ໜ້າເສົ້າ! ປີໃໝ່ລາວປີນີ້ ທົ່ວນະຄອນຫຼວງວຽງຈັນ ມີຜູ້ເສຍຊີວິດຍ້ອນອຸບັດເຫດ 4 ຄົນ ແຕ່ຖ້າທຽບປີຜ່ານມາ ຖືວ່າຫຼຸດລົງ

ໜ້າເສົ້າ! ປີໃໝ່ລາວປີນີ້ ທົ່ວນະຄອນຫຼວງວຽງຈັນ ມີຜູ້ເສຍຊີວິດຍ້ອນອຸບັດເຫດ 4 ຄົນ ແຕ່ຖ້າທຽບປີຜ່ານມາ ຖືວ່າຫຼຸດລົງ

17th April 2020 0 By Education

ດັ່ງທີ່ຮູ້ກັນແລ້ວວ່າປີໃໝ່ລາວປີນີ້ ລັດຖະບານໄດ້ອອກຈຂໍ້ຫ້າມ ຫ້າມຈັດງານສັງສັນຕ່າງໆ ທີ່ມີຜູ້ຄົນເຂົ້າຮ່ວມຈໍານວນຫຼາຍເດັດຂາດ ເພື່ອປ້ອງກັນການແຜ່ລະບາດຂອງພະຍາດໂຄວິດ-19, ແຕ່ອີກມຸມໜຶ່ງຄໍາສັ່ງດັ່ງກ່າວຍັງສະແດງໃຫ້ເຫັນໃນການຫຼຸດຜ່ອນການຊຸມແຊວກິນດື່ມສິ່ງຂອງມືນເມົາ ອັນທີ່ຈະພາໃຫ້ເກີດອຸບັດເຫດ ນໍາມາຊຶ່ງຄວາມສູນເສຍທັງຊີວິດ ແລະ ຊັບສິນ. ແຕ່ແນວໃດກໍ່ຕາມ ປີໃໝ່ລາວປີນີ້ ທົ່ວນະຄອນຫຼວງວຽງຈັນກໍ່ຍັງມີອຸບັດເຫດເກີດຂຶ້ນ ທີ່ເຮັດໃຫ້ມີຜູ້ເສຍຊີວິດເຖິງ 4 ຄົນ.

ວັນທີ 17 ເມສາ 2020 ເຈົ້າໜ້າທີ່ພະແນກຕຳຫຼວດຈະລາຈອນນະຄອນຫຼວງວຽງຈັນ ແຈ້ງໃຫ້ ຊາບວ່າ: ໄລຍະສົ່ງທ້າຍປີເກົ່າ ພສ 2562 ແລະ ຕ້ອນຮັບປີໃໝ່ລາວ ພສ 2563 (ນັບແຕ່ວັນທີ 13 ຫາ 16 ເມສາ 2020) ທົ່ວນະຄອນຫຼວງວຽງຈັນມີອຸບັດເຫດທາງຖະໜົນເກີດຂຶ້ນທັງໝົດ 11 ກໍລະນີ ມີຜູ້ເສຍຊີວິດຈຳນວນ 4 ຄົນ ທຽບໃສ່ປີຜ່ານມາ ການເກີດອຸບັດເຫດແມ່ນຫຼຸດ 9 ກໍລະນີ ແລະ ຜູ້ເສຍຊີວິດກໍຫຼຸດລົງເຊັ່ນດຽວກັນ 1 ຄົນ.

ໃນການເກີດອຸບັດເຫດດັ່ງກ່າວ ເຮັດໃຫ້ມີພາຫະນະເປ່ເພເລັກໜ້ອຍ 5 ຄັນ, ສົມຄວນ 17 ຄັນ ແລະ ມີຄົນໄດ້ຮັບບາດເຈັບເລັກໜ້ອຍ 4 ຄົນ ສົມຄວນ 11 ຄົນ ສາຫັດ 1 ຄົນ ສໍາລັບຄົນຂັບໄດ້ຮັບບາດເຈັບເລັກໜ້ອຍ 1 ຄົນ ສົມຄວນ 6 ຄົນ ສາຫັດ 1 ຄົນ ເສຍຊີວິດ 4 ຄົນ ສ່ວນຜູ້ຊ້ອນທ້າຍຮັບບາດເຈັບເລັກໜ້ອຍ 3 ຄົນ ເມືອງທີ່ເກີດອຸບັດເຫດຫຼາຍກວ່າໝູ່ແມ່ນໄຊທານີ ເຊິ່ງເກີດຢູ່ໃນກຸ່ມອາຊີບກໍາມະກອນເປັນສ່ວນຫຼາຍ.

ທີ່ມາ: ວຽງຈັນໃໝ່