ການ​ປ່ອຍ​ສັດ​ເປັນ​ລາບ​ອັນ​ປະ​ເສີດ

ການ​ປ່ອຍ​ສັດ​ເປັນ​ລາບ​ອັນ​ປະ​ເສີດ

21st April 2020 0 By Entertain

ພິທີປ່ອຍສັດ ຫຼື ໂຜດສັດ ເປັນປະເພນີຂອງຊາວພຸດ,ຊາວລາວ ທີ່ສຶບທອດກັນມາດົນນານ ເມື່ອເຖິງເທດສະການປີໃໝ່ລາວ.

ໂດຍທົ່ວໄປແລ້ວ ຄົນລາວຈະມີຄວາມເຊື່ອຖືກັນວ່າ ສິ່ງຊົ່ວຮ້າຍອັນ ຕະລາຍຮ້ອຍສິ່ງພັນແນວ ຈະສະຫລາຍຫາຍຈາກໄປນຳປີເກົ່າ. ເພື່ອຄວາມຍິນດີຮອງຮັບບັນດາສິ່ງທີ່ປະເສີດ ແລະ ໂຊກລາບອັນໃຫມ່ ແລ້ວກໍຈະໄດ້ດຳລົງຊີວິດຢ່າງປອດໃສຂາວສະອາດຕະຫຼອດປີໃຫມ່.

ຈາກເຫດຜົນດັ່ງກ່າວ, ການປ່ອຍສັດໃນໂອກາດປີໃຫມ່ ຈິ່ງມີ ລັກສະນະຟົດຟື້ນກວ້າງຂວາງ ແຕ່ບໍ່ສະເພາະຕອນປີໃຫມ່ເທົ່ານັ້ນ; ບາງຄົນກໍປ່ອຍໃນໂອກາດຄ້າຍວັນເກີດ,

ໂອກາດຟື້ນຫາຍຈາກຄວາມເຈັບປ່ວຍ ເພື່ອອະຖິທານໃຫ້ຕົນເອງມີສຸຂະພາບເຂັ້ມແຂງ, ອາຍຸຫມັ້ນຍືນ. ນອກຈາກເປັນກຸສົນຖວາຍການຮັກສາສິນແລ້ວ ຍັງມີການເຮັດບຸນປ່ອຍສັດ ຫຼື ໂຜດສັດ ຈະເປັນສັດສະນິດໃດກໍ່ໄດ້ເຊັ່ນ: ປູ,ປາ,ນົກ,ເຕົ່າ,ແລນ ແລະ ສັດອື່ນໆ.

ການປ່ອຍສັດ ຖືກັນວ່າເປັນການໄຖ່ເອົາຊີວິດຂອງສັດນັ້ນໆ ໃຫ້ມີຊີວິດຢູ່ຕໍ່ໄປອີກ.ເມື່ອເຮົາໄດ້ຊ່ວຍເຂົາແລ້ວ ເຂົາຈະຊ່ວຍເຮົາ ແລະ ເມດຕາສົງສານເຮົາເປັນການຕອບບຸນແທນຄຸນ ຄືກັບພຣະພຸດທະເຈົ້າໄດ້ຕັດສອນໄວ້ວ່າ: ເຮັດບຸນແນວໃດກໍ່ຈະໄດ້ຜົນແນວນັ້ນ.

ດ້ວຍເຫດນີ້ ພໍເຖິງຍາມບຸນປີໃໝ່ມາ ຊາວລາວ ຈິ່ງພາກັນປ່ອຍສັດ ເປັນການຈະເລີນພົມມະວິຫານ ອັນຖືກຕ້ອງຕາມຫຼັກທໍມະຂອງພຣະພຸດທະສາສະໜາແທ້,ການເຮັດບຸນປ່ອຍສັດ ເພື່ອເປັນການຕໍ່ອາຍຸ ແລະ ໃຫ້ຫາຍຈາກອາການເຈັບໄຂ້ໄດ້ປ່ວຍ.

ເປັນປະເພນີອັນດີງາມ ແລະ ມີຄວາມໝາຍ,ຄວາມສໍາຄັນຍິ່ງໃນຍຸກສະໄໝປະຈຸບັນ.ອີກດ້ານໜຶ່ງຍັງເປັນການອານຸລັກຮັກສາຊີວິດ ສັດນໍ້າ,ສັດປ່າ ຄືນສູ່ທໍາມະຊາດ,ເພື່ອເພິ່ງພາເຊິ່ງກັນ ແລະ ກັນນັ້ນເອງ ແລະ ກາຍເປັນພາລະກິດອັນຍິ່ງໃຫຍ່ຂອງສັງຄົມໃນຍຸກສະໄໝປະຈຸບັນ.


ໂດຍ: ເພັດສາຄອນ ສິມມະວົງ ຂໍ້ມູນຈາກ: ເຖົ້າແກ່ແນວໂຮມບ້ານ