ມີຄວາມຫວັງ! ເຢຍ​ລະ​ມັນ​ອະ​ນຸ​ຍາດ​ການ​ທົດ​ລອງ​ຢາ​ວັກແຊງຕ້ານໂຄວິດ-19 ຊະ​ນິດ​ທຳ​ອິດ

ມີຄວາມຫວັງ! ເຢຍ​ລະ​ມັນ​ອະ​ນຸ​ຍາດ​ການ​ທົດ​ລອງ​ຢາ​ວັກແຊງຕ້ານໂຄວິດ-19 ຊະ​ນິດ​ທຳ​ອິດ

23rd April 2020 0 By Education

ຕາມ​ຂ່າວ CRI: ວັນ​ທີ 22 ເມ​ສານີ້, ສຳ​ນັກງານ​ຄົ້ນ​ຄວ້າພໍ ເອ​ຣ​ລິ​ສ(Paul Ehrlich)ເຊິ່ງ​ເປັນ​ອົງ​ການ​ຕິດ​ຕາມ​ຄຸ້ມ​ຄອງ​ຢາ​ວັກ​ແຊງ​ຂອງ​ສະ​ຫະ​ລັດເຢ​ຍ​ລະ​ມັນ​ປະ​ກາດ​ວ່າ ໄດ້​ອະ​ນຸ​ຍາດ​ໃຫ້​ດຳ​ເນີນ​ການ​ທົດ​ລອງ​ຢາ​ວັກ​ແຊງ​ຕ້ານ​ພະ​ຍາດ​ໂຄວິດ-19 ຊະ​ນິດ​ທຳ​ອິດ.

ຜູ້​ຮັບ​ຜິດ​ຊອບ​ຂອງ​ອົງ​ການ​ດັ່ງ​ກ່າວ ​ກ່າວ​ວ່າ: ຄາດ​ວ່າ​ ຈະບໍ່​ມີ​ຄວາມ​​ເປັນ​ໄປ​ໄດ້​ທີ່​​ຈະອະ​ນຸ​ຍາດ​ໃຫ້ວັກ​ແຊງ​ດັ່ງ​ກ່າວເຂົ້າຕະ​ຫຼາດ ແລະ​ ໃຫ້​ປະ​ຊາ​ຊົນ​ນຳ​ໃຊ້ພາຍ​ໃນ​ປີນີ້.

ມື້​ດຽວ​ກັນ, ສຳ​ນັກ​ງານ​ຄົ້ນ​ຄວ້າພໍ ເອ​ຣ​ລິ​ສ​ໄດ້ຖະ​ແຫຼງ​ວ່າ: ຢາ​ວັກແຊງ​ທີ່​ໄດ້​ຮັບ​ການ​ອະ​ນຸ​ຍາດໃຫ້​ເຂົ້າ​ສູ່​ໄລ​ຍະ​ທົດ​ລອງນັ້ນ​ແມ່ນ​ຢາ​ວັກ​ແຊງ RNA ຊະ​ນິດ​ໜຶ່ງ​ທີ່​ຄົ້​ນ​ຄວ້າ​ຜະ​ລິດ​ໂດຍ​ບໍ​ລິ​ສັດ BioNTech ທີ່​ຕັ້ງ​ຢູ່​ນະ​ຄອນ​ແມນ​ສ໌​ແຫ່ງ​ເຢ​ຍ​ລະ​ມັນ. ການ​ທົດ​ລອງ​ໄລ​ຍະ​ທຳ​ອິດ​ທີ່​ໄດ້​ຮັບ​ການ​ອະ​ນຸ​ຍາດ​ຈະ​ຮັບສະ​ໝັກ​​ອາ​ສາ​ສະ​ໝັກ​ທີ່​ແຂງ​ແຮງຈຳ​ນວນ 200 ຄົນ​ທີ່​ມີອະ​ຍຸລະ​ຫວ່າງ 18 ຫາ 55 ປີ.

ພາຍ​ຫຼັງ​ໄດ້​ຕິດ​ຕາມ​ສະ​ພາບ​ຜູ້​ຮັບ​ການ​ທົດ​ລອງງວດ​ທຳ​ອິດ​ເປັນ​ເວ​ລາ​ໄລ​ຍະ​ໜຶ່ງ​ແລ້ວ, ຈະ​ດຳ​ເນີນ​ການ​ທົດ​ລອງ​ໄລ​ຍະ​ທີ​ສອງ​ຕໍ່ອາ​ສາ​ສະ​ໝັກງວດ​ທີ​ສອງ​ທີ່​ມີອະ​ຍຸເຊັ່ນ​ກັນກັບ​ງວດ​ທີ 1. ຄາດ​ວ່າ, ການ​ທົດ​ລອງ​ໄລ​ຍະ​ທີ​ສອງ​ຈະ​ຮັບ​ເອົາ​ອາ​ສາ​ສະ​ໝັກ​ທີ່​ມີ​ຄວາມ​ສ່ຽງ​ສູງ​ໃນ​ດ້ານ​ການ​ຕິດ​ແປດ​ພະ​ຍາດ​ຫຼື​ອາດ​ຈະມີ​ອາ​ການ​ໜັກ.

ມື້​ດຽວ​ກັນ, ທ່ານຄຼອ​ສ ຊິ​ຊຸ​ເທັກ​(Klaus Cichutek) ຫົວ​ໜ້າ​ສຳ​ນັກ​ງານ​ຄົ້ນ​ຄວ້າ​ ພໍ ເອ​ຣ​ລິ​ສກ່າວ​ວ່າ: ຄາດ​ວ່າ, ບໍ່​ມີ​ຄວາມ​ອາດ​ເປັນ​ໄປ​ໄດ້​ທີ່ຢາ​ວັກ​ແຊງ​ຊະ​ນິດ​ທຳ​ອິດຈະໄດ້​ຮັບ​ການ​ອະ​ນຸ​ຍາດເຂົ້າຕະ​ຫຼາດ ແລະ​ ໃຫ້​ປະ​ຊາ​ຊົນ​ນຳ​ໃຊ້ພາຍ​ໃນ​ປີນີ້.

ທີ່ມາ: CRI-FM93