ຖືເປັນອຸທາຫອນ! ສາວແລ່ນອອກກໍາລັງກາຍຢູ່ທາງປ່ຽວ ຖືກໂຈນລັດດຶງເຂົ້າປ່າຫວັງຂົ່ມຂື່ນ

ຖືເປັນອຸທາຫອນ! ສາວແລ່ນອອກກໍາລັງກາຍຢູ່ທາງປ່ຽວ ຖືກໂຈນລັດດຶງເຂົ້າປ່າຫວັງຂົ່ມຂື່ນ

19th April 2020 0 By Education

ປັດຈຸບັນນີ້ ມິດສາຊີບມີທຸກຮູບແບບ ສະນັ້ນ ທຸກຄົນຕ້ອງມີສະຕິລະວັງຕົວໃນການໃຊ້ຊີວິດ ໂດຍສະເພາະແມ່ນແມ່ຍິງ ເຊິ່ງເປັນກຸ່ມສ່ຽງ ເປົ້າໝາຍຂອງຄົນບໍ່ດີ ແລະຫາກບໍ່ມີສະຕິລະວັງຕົວແລ້ວກໍ່ອາດຈະຕົກເປັນເຫຍື່ອຄືດັ່ງກໍລະນີສາວຜູ້ນີ້ ທີ່ແລ່ນອອກກກໍາລັງກາຍຢູ່ດີໆ ພົບໜຸ່ມຫື່ນລັດດຶງເຂົ້າປ່າຫວັງຂົ່ມຂືນ ແຕ່ໂຊກດີແລ່ນໜີເອົາຕົວລອດອອກມາໄດ້.

ເຫດການດັ່ງກ່າວເກີດຂຶ້ນທີ່ປະເທດໄທ ແຕ່ແອັດມິນຢາກຍົກມາເປັນອຸທາຫອນເຕືອນສະຕິການໃຊ້ຊີວິດຂອງທຸກຄົນໃນສັງຄົມ ໂດຍເພຈຂ່າວໄທລັດລາຍງານໃຫ້ຮູ້ວ່າ: ຈັບຄົນງານສວນໝາກໄມ້ ຈັນທະບູຣີ ສຸດຫື່ນ ຂີ່ລົດຈັກມາດັກສຸ້ມລໍຖ້າລັດດຶງສາວແລ່ນອອກກໍາລັງກາຍຄົນດຽວຜ່ານທາງປ່ຽວຫວັງຂົ່ມຂືນ ແຕ່ໂຊກດີມີພົນລະເມືອງດີຜ່ານມາເຫັນ ຈຶ່ງຮ້ອງຂູ່ໃສ່ ເຮັດໃຫ້ຄົນຮ້າຍປ່ອຍເຫຍື່ອດີ້ນຫຼຸດມືແລ່ນໜີອອກໄປໄດ້.

ຈາກການສອບຖາມຍິງສາວຜູ້ເສຍຫາຍ ໃຫ້ຮູ້ວ່າ: ຕອນແລງຂອງວັນທີ 16 ເມສາ 2020 ຂະນະທີ່ກໍາລັງແລ່ນອອກກໍາລັງກາຍຕາມລໍາພັງຢູ່ເຂດບໍລິເວນຫົນທາງລຽບຄອງພັກດີຣໍາໄພ ດ້ານລັງໂຮງຮຽນລາຊາລ ຈັນທະບູຣີ,​ຕໍາບົນຈັນທະນິມິດ, ອໍາເພີເມືອງຈັນທະບູຣີ  ໄດ້ມີຄົນຮ້າຍເປັນເພດຊາຍ ລຸກອອກມາຈາກແຄມທາງເຂົ້າລັອກຕົວພະຍາຍາມລາກດຶງເຂົ້າປ່າທີ່ຕິດກັບເສັ້ນທາງດັ່ງກ່າວ ພະຍາຍາມທີ່ຈະຂົ່ມຂືນ ເຖິງແມ່ນວ່າຜູ້ເສຍຫາຍພະຍາຍາມເວົ້າຍື່ນຂໍ້ສະເໜີຕ່າງໆ ແຕ່ບໍ່ເປັນຜົນ ຄົນຮ້າຍໃຊ້ມືປິດປາກເພື່ອບໍ່ໃຫ້ສົ່ງສຽງ.

ໂຊກດີ ໃນເວລາຕໍ່ມາ ໄດ້ມີພົນລະເມືອງດີຄູ່ໜຸ່ມສາວທີ່ມາແລ່ນອອກກໍາລັງກາຍແຖວນັ້ນມາພົບເຫັນເຫດການພໍດີ ເຊິ່ງເບິ່ງແລ້ວຜິດສັງເກດ ຈຶ່ງໄດ້ຮ້ອງສົ່ງສຽງໄລ່ ແຕ່ຄົນຮ້າຍຍັງບໍ່ປ່ອຍເຫຍື່ອ ເຮັດໃຫ້ພົນລະເມືອງຕ້ອງຮ້ອງອອກໄປວ່າຕໍາຫຼວດມາ ເຮັດໃຫ້ຄົນຮ້າຍຕົກໃຈປ່ອຍເຫຍື່ອແລ້ວແລ່ນໜີເຂົ້າປ່າໄປ ແຕ່ຈອດລົດຈັກຖິ້ມໄວ້ຢູ່ບ່ອນເກີດເຫດ, ຫຼັງຈາກນັ້ນຜູ້ເສຍຫາຍຈຶ່ງເຂົ້າແຈ້ງຄວາມກັບຕໍາຫຼວດ.

ທັງນີ້, ດ້ານໂຈນຜູ້ກໍ່ເຫດ ຫຼັງຕໍາຫຼວດຕາມຈັບໄດ້ຜູ້ກ່ຽວຮັບສາລະພາບວ່າ: ເປັນຜູ້ລົງມືກໍ່ເຫດແທ້ ດັ່ງນັ້ນ ເຈົ້າໜ້າທີ່ຈຶ່ງແຈ້ງຂໍ້ຫາກະທໍາອະນາຈານແກ່ບຸກຄົນອາຍຸກວ່າ 15ປີ ໂດຍຂູ່ເຂັນດ້ວຍປະການຕ່າງໆ ພ້ອມໃຊ້ກໍາລັງທໍາຮ້າຍ ໂດຍບຸກຄົນນັ້ນຢູ່ໃນພາວະບໍ່ສາມາດຂັດຂືນໄດ້ ແລະ ອື່ນໆອີກ.

ແນວໃດກໍ່ຕາມ ເຫດການດັ່ງກ່າວຖືເປັນອຸທາຫອນເຕືອນໃຈໃຫ້ສາວໆທີ່ມັກອອກກໍາລັງກາຍທັງຫຼາຍ ຕ້ອງມີສະຕິລະວັງຕົວຕໍ່ສະຖານທີ່ຕ່າງໆທີ່ຕົນເອງຈະໄປ ຫຼື ຕ້ອງມີໝູ່ຮ່ວມໄປນໍາ ເພື່ອບໍ່ໃຫ້ຕົນເອງກາຍເປັນຜູ້ໂຊກຮ້າຍຄືດັ່ງກໍລະນີນີ້.