ຂ່າວດີ! ຜູ້ຕິດເຊື້ອໂຄວິດ-19 ປິ່ນປົວຫາຍດີ ໄດ້ອອກໂຮງໝໍເພີ່ມອີກ 1ຄົນ

ຂ່າວດີ! ຜູ້ຕິດເຊື້ອໂຄວິດ-19 ປິ່ນປົວຫາຍດີ ໄດ້ອອກໂຮງໝໍເພີ່ມອີກ 1ຄົນ

25th April 2020 0 By Education

ນັບວ່າເປັນຂ່າວດີອີກເລື່ອງໜຶ່ງທ່າມກາງທຸກພາກສ່ວນກໍາລັງປະຕິບັດໜ້າທີ່ຕໍ່ສູ້ກັບໂລກລະບາດອັນຮ້າຍແຮງ ໂຄວິດ-19, ຫຼັງ ທ້າວ ຊ່າງ ວິຣະເດດ ພະນັກງານໂຮງແຮມຄລາວພລາຊາ ຜູ້ຕິດເຊື້ອໂຄວິດ-19 ໄດ້ຮັບການປິ່ນປົວຈົນຫາຍດີ ໄດ້ອອກໂຮງໝໍໃນມື້ນີ້, ເຊິ່ງເຮັດໃຫ້ຍອດລວມການປິ່ນປົວຜູ້ຕິດເຊື້ອໄດ້ຫາຍດີອອກໂຮງໝໍກັບບ້ານໄດ້ 5 ຄົນແລ້ວ.

ເຊິ່ງຕົວຜູ້ກ່ຽວເອງໄດ້ ໂພສບັນລະຍາຍຄວາມຮູ້ສຶກ ແລະ ຄໍາຂອບໃຈຕໍ່ທ່ານໝໍ ແລະ ທຸກກໍາລັງໃຈ ຜ່ານເຟສບຸກສ່ວນຕົວຊື່ Sang Viradet ວ່າ: 34 ມື້ທີ່ຢູ່ໂຮງຫມໍ, 34 ມື້ທີ່ຮູ້ສຶກວ່າ ດົນ ແລະ ຍາວນານທີ່ສຸດໃນຊີວິດທີ່ໄດ້ຮັກສາຕົວເອງໃນໂຮງຫມໍ, ມາຮອດມື້ນີ້ ມື້ທີ່ຊ່າງເອງລໍຄອຍ ແລະ ພາວະນາຢູ່ທຸກມື້, ກາໄດ້ກາຍມາເປັນຄວາມຈິງ, ຊ່າງໄດ້ຮັກສາຫາຍດີຈາກໂຄວິດ-19 ແລ້ວ 100% ແລະ ກໍາລັງອອກໂຮງຫມໍມື້ນີ້. ເຖິງແນວໃດກໍຕາມ ຊ່າງຍັງຕ້ອງສືບຕໍ່ປະຕິບັດຕາມຄຳແນະນຳຂອງແພດຫມໍຢູ່ບ້ານຢ່າງເຄັ່ງຄັດ.

ຂ້າພະເຈົ້າ ແລະ ຄອບຄົວຢາກຂໍຂອບໃຈຫລາຍໆ ແລະ ສະແດງຄວາມຮູ້ບຸນຄຸນຢ່າງສຸດຊຶ້ງມາຍັງທາງພັກລັດ, ໂຮງຫມໍ ມິດຕະພາບ (150ຕຽງ), ນັກຮົບເສື້ອຂາວ ຫລື ຮີໂລ້ຂອງບ້ານເຮົາກໍ່ຄື ທ່ານຫມໍ, ພະຍາບານ, ອ້າຍເອື້ອຍທຸກຄົນທີ່ໄດ້ເສຍສະຫລະເວລາຂອງຕົວເອງມາຕໍ່ສູ້ກັບພະຍາດນີ້, ແລ້ວຍັງປິ່ນປົວ ແລະ ເບິ່ງແຍງເຮົາ ແລະ ຄົນໄຂ້ອີກຫລາຍໆຄົນເປັນຢ່າງດີ.

ຢາກຂໍຂອບໃຈທ່ານຫມໍ ແລະ ອ້າຍເອື້ອຍພະຍາບານທີ່ເປັນທັງທ່ານຫມໍ ແລະ ຍັງເປັນຄົນທີ່ໃຫ້ກຳລັງໃຈໃນມື້ທີ່ເຮົາເສຍໃຈທີ່ສຸດ, ອ່ອນແອທີ່ສຸດ ແລະ ນັ່ງຮ້ອງໄຫ້ໃນມື້ທີ່ບໍ່ມີໃຜ, ຂອບໃຈສຳລັບຄຳປອບໃຈ ແລະ ພະລັງບວກດີໆທີ່ມອບໃຫ້

ຢາກຂໍຂອບໃຈສຳລັບທຸກໆກຳລັງໃຈຈາກທຸກຄົນທີ່ເຮັດໃຫ້ຊ່າງຕໍ່ສູ້ນຳມັນຈົນຜ່ານມາໄດ້ຮອດມື້ນີ້, ສຸດທ້າຍນີ້, ຂ້າພະເຈົ້າ ແລະ ຄອບຄົວຢາກຂໍຂອບໃຈຈາກໃຈອີກຄັ້ງຫນຶ່ງ ແລະ ສັນຍາວ່າ ຈະໃຊ້ຊີວິດເທື່ອນີ້ໃຫ້ດີທີ່ສຸດ

ແນວໃດກໍ່ຕາມ ແອັດມິນຂໍສະແດງຄວາມດີໃຈນໍາຜູ້ປ່ວຍທີ່ມີອາການຫາຍດີໄດ້ອອກໂຮງໝໍ ແລະ ຂໍສະແດງຄວາມຊົມເຊີຍຕໍ່ການປະຕິບັດໜ້າທີ່ຂອງທີມແພດໝໍ ທີ່ເຮັດວຽກຢ່າງໜັກ ເພື່ອປິ່ນປົວຄົນເຈັບ ແລະ ຕໍ່ສູ້ກັບໂລກລະບາດນີ້ ເພື່ອທຸກຄົນ.