ທ່ານນາຍົກລັດຖະມົນຕີ ທອງລຸນ ສີສຸລິດ ມອບພວງມາລາ ໄວ້ອາໄລແດ່ ກິດາວເພັດ ໜູຫ່ວງ

ທ່ານນາຍົກລັດຖະມົນຕີ ທອງລຸນ ສີສຸລິດ ມອບພວງມາລາ ໄວ້ອາໄລແດ່ ກິດາວເພັດ ໜູຫ່ວງ

24th April 2020 0 By Education

ນັບເປັນການສູນເສຍຄັ້ງຍິ່ງໃຫຍ່ຂອງວົງການເພັງລູກທົ່ງບ້ານນາ, ເມື່ອອີກໜຶ່ງລາຊາເພັງ ສະມາຊິກຄອບຄົວໜູຫ່ວງ, ທ່ານ ກິດາວເພັດ ໜູຫ່ວງ ໄດ້ເຖິງແກ່ມໍລະນະກໍາ ລາລັບໂລກໄປແລ້ວດ້ວຍພະຍາດຂອງເພິ່ນເອງ ທ່າມກາງຄວາມເສົ້າໂສກເສຍໃຈຂອງຄອບຄົວ ແລະ ມິດຮັກແຟນເພັງໃນທົ່ວປະເທດ.

ເຊິ່ງ ມື້ນີ້ ວັນທີ 24 ເມສາ 2020 ທ່ານນາຍົກລັດຖະມົນຕີ ແຫ່ງ ສປປ ລາວ  ທອງລຸນ ສີສຸລິດ ໄດ້ມອບພວງມາລາ ເພື່ອສະແດງຄວາມເສຍໃຈ ແລະ ໄວ້ອາໄລ ຕໍ່ການຈາກໄປ ແບບບໍ່ມີວັນຫວນກັບມາ ຂອງ ຣາຊາ ເພັງລູກທົ່ງບ້ານນາ ຊື່ດັງ ຂອງ ສປປ ລາວ, ທ່ານ ກິດາວເພັດ ຫນູຫ່ວງ. ໂດຍຕາງໜ້າເຂົ້າມອບ ພວງມາລາ ໂດຍທ່ານ ບົວເງິນ ຊາພູວົງ, ຮອງລັດຖະມົນຕີ ກະຊວງຖະແຫຼງຂ່າວ ວັດທະນາທໍາ ແລະ ທ່ອງທ່ຽວ ພ້ອມຄະນະ.

ແນວໃດກໍ່ຕາມ ການຈາກໄປຂອງທ່ານ ກິດາວເພັດ ໜູຫ່ວງໃນຄັ້ງນີ້ ເຮັດໃຫ້ແຟນເພັງໃນທົ່ວປະເທດ ຄໍ່າຄວນອາໄລຫາດ້ວຍໃຈຮັກ ແຕ່ທຸກບົດເພັງ ທຸກຜົນງານຂອງທ່ານຈະຢູ່ໃນຄວາມຊົງຈໍາຄົນລາວຕະຫຼອດໄປຊົ່ວກາລະນານ.