ຍິນດີນໍາເດີ້! ແຮງງານຢູ່ສູນກັກກັນ ນະຄອນຫຼວງວຽງຈັນ ຈຳນວນໜຶ່ງໄດ້ກັບບ້ານແລ້ວ

ຍິນດີນໍາເດີ້! ແຮງງານຢູ່ສູນກັກກັນ ນະຄອນຫຼວງວຽງຈັນ ຈຳນວນໜຶ່ງໄດ້ກັບບ້ານແລ້ວ

18th April 2020 0 By Education

ອີກໜຶ່ງຂ່າວດີ ນອກຈາກລາວ້ຮົາບໍ່ພົບຜູ້ຕິດເຊື້ອໂຄວິດ-19 ເພີ່ມ ເປັນ ເວລາ 6ມື້ແລ້ວນັ້ນ ແມ່ນຂ່າວທີ່ແຮງງານລາວຈໍານວນໜຶ່ງທີ່ຖືກກັກກັນຢູ່ບັນດາສູນກັກກັນຕ່າງໆ ໃນທົ່ວປະເທດນັ້ນ ເລີ່ມທະຍອຍໄດ້ກັບບ້ານ ຫຼັງຄົບ 14ວັນແລ້ວ, ຫຼ້າສຸດ ແຮງງານຈໍານວນໜຶ່ງທີ່ຢູ່ສູນກັກກັນບາງແຫ່ງໃນນະຄອນຫຼວງວຽງຈັນ ກໍ່ກໍາລັງທະຍອຍໄດ້ກັບບ້ານແລ້ວເຊັ່ນກັນໂດຍທີ່ມີພາກສ່ວນກ່ຽວຂ້ອງໄດ້ມອບໃບຢັ້ງຢືນຜ່ານການຕິດຕາມໃຫ້.

ທ່ານ ພັທ ສຸກພະຈັນ ຮັກສາການ ປກສ ນະຄອນຫລວງວຽງຈັນ ໄດ້ໃຫ້ສຳພາດນັກຂ່າວສຳນັກຂ່າວສານປະເທດລາວ ໃນວັນທີ 18 ເມສາ 2020 ນີ້ວ່າ: ຢູ່ນະຄອນຫລວງວຽງຈັນ ມີແຮງງານລາວທີ່ກັບມາຈາກໄທ ແລະ ຜູ້ທີ່ມີຄວາມສ່ຽງ ໃນການຕິດເຊື້ອພະຍາດອັກເສບປອດຈາກ ເຊື້ອຈຸລະໂລກສາຍພັນໃໝ່ ຫລື ໂຄວິດ-19 ທີ່ໄດ້ມາກັກກັນບໍລິເວນຢູ່ 21 ສູນໃນ 7 ຕົວເມືອງ ມີປະມານ 3.600 ຄົນ, ໃນນີ້ໄດ້ກັກຕົວເອງຢູ່ເຮືອນ ແລະ ໝົດກຳນົດການກັກກັນແລ້ວປະມານ 2.500 ກວ່າຄົນ ແລະ ຍັງສືບຕໍ່ກັກກັນປະມານ 300-400 ກວ່າຄົນ.

ຂະນະດຽວກັນ, ທ່ານ ບຸນໜາ ຜາທຸມມະວົງ ເຈົ້າເມືອງຈັນທະບູລີ ກໍໄດ້ໃຫ້ຮູ້ວ່າ: ເມືອງຈັນທະບູລີ ມີ 1 ສູນທີ່ຮອງຮັບແຮງງານລາວທີ່ມາຈາກໄທ ແລະ ຜູ້ທີ່ມີຄວາມສ່ຽງ ໃນການຕິດເຊື້ອພະຍາດໂຄວິດ-19 ມີທັງໝົດ 53 ຄົນ, ໃນນັ້ນໄດ້ກັກຢູ່ສູນຈຳນວນ 12 ຄົນ ແລະ 41 ຄົນແມ່ນໄປກັນບໍລິເວນຕົນເອງຢູ່ເຮືອນ.

ປັດຈຸບັນ ຜູ້ທີ່ກັກຕົວເອງຢູ່ເຮືອນ ແມ່ນຄົບກຳນົດ 14 ວັນແລ້ວ, ເຊິ່ງເຫັນວ່າເຂົາເຈົ້າເຫລົ່ານັ້ນປອດໄພດີ ແລະ ບໍ່ມີບັນຫາຫຍັງ. ໃນລະຫວ່າງວັນທີ 7-17 ເມສານີ້, ມີແຮງງານຈາກພູເບ້ຍ 6 ຄົນ, ປະຊາຊົນ 1 ຄົນທີ່ມີອາການໄອໄດ້ສະໝັກໃຈມາກັກໂຕ ແລະ ຄົນເລ່ລ່ອນ 4 ຄົນ ເຂົ້າມາກັກໂຕຊົ່ວຄາວຢູ່ສູນດັ່ງກ່າວ ເພື່ອຕິດຕາມອາການພາຍໃນ 14 ວັນ. ຖ້າບໍ່ມີອາການໄຂ້ ຫລື ອາການສົງໄສ ເປັນພະຍາດໂຄວິດ-19 ແມ່ນຈະມອບໃຫ້ພາກສ່ວນ ແຮງງານ-ສະຫວັດດີການສັງຄົມເມືອງ ແລະ ປກສ ດໍາເນີນການຕາມຂັ້ນຕອນຕໍ່ໄປ.

ໂອກາດນີ້, ທ່ານ ບຸນມີ ໄຊຍະວົງ ຮອງເຈົ້າເມືອງສີໂຄດຕະບອງ, ຫົວໜ້າຄະນະສະເພາະກິດ ຕ້ານ ແລະ ສະກັດກັ້ນພະຍາດໂຄວິດ-19 ໄດ້ໃຫ້ຮູ້ວ່າ: ສະເພາະແຮງງານທີ່ກັບຈາກຕ່າງປະເທດ ທີ່ກັກກັນຢູ່ເມືອງສີໂຄດຕະບອງ ມີທັງໝົດ 87 ຄົນ, ຍິງ 55 ຄົນ ນັບແຕ່ວັນທີ 27 ມີນາ ຮອດວັນທີ 16 ເມສາ 2020 ໄດ້ເຮັດໃບຢັ້ງຢືນປົດປ່ອຍແຮງງານທີ່ກັກບໍລິເວນຄົບ 14 ວັນ ຈຳນວນ 66 ຄົນ, ຍິງ 46 ຄົນ ແລະ ຍັງສືບຕໍ່ຕິດຕາມຢູ່ 21 ຄົນ, ຍິງ 11 ຄົນ, ໃນນີ້ ຄະນະສະເພາະກິດໄດ້ຈັດຕັ້ງເວນຍາມຕະຫລອດ 24 ຊົ່ວໂມງ ພ້ອມນັ້ນ ກໍໄດ້ແຕ່ງຕັ້ງຈຸແພດໝໍກວດສຸຂະພາບມື້ລະ 2 ຄັ້ງ ຜ່ານການກວດ ເຫັນວ່າແຕ່ລະຄົນມີສຸຂະພາບແຂງແຮງດີ.

ທີ່ມາ: ຂປລ