ຄະນະຊ່ຽວຊານແພດທະຫານກອງທັບ ສປ ຈີນຮ່ວມແລກປ່ຽນບົດຮຽນກັບກອງທັບປະຊາຊົນລາວ

ຄະນະຊ່ຽວຊານແພດທະຫານກອງທັບ ສປ ຈີນຮ່ວມແລກປ່ຽນບົດຮຽນກັບກອງທັບປະຊາຊົນລາວ

28th April 2020 0 By Education

ກອງທັບຖືເປັນກອງກຳລັງສຳຄັນໃນຍາມວິກິດ ປະເທດຊາດມີບັນຫາການຮັກສາຄວາມສະຫງົບປອດໄພ ກຳລັງປ້ອງກັນຊາດເປັນກ້ອນກຳລັງທີ່ຂາດບໍ່ໄດ້ທັງໃນວຽກແນວໜ້າ ແລະແນວຫຼັງ, ບໍ່ສະເພາະແຕ່ເທົ່ານັ້ນໃນວົງການແພດທະຫານແມ່ນເປັນທີ່ເພິ່ງສຸດທ້າຍຂອງປະຊາຊົນຕະຫຼອດມາ ໃນທຸກໆແຂວງມີໂຮງໝໍທະຫານເປັນບ່ອນປິ່ນປົວສຸຂະພາບ ແລະໃນຂະບວນຕ້ານກັບພະຍາດໂຄວິດ19 ກໍ່ເຊັ່ນດຽວກັນທີມແພດໝໍກອງທັບ ແລະ ໂຮງໝໍ 103 ເປັນໜຶ່ງໃນ 3 ໂຮງໝໍໃຫຍ່ທີ່ຖືກລະບຸໄວ້ໃຫ້ຮັບບໍລິການປິ່ນປົວຜູ້ຕິດເຊື້ອ.

ເຊິ່ງສອງປະເທດລາວ-ຈີນເປັນຄູ່ຮ່ວມມືຍຸດທະສາດ ສະນັ້ນ ເພື່ອສືບຕໍ່ປະຕິບັດຕາມຄໍາສັ່ງຊີ້ນໍາຂອງທ່ານ ສີຈິນຜິງປະທານປະເທດຈີນ ຕໍ່ການຊ່ວຍເຫຼືອບັນດາປະເທດຕໍ່ສູ້ກັບພະຍາດໂຄວິດ-19 ໃນຕອນບ່າຍວັນທີ 17 ເມສາ 2020 ນີ້, ສະຫາຍ ພັນເອກ ພິເສດ ສດຈ ຖີຊິນຢູຍ ຫົວໜ້າພະແນກລະບົບຫາຍໃຈໂຮງໝໍຊີຈິງ ເລກ 1 ທະຫານອາກາດກອງທັບປົດປ່ອຍປະຊາຊົນຈີນພ້ອມດ້ວຍຄະນະທີມງານແພດປ້ອງກັນ ແລະຕອບໂຕ້ພະຍາດ ໂຄວິດ-19 ກອງທັບ ສປ ຈີນໄດ້ເຂົ້າພົບປະຢ້ຽມຢາມແລກປ່ຽນບົດຮຽນດ້ານວິຊາການຢູ່ສະຖາບັນອະນາໄມກັນພະຍາດ ແລະສົ່ງເສີມສຸຂະພາບກອງທັບປະຊາຊົນລາວ. ໂດຍການເຂົ້າຮ່ວມຂອງ ສະຫາຍ ພັນໂທ ດຣ ພຶດສະພາ ສົນທິລາດ ຫົວໜ້າພະແນກກັນພະຍາດກົມເສນາຮັກກົມໃຫຍ່ພະລາທິການກອງທັບປະຊາຊົນລາວ, ສະຫາຍ ພັນໂທ ດຣ ໂພສະເດັດ ເສນາມຸນຕີ ຫົວໜ້າການທະຫານ, ພັນໂທ ໂສພາ ສີຫາລາດ ຫົວໜ້າການເມຶອງ ສະຖາບັນອະນາໄມກັນພະຍາດ ແລະສົ່ງເສີມສຸຂະພາບກອງທັບ, ມີບັນດາຄະນະພັກ – ຄະນະບັນຊາ, ຫົວໜ້າ – ຮອງພະແນກ, ນັກວິຊາການເຂົ້າຮ່ວມ.

ພາຍຫຼັງທີ່ຄະນະຊ່ຽວຊານແພດກອງທັບ ສປ ຈີນ ໄດ້ແຈ້ງຈຸດປະສົງຂອງການມາເຄື່ອນໄຫວຢ້ຽມຢາມໃນຄັ້ງນີ້ແລ້ວ ທາງສະຖາບັນອະນາໄມກັນພະຍາດ ແລະ ສົ່ງເສີມສຸຂະພາບກອງທັບປະຊາຊົນລາວກໍ່ໄດ້ລາຍງານກ່ຽວລະບົບການຈັດຕັ້ງ, ພາລະບົດບາດຄວາມຮັບຜິດຊອບຂອງຕົນ, ການຝຶກອົບຮົມ,​ ການກະກຽມຄວາມພ້ອມທາງດ້ານພາຫະນະເຕັກນິກ, ດ້ານບຸກຄາລາວິຊາການ, ເຄື່ອງມືອຸປະກອນການແພດ. ເຊິ່ງມີທັງຂໍ້ສະດວກ – ຂໍ້ຫຍຸ້ງຍາກໃນການປະຕິບັດໜ້າທີ່ວິຊາສະເພາະ.

ສະຖາບັນອະນາໄມກັນພະຍາດ ແລະສົ່ງເສີມສຸຂະພາບກອງທັບມີບົດບາດໃນການຕິດຕາມເຝົ້າລະວັງ ແລະຕອບໂຕ້ກັບ 17 ພະຍາດ/ອາການຢູ່ບັນດາກົມກອງທັງກໍາລັງຫຼວງ – ທ້ອງຖິ່ນໃນຂອບເຂດທົ່ວປະເທດ ເວົ້າລວມ, ເວົ້າສະເພາະແມ່ນໃນໄລຍະການລະບາດຂອງພະຍດ ໂຄວິດ – 19 ກົມກອງໄດ້ຮັບໜ້າທີ່ປ້ອງກັນ ແລະຕອບໂຕ້ພະຍາດດັ່ງກ່າວ.