ວິກິດທີ່ມາພ້ອມໂອກາດ! ນັກທຸລະກິດລາວປັບຕົວຫັນມາລ້ຽງງົວສົ່ງອອກຕະຫຼາດຈີນ ຄວາມຫວັງລາຍຮັບມະຫາສານ

ວິກິດທີ່ມາພ້ອມໂອກາດ! ນັກທຸລະກິດລາວປັບຕົວຫັນມາລ້ຽງງົວສົ່ງອອກຕະຫຼາດຈີນ ຄວາມຫວັງລາຍຮັບມະຫາສານ

29th April 2020 1 By Education

ນັກທຸລະກິດລາວຈະເນລະມິດແຂວງໄຊສົມບູນໃຫ້ກາຍເປັນເຂດທົ່ງຫຍ້າຂະໜາດໃຫຍ່ເພື່ອລ້ຽງງົວສົ່ງອອກຕະຫລາດຈີນຄວບຄູ່ກັບການພັດທະນາພູເບ້ຍໃຫ້ເປັນແຫຼ່ງທ່ອງທ່ຽວທໍາມະຊາດອັນລືຊື່ໃນພາກພື້ນອາຊຽນ ຫລັງພົບທ່າແຮງບົ່ມຊ້ອນທີ່ເຊື່ອມໂຍງກັບເສັ້ນທາງລົດໄຟລາວ-ຈີນ ຊຶ່ງຈະເປັນແຮງຊຸກຍູ້ການພັດທະນາເສດຖະກິດ-ສັງຄົມຂອງ ສປປ ລາວ ໄປໃນທິດທາງຍືນຍົງ ໂດຍຜ່ານການສ້າງຜົນປະ ໂຫຍດທັງທາງກົງ-ທາງອ້ອມລະຫວ່າງ ລາວ-ຈີນ.

ທ່ານ ຄໍາໄພ ສົມຊະນະ ປະທານບໍລິສັດກຸ່ມຄໍາໄພ ຊະນະ ຈໍາກັດຜູ້ດຽວ ເປີດເຜີຍວ່າ: ຕົນກໍາເນີດໃນຄອບຄົວທຸກຍາກ, ພໍ່ແມ່ເປັນຊາວໄຮ່ນາ, ລະດັບການສຶກສາຈົບພຽງ ປ4 ໂດຍບໍ່ມີໃບປະກາສະນີຍະບັດປະລິນຍາຕີ ແລະ ປະລິນຍາໂທແຕ່ປະການໃດ, ແຕ່ຍ້ອນຄວາມດຸໝັ່ນຂະຫຍັນພຽນ, ອົດທົນ, ຊື່ສັດບໍລິສຸດ ແລະ ປະຢັດມັດທະຍັດບວກກັບພໍ່ແມ່ ແລະບັນພະບຸລຸດບອກສອນການທໍາມາຫາກິນຕາມແນວທາງນະໂຍບາຍຂອງພັກ ແລະ ລັດວາງອອກ ແຕ່ລະໄລຍະ ຈຶ່ງເຮັດໃຫ້ຄອບຄົວທີ່ເລີ່ມຕົ້ນຈາກອາຊີບຄ້າຂາຍເປັດຂາຍໄກ່, ຕໍ່ມາກໍ່ບໍລິການແລ່ນລົດໂດຍສານຢູ່ທ້ອງຖິ່ນຊົນນະບົດເມື່ອຫລາຍສິບປີກ່ອນແລ້ວຄ່ອຍໆເຕີບໃຫຍ່ ແລະ ກ້າວຂຶ້ນມາເປັນບໍລິສັດກຸ່ມຄໍາໄພຊະນະຈໍາກັດຜູ້ດຽວຈົນເຖິງທຸກມື້ນີ້.

ພ້ອມນີ້ກໍ່ມີຜົນງານຢ່າງຫລວງຫລາຍປະກອບສ່ວນສ້າງສາ ແລະ ພັດທະນາປະເທດຊາດຢ່າງແທ້ຈິງເຊັ່ນ: ສ້າງອາຄານສໍານັກງານນາຍົກລັດຖະມົນຕີ, ສໍານັກງານອົງການສະຫະປະຊາຊາດ, ໂຄງການປ້ອງກັນຕຝັ່ງເຈື່ອນຕາມລໍາແມ່ນໍ້າຂອງແຂວງບໍ່ແກ້ວ,ຊົນລະ ປະທານຕ່າງໆ, ອາຄານສໍານັກງານຂອງລັດ-ເອກະຊົນຕ່າງໆ ແລະ ອື່ນໆ ທີ່ເກີດຈາດຄວາມເຊື່ອໝັ້ນດ້ານຄຸນນະພາບ, ມາດຕະຖານ, ຄວາມຍຸຕິທໍາ ແລະ ຊື່ສັດ.

ປັດຈຸບັນ ຕົນພູມໃຈ, ດີໃຈ ແລະ ເປັນກຽດຢ່າງສູງທີ່ພັກ-ລັດຖະບານເຊື່ອໝັ້ນບໍລິສັດຂອງພວກເຮົາ ໂດຍໃຫ້ໂອກາດເຂົ້າໄປພັດທະນາ ແລະ ແກ້ໄຂຄວາມທຸກຢູ່ບັນດາເມືອງ ແຂວງໄຊສົມບູນ ໃນນີ້ໄດ້ມອບງົວ 200 ກວ່າໂຕ ມູນຄ່າ 1 ຕື້ກວ່າກີບໃຫ້ປະຊາຊົນພາຍໃນແຂວງໄປລ້ຽງສໍາລັບຄອບຄົວທຸກຍາກ 2 ໂຕຕໍ່ຄອບຄົວ ຫລັງ 4 ປີແລ້ວສົ່ງຄືນລວມທັງມອບໝູນ້ອຍ 1.000 ກວ່າໂຕ ແລະ ສັດປີກຈໍານວນໜຶ່ງໃຫ້ລ້ຽງ.

ຂະນະດຽວກັນ,ພັກ-ລັດ ຖະບານຍັງໄດ້ໃຫ້ໂອກາດເຂົ້າໄປພັດທະນາເຂດພູເບ້ຍຢູ່ແຂວງດັ່ງກ່ວໃຫ້ກາຍເປັນແຫລ່ງທ່ອງທ່ຽວລະ ດັບຊາດ ແລະ ອາຊີໃນອະນາຄົດໂດຍຕິດພັນກັບການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ.

ທ່ານ ຄໍາໄພ ອະທິບາຍເປັນຈຸດໆທີ່ສຳຄັນວ່າ: ຕົນໄດ້ເຮັດທຸລະກິດຫລາຍຢ່າງຜ່ານມາແລ້ວ ແຕ່ສັງເກດວ່າທຸລະກິດເຫລົ່ານັ້ນບໍ່ຄອ່ຍຍືນຍົງເທົ່າທີ່ຄວນເນື່ອງຈາກສະພາບການແຂ່ງຂັນສູງ, ການປ່ຽນ ແປງແຕ່ລະໄລຍະບໍ່ຄືກັນ ແລະ ທ່າອ່ຽງຂອງໂລກກໍ່ໄປຕາມຈັງຫວະຂອງມັນ. ດ້ວຍເຫດນັ້ນຈິ່ງຫັນທິດໄປພັດທະນາການທ່ອງທ່ຽວແບບຍືນຍົງ ແລະ ຜະລິດກະສິກໍາເພື່ອຄໍ້າປະກັນສະບຽງອາຫານຕອບສະ ໜອງພາຍໃນ-ສົ່ງອອກຕ່າງປະເທດໂດຍສະເພາະສປ ຈີນ ແມ່ນຕະຫລາດໃຫຍ່ກັບທ່າແຮງບົ່ມຊ້ອນອັນໃຫຍ່ຫລວງຂອງເສັ້ນທາງລົດໄຟລາວ-ຈີນ ພາຍໃຕ້ການຈັດຕັ້ງຜັນຂະຫຍາຍນະໂຍບາຍຂອງສອງພັກສອງລັດ ແລະ ປະຊາຊົນສອງຊາດລາວ-ຈີນຄື ຕາມທິດ 4 ດີ ແລະ ຄູ່ຮ່ວມຊະຕາກໍາດຽວກັນລະ ຫວ່າງ ສປປ ລາວ ແລະ ສປ ຈີນນັ້ນເອງ.

ເມື່ອຕີລາຄາ ແລະ ສຶກສາຄວາມເປັນໄປໄດ້ໃນເບື້ອງຕົ້ນພົບວ່າແຂວງໄຊສົມບູນ ເປັນເຂດເໝາະສົມທີ່ສຸດເພາະມີຊາຍແດນຮອຍຕໍ່ກັບແຂວງວຽງຈັນ, ແຂວງຊຽງຂວາງ; ດິນດໍານໍ້າຊຸ່ມຄືອາກາດເຢັນເໝາະຕໍ່ການທ່ອງທ່ຽວ ແລະ ລ້ຽງສັດເປັນພິເສດ. ການມອບງົວໃຫ້ປະຊາຊົນຜູ້ທຸກຍາກລ້ຽງໃນເບື້ອງຕົ້ນແມ່ນບາດກ້າວສໍາຄັນໃນການກະຈາຍເຕັກນິກວິທະຍາສາດການລ້ຽງ ແລະ ພິສູດເບິ່ງທ່າແຮງບົ່ມຊ້ອນວ່າຈະໄດ້ຜົນ ຫລື ບໍໍ່ ຈາກນັ້ນຈິ່ງສືບຕໍ່ລົງມືລ້ຽງໃຫ້ກວ້າງ ຂວາງ.

ຊຸມປີຜ່ານມາ, ທ່ານ ຫລີປາວ ກວາງ ຫົວໜ້າກົງສູນໃຫຍ່ແຫ່ງສປ ຈີນ ປະຈຳພາກເໜືອລາວກ່າວວ່າ:ຈີນຈະຊຶ້ງົວຈາກສປປ ລາວປີໜຶ່ງ 500.000 ກວ່າໂຕ ໂດຍສະເລ່ຍແຕ່ລະມື້ຈະຕ້ອງສົ່ງອອກໄປ ສປ ຈີນ 1.900 ກວ່າໂຕຈິ່ງພຽງພໍກັບຄວາມຕ້ອງການ ໂດຍອະນຸຍາດໃຫ້ຜູ້ລ້ຽງງົວລາວສາມາດສະໜອງໄດ້ທັງງົວລາດ ແລະ ງົວພັນ ຊຶ່ງຖືວ່າແມ່ນບາດກ້າວສໍາຄັນຂອງສອງປະເທດໃນການສົ່ງສັນ ຍານວ່າຜົນປະໂຫຍດທີ່ແທ້ຈິງພວມກະຈາຍເຖິງມືປະຊາຊົນລາວຢ່າງແທ້ຈິງພາຍໃຕ້ຂໍ້ລິເລີ່ມໜຶ່ງແລວ ໜຶ່ງເສັ້ນທາງ ນອກຈາກນັ້ນຍັງຈະຮອງຮັບນັກທ່ອງທ່ຽວ ສປ ຈີນເຂົ້າມາ ສປປ ລາວອີກດ້ວຍ ເມື່ອເສັ້ນທາງລົດໄຟລາວ-ຈີນສໍາເລັດ ແລະ ເປີດບໍລິການຢ່າງເປັນທາງການໃນເດືອນທັນວາ 2021.

ພາບ-ບົດ: ເກີດຂວັນໃຈ ມາລີຈັນສີ