ລະວັງໃຫ້ດີ! ພາກກາງ ແລະ ພາກເໜືອ ພາຍຸລະດູຮ້ອນຈະກັບມາອີກ 24-26 ເມສານີ້

ລະວັງໃຫ້ດີ! ພາກກາງ ແລະ ພາກເໜືອ ພາຍຸລະດູຮ້ອນຈະກັບມາອີກ 24-26 ເມສານີ້

24th April 2020 0 By Education

ຫາກໍ່ຜ່ານພົ້ນໄປບໍ່ພຽງເທົ່າໃດມື້ສໍາລັບພານຍຸລະດູຮ້ອນທີ່ພັດຖະຫຼົ່ມຫຼາຍເຂດທົ່ວປະເທດລາວ, ເຊິ່ງມີທັງພາຍຸ, ຝົນ ແລະ ໝາກເຫັບຕົກ ໂດຍສະເພາະແມ່ນເຂດພາກເໜືອຂອງລາວ, ແຕ່ຫຼ້າສຸດ ກົມອຸຕຸນິຍົມ ແລະ ອຸທົກກະສາດ ເຕືອນອີກຄັ້ງ ໃຫ້ລະວັງພາຍຸລະດູຮ້ອນໃນເຂດພາກກາງ ແລະ ພາກເໜືອ ໃນລະຫວ່າງວັນທີ 24-26 ເມສາ ນີ້.

ກົມອຸຕຸນິຍົມ ແລະ ອຸທົກກະສາດ ແຈ້ງເຕືອນໄພພາຍຸລະດູຮ້ອນ ແຕ່ໄລຍະວັນທີ 24-26 ເມສາ 2020 (ສະບັບທີ 1)​ ເນື່ອງຈາກວ່າບໍລິເວນຄວາມກົດດັນສູງຂອງອາກາດເຢັນທີ່ມີກໍາລັງປານກາງ ຫາ ແຮງຈາກປະເທດຈີນແຜ່ລົງມາປົກຄຸມເຂດພາກເໜືອລົງຫາພາກກາງ ແລະ ພາກໃຕ້ ຂອງປະເທດລາວ, ພ້ອມດຽວກັນນີ້ທົ່ວທຸກພາກອາກາດຮ້ອນເອົ້າຍັງປົກຄຸມໄດ້ເກີດມີການກະທົບຂອງມວນອາກາດເຢັນ ແລະ ມວນອາກາດຮ້ອນ ຊຶ່ງຈະເຮັດໃຫ້ເກີດມີພາຍຸລະດູຮ້ອນໃນລັກສະນະຝົນຕົກຟ້າຮ້ອງຟ້າເຫຼື້ອມ, ຟ້າຜ່າ ແລະ ໝາກເຫັບຕົກ ພ້ອມມີລົມພັດແຮງຢູ່ບາງທ້ອງຖິ່ນ ແຂວງພາກເໜືອ ແລະ ພາກກາງ ໃນໄລຍະວັນທີ 24 ຫາ 26 ເມສາ 2020 ນີ້.

ດັ່ງນັ້ນ,​ ຈຶ່ງແຈ້ງເຕືອນເຖິງປະຊາຊົນ ແລະ ອໍານາດການປົກຄອງທຸກພາກສ່ວນທີ່ອາໃສຢູ່ບັນດາແຂວງພາກເໜືອ ແລະ ພາກກາງເຊັ່ນ: ຜົ້ງສາລີ, ຫົວພັນ, ຊຽງຂວາງ, ຫຼວງນ້ໍາທາ, ອຸດົມໄຊ, ບໍ່ແກ້ວ, ຫຼວງພະບາງ, ໄຊຍະບູລີ, ວຽງຈັນ, ນະຄອນຫຼວງວຽງຈັນ, ໄຊສົມບູນ ແລະ ບໍລິຄໍາໄຊ ຈົ່ງມີສະຕິລະມັດລະວັງຕໍ່ສະພາບຝົນຕົກຟ້າຮ້ອງຜ້າເຫຼື້ອມ, ຟ້າຜ່າ, ໝາກເຫັບຕົກ ແລະ ລົມພັດແຮງ ຫຼີກລ່ຽງການຢູ່ສະຖານທີ່ກາງແຈ້ງ, ກ້ອງຕົ້ນໄມ້ໃຫຍ່ ແລະ ເສົາໄຟຟ້າແຮງສູງ, ສະຖານທີ່ກໍ່ສ້າງ ແລະ ປ້າຍໂຄສະນາທີ່ບໍ່ແໜ້ນໜາ.