ເຕືອນງົດການຫອມແກ້ມລູກໄລຍະນີ້ ປ້ອງກັນໂຄວິດ

ເຕືອນງົດການຫອມແກ້ມລູກໄລຍະນີ້ ປ້ອງກັນໂຄວິດ

18th April 2020 0 By Education

ເວົ້າເຖິງລູກນ້ອຍຜູ້ໃດເຫັນແລ້ວຊິບໍຢາກຢິກບໍ່ຢາກຫອມ ແຕ່ທ່ານຮູ້ບໍທ່າມກາງການລະບາດຂອງພະຍາດລະບາດໂຄວິດ19 ມັນມີຄວາມສ່ຽງຫຼາຍ ຖ້າວັນໜຶ່ງລູກເປັນຜູ້ໂຊກຮ້າຍພະຍາດນີ້ບໍອະນຸຍາດໃຫ້ໃຜເຂົ້າໃກ້ນອກຈາກໝໍ ແລ້ວໃຜຈະເປັນຄົນປ້ອນເຂົ້າປ້ອນນົມໃຫ້ຢາລູກນ້ອຍ? ນຶກເຖິງຈຸດນີ້ຂຶ້ນມາ ທຸກຄົນຄວນງົດການຫອມແກ້ມລູກ ແລະເຊົາພາລູກໆໄປເລາະໄປທ່ຽວບ່ອນທີ່ມີຄົນໄປເປັນຈຳນວນຫຼາຍ ເພາະບໍ່ມີໃຜຮູ້ທຸກຄົນຈະປອດໄພຫຼືບໍ?

ຈາກການເຕືອນຂອງແພດໝໍ ການລະບາດຂອງພະຍາດໂຄວິດ-19 ນັ້ນ ນອກຈາກແມ່ຍິງຖືພາ, ແມ່ຍິງເກີດລູກໃໝ່ ແລ້ວເດັກນ້ອຍກໍ່ແມ່ນກຸ່ມທີ່ມີຄວາມສ່ຽງສູງໃນການຕິດເຊື້ອ ສະນັ້ນຕ້ອງໃຫ້ຄວາມສຳຄັນໃນການປ້ອງກັນເຝົ້າລະວັງເປັນພິເສດ ໂດຍສະເພາະພໍ່ແມ່ຜູ້ລ້ຽງເດັກຕ້ອງໝັ່ນລ້າງມືໃສ່ສະບູ, ເຈວລ້າງມືກ່ອນສຳຜັດເດັກນ້ອຍ ສວມໃສ່ໜ້າກາກອະນາໄມຈະດີທີ່ສຸດ. ຫາກຜູ້ລ້ຽງເດັກມີອາການບໍ່ສະບາຍກໍ່ຕ້ອງຢູ່ໃຫ້ຫ່າງລູກນ້ອຍເອົາໄວ້.

ສຳຄັນກວ່ານັ້ນເດັກນ້ອຍເກີດໃໝ່ຖ້າບໍ່ຈຳເປັນຢ່າພາອອກຈາກເຮືອນ ຍົກເວັ້ນແຕ່ການພາໄປຊີດຢາວັກຊີນຕາມກຳນົດ ຫຼື ໄປພົບແພດເມື່ອມີອາການປ່ວຍ ໂດຍແນະນຳໃຫ້ອຸ້ມລູກນ້ອຍໄວ້ແນບກັບເອີກ ຫຼື ໃສ່ລໍ້ຍູ້ມີຜ້າຄຸມປິດໄວ້ ພ້ອມເວັ້ນໄລຍະຫ່າງຈາກຜູ້ຄົນຢ່າງໜ້ອຍ 2 ແມັດ ແລະໃຫ້ງົດການຫອມແກ້ມເດັກແບບໃກ້ຊິດຈົນເກີນໄປ.


ນອກຈາກນັ້ນແລ້ວ ເດັກໃນໄວ 0-1 ປີແມ່ນບໍ່ຄວນສວມໜ້າກາກອະນາໄມໃຫ້ ເນື່ອງຈາກລະບົບຫາຍໃຈຍັງບໍ່ທັນແຂງແຮງພໍ ສ່ຽງຕໍ່ພາວະຄາບອນໄດອັອກໄຊ ເພາະເດັກນ້ອຍຍັງຫາຍໃຈທາງດັງເປັນຫຼັກ ແລະບໍ່ທັນຮູ້ວິທີການຫາຍໃຈທາງປາກແທນ ເມື່ອມີການຂາດອາກາດ ຫຼື ອົກຊີເຈນຈະເຮັດໃຫ້ເກີດອັນຕະລາຍຕໍ່ລະບົບປະສາດໄດ້.


ສ່ວນເດັກອາຍຸ 1-2 ປີບາງຄົນສາມາດສວມໃຫ້ໜ້າກາກອະນາໄມໄດ້ ເພາະສາມາດຖອດອອກເອງເມື່ອຮູ້ສຶກອຶດອັດ ແຕ່ກໍ່ຄວນລະວັງ ແລະຍົກເວັ້ນເດັກທີ່ມີກ້າມເນື້ອອ່ອນແຮງ ຫຼື ເດັກທີ່ມີຄວາມພົກພ່ອງທາງສະໝອງ ພໍ່ແມ່ຕ້ອງລະມັດລະວັງເປັນພິເສດ.
ບໍ່ພຽງເທົ່ານັ້ນ ພໍ່ແມ່ຕ້ອງໝັ້ນລ້າງມືໃຫ້ລູກນ້ອຍເພາະເດັກນ້ອຍມັກຍິກເຄື່ອງຫຼິ້້ນຢູ່ຕະຫຼອດ ອາດເຮັດໃຫ້ມືສຳຜັດກັບເຊື້ອໂຣກໄດ້.