ບໍ່ຖິ້ມກັນ! ກອງທັບປົດປ່ອຍປະຊາຊົນຈີນ ສົ່ງຊ່ຽວຊານ ແລະ ອຸປະກອນ ການແພດ ມາຊ່ວຍກອງທັບປະຊາຊົນລາວ ຕ້ານໂຄວິດ-19

ບໍ່ຖິ້ມກັນ! ກອງທັບປົດປ່ອຍປະຊາຊົນຈີນ ສົ່ງຊ່ຽວຊານ ແລະ ອຸປະກອນ ການແພດ ມາຊ່ວຍກອງທັບປະຊາຊົນລາວ ຕ້ານໂຄວິດ-19

24th April 2020 0 By Education

ໃນຕອນບ່າຍວັນທີ 24 ເມສາ 2020 ລັດຖະບານຈີນ ກໍຄື ກອງທັບປົດປ່ອຍປະຊາຊົນຈີນ ໄດ້ ສົ່ງຊ່ຽວຊານການແພດ ພ້ອມອຸປະກອນການແພດ ຈຳນວນໜຶ່ງ ມາຊ່ວຍເຫລືອລັດຖະບານລາວ ກໍຄື ກອງທັບປະຊາຊົນລາວ ເພື່ອຕ້ານການແຜ່ລະບາດ ຂອງເຊື້ອໄວຣັດ ໂຄວິດ-19 ຢູ່ ສປປ ລາວ, ​ເຊິ່ງຕາງໜ້າຕ້ອນຮັບໂດຍ ທ່ານ ພົນຕີ ແອສະໄໝ ເລືອງວັນໄຊ ຮອງລັດຖະມົນຕີ ກະຊວງປ້ອງກັນປະເທດ, ຫົວໜ້າຄະນະຊີ້ນຳ ວຽກງານຕ້ານໂຄວິດ-19 ສະເພາະກິດ ແຫ່ງ ກອງທັບປະຊາຊົນລາວ ພ້ອມດ້ວຍຄະນະ.

ທີມຊ່ຽວຊານແພດ ທີ່ເດີ່ນທາງມາຊ່ວຍເຫລືອ ສປປ ລາວ ໃນຄັ້ງນີ້ ມີທັງໝົດ 5 ຄົນ ເຊິ່ງຈະໄປປະຈຳການ ຢູ່ ໂຮງໝໍ 103, ພ້ອມອຸປະກອນການແພດ ຈໍານວນໜຶ່ງ ເປັນຕົ້ນ ນໍ້າຢາ ກວດຫາເຊື້ອ ໂຄວິດ-19 (PCR) ຈຳນວນ 10 ພັນອັນ, ຜ້າອັດປາກ N 95 ຈຳນວນ 10 ພັນອັນ, ຜ້າອັດປາກ ສຳລັບເຂດນອກ 30 ພັນອັນ, ແວ່ນຕາ ປ້ອງກັນແພດ 200 ອັນ, ຖົງມືທາງການແພດ 10 ພັນຊຸດ, ໝວກສຳລັບຜ່າຕັດ 10 ພັນອັນ, ຊຸດນຸ່ງປ້ອງກັນ 10 ພັນອັນ, ເຄື່ອງວັດອຸນຫະພູມ (ລຸ້ນແສງອິນຟ້າເລດ) 100 ອັນ, ເຈວລ້າງມືຂະໜາດ 500 ລິດ ຈຳນວນ 1.000 ກ່ອງ, ຖັງຂີ້ເຫຍື້ອງທາງການແພດ 500 ອັນ ແລະ ຕຽງນອນທາງການແພດ 50 ຕຽງ.

ໃນໂອກາດນີ້, ທ່ານ ພົນຕີ ແອສະໄໝ ເລືອງວັນໄຊ ໄດ້ສະແດງຄວາມຊົມເຊີຍ ຕໍ່ລັດຖະບານ ສປ ຈີນ ກໍຄື ກອງທັບປົດປ່ອຍປະຊາຊົນຈີນ ທີ່ໄດ້ມີຄວາມເປັນຫ່ວງເປັນ​ໄຍ ຕໍ່ລັດຖະບານ ກໍຄື ປະຊາຊົນລາວບັນດາເຜົ່າ ​ໂດຍທີມຊ່ຽວຊານການແພດ ແລະ ວັດຖຸອຸປະກອນຕ່າງໆ ມາຊ່ວຍເຫລືອແກ່ ກອງທັບປະຊາຊົນລາວ ເພື່ອຮັບມື ແລະ ຕອບໂຕ້ ກັບການລະບາດ ຂອງເຊື້ອໄວຣັດໂຄວິດ-19 ເຊິ່ງໄດ້ສະແດງເຖິງຄວາມສາມັກຄີ ຊ່ວຍເຫລືອເຊິ່ງກັນ ແລະ ກັນ ແບບເພື່ອນສະຫາຍ ທີ່​ໃກ້ຊິດ, ພ້ອມທັງຢືນຢັນວ່າ ຈະນຳເອົາອຸປະກອນ ການແພດດັ່ງກ່າວ ໄປແຈກຢາຍ ແລະ ນຳໃຊ້ເຂົ້າໃນ ວຽກງານຕົວຈິງຢ່າງມີປະສິດທີຜົນ.

ຂ່າວ-ພາບ: ກິດ​ຕາ, ທີ່ມາ: ປະເທດລາວ