆຄົນໃນທົ່ວສັງຄົມ ສືບຕໍ່ປະຕິບັດຢ່າງເຂັ້ມງວດ ແລະ ຖືກຕ້ອງຕາມຄຳສັ່ງ ເລກທີ 06/ນຍ ຈະແກ່ຍາວໄປ ຕື່ມອີກ 14 ວັນ ຈົນຮອດວັນທີ 03 ພຶດສະພາ 2020, ຖ້າມີການປ່ຽແປງແນວໃດ ຈຶ່ງແຈ້ງຕາມທີ່ຫຼັງ.

ໃນຖະແຫຼງຂ່າວ ທ່ານນາຍົກລັດຖະມົນຕີໄດ້ກ່າວບາງຕອນວ່າ: ໃນນາມລັດຖະບານ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ, ຂ້າພະເຈົ້າ ຂໍແຈ້ງໃຫ້ພໍ່ແມ່ພີ່ນ້ອງປະຊາຊົນລາວ ຊາບຢ່າງທົ່ວເຖິງກັນວ່າ: ພະຍາດອັກເສບປອດສາຍພັນໃໝ່ “ໂຄວິດ-19” ກຳລັງເປັນໄພຄຸກຄາມໃນທຸກໆປະເທດໃນໂລກ ແລະ ແຜ່ລະບາດ ດ້ວຍຈັງຫວະໄວ ແລະ ເພີ່ມຄວາມຮຸນແຮງ ຂຶ້ນຊັກໄຊ້. ມາຮອດມື້ນີ້, ໂຄວິດ-19 ໄດ້ຂ້າຊີວິດຂອງຄົນໄປແລ້ວ ເປັນແສນໆ ແລະ ກໍາລັງ ມີຜູ້ຕິດເຊື້ອ ເປັນລ້ານກວ່າຄົນ ແລະ ກຳລັງ ເພີ່ມຈຳນວນຂຶ້ນເລື້ອຍໆ ໃນແຕ່ລະຊົ່ວໂມງ ແລະ ຍັງບໍ່ຮູ້ໄດ້ວ່າ ເວລາໃດພວກເຮົາຈຶ່ງຈະສາມາດຢັບຢັ້ງ ແລະ ຢຸດຕິມັນໄດ້.

ກອງປະຊຸມສຸດຍອດ ສະໄໝພິເສດ ຂອງບັນດາຜູ້ນຳອາຊຽນ ແລະ ອາຊຽນ ບວກ ສປ ຈີນ, ສ ເກົາຫລີ ແລະ ຢີ່ປຸ່ນ ໂດຍຜ່ານລະບົບສື່ສານທາງໄກ (Video Conference) ທີ່ເປັນຄວາມຄິດລິເລີ່ມຂອງ ສາທາລະນະລັດ ສັງຄົມນິຍົມຫວຽດນາມ ໃນຖານະປະທານອາຊຽນ ໄດ້ໄຂຂຶ້ນ ແລະ ສໍາເລັດລົງໃນມື້ວານນີ້. ບັນດາຜູ້ນໍາອາຊຽນ ແລະ ອາຊຽນ ບວກ 3 ໄດ້ປຶກສາຫາລືກັນຢ່າງຈິງຈັງ ແລະ ໄດ້ເຫັນດີເປັນເອກະພາບກັນສູງ ຮັບເອົາມາດຕະການຕ່າງໆເພື່ອຕໍ່ສູ້ກັບໂຄວິດ-19 ທັງຢູ່ແຕ່ລະປະເທດ ທັງມີການຮ່ວມມືກັນລະຫວ່າງອາຊຽນ ແລະ ອາຊຽນ ບວກ 3. ບັນດາຜູ້ນຳຂອງ 13 ປະເທດ ໄດ້ໃຫ້ຄວາມສໍາຄັນສູງສຸດ ຕໍ່ໄລຍະຫົວລ້ຽວຫົວຕໍ່ນີ້ ໂດຍໄດ້ອອກຖະແຫຼງການຮ່ວມ ຂອງກອງປະຊຸມສໍາຄັນນີ້ດ້ວຍ.

ມື້ນີ້, ຂ້າພະເຈົ້າ ແລະ ການນຳຂອງລັດຖະບານ ໄດ້ຮັບລາຍງານ ຈາກຄະນະສະເພາະກິດຂັ້ນສູນກາງ ກ່ຽວກັບສະພາບການລະບາດຂອງ ໂຄວິດ-19 ໃນທົ່ວປະເທດ ແລະ ການຕີລາຄາ, ທົບທວນຜົນຂອງການປະຕິບັດຄຳສັ່ງ ສະບັບເລກທີ 06/ນຍ, ລົງວັນທີ 29 ມີນາ 2020 ນີ້. ໃນ 2 ອາທິດ ທີ່ຜ່ານມາ… ຂ້າພະເຈົ້າ ຮັບຮູ້ຢ່າງເລິກເຊີ່ງວ່າ: ພາຍໃຕ້ການນຳພາ-ຊີ້ນຳ ຂອງຄະນະພັກທຸກຂັ້ນ ແລະ ການອໍານວຍຄວບຄຸມຂອງອໍານາດການປົກຄອງຂັ້ນຕ່າງໆ ແຕ່ສູນກາງຮອດທ້ອງຖິ່ນ, ການປະຕິບັດຄໍາສັ່ງໄດ້ດໍາເນີນໄປຢ່າງຂຸ້ນຂ້ຽວ ແລະ ມີປະສິດທິຜົນດີ, ທຸກໆຄົນໃນສັງຄົມ ໄດ້ເຂົ້າຮ່ວມ ແລະ ຮັບຜິດຊອບ ຕາມພາລະບົດບາດຂອງຕົນເອງ, ສ້າງໄດ້ຂະບວນການທີ່ເປັນຮູບປະທໍາຢ່າງແທ້ຈິງ, ຍ້ອນເຫັນໄດ້ຄວາມສໍາຄັນ ແລະ ຄວາມຈໍາເປັນພາວະວິໄສ ຂອງບັນດາມາດຕະການ ຂອງຄຳສັ່ງສະບັບນີ້ ຊຶ່ງທຸກໆອົງການຈັດຕັ້ງແຕ່ເທິງລົງລຸ່ມ ໄດ້ຜັນຂະຫຍາຍຢ່າງມີຄວາມຮັບຜິດຊອບ ແລະ ປະດິດສ້າງໄປໃນທາງທີ່ຖືກຕ້ອງ ແລະ ເປັນເອກະພາບກັນ.

ແນວໃດກໍ່ຕາມຂ້າພະເຈົ້າ ຂໍຮຽນມາຍັງທຸກໆທ່ານ ໃຫ້ຊາບວ່າ ສະໜາມຮົບແຫ່ງສົງຄາມການຕ້ານສັດຕູໂຕຮ້າຍກາດ ໂຄວິດ-19 ຍັງບໍ່ທັນຈົບລົງເທື່ອ ຫາກຍັງເປັນໄປໄດ້ວ່າ ຈະດຸເດືອດ, ຂ້ຽວຂາດກວ່ານີ້ກໍເປັນໄດ້, ເພາະປະເທດເຮົາ ແລະ ປະຊາຊົນເຮົາ ຍັງຢືນຢູ່ຕໍ່ຫນ້າຄວາມສ່ຽງຫຼາຍດ້ານ ທີ່ຈະປະເຊີນໃນວັນຕໍ່ໜ້າທີ່ຈະມາເຖິງນີ້.

ດັ່ງນັ້ນ, ຂ້າພະເຈົ້າ, ໃນນາມຕາງໜ້າລັດຖະບານ ຈຶ່ງຂໍໃຫ້ທຸກໆຄົນໃນທົ່ວສັງຄົມ ສືບຕໍ່ປະຕິບັດຢ່າງເຂັ້ມງວດ ແລະ ຖືກຕ້ອງຕາມຄຳສັ່ງ ເລກທີ 06/ນຍ, ລົງວັນທີ 29 ມີນາ 2020, ບັນດານິຕິກໍາ, ຂໍ້ແນະນໍາ ຂອງຄະນະສະເພາະກິດ ໃນການປ້ອງກັນ, ສະກັດກັ້ນ ແລະ ແກ້ໄຂ ການລະບາດຂອງ COVID-19 ຈະແກ່ຍາວໄປ ຕື່ມອີກ 14 ວັນ ຈົນຮອດວັນທີ 03 ພຶດສະພາ 2020, ຖ້າມີການປ່ຽແປງແນວໃດ ຈຶ່ງແຈ້ງຕາມທີ່ຫຼັງ.