ຂອບໃຈ! ບິນ ບັນລືລິດ ດາລານັກສະແດງໄທ ຊ່ວຍເຫຼືອນ້ອງນ້ອຍລູກຊອດໄທລາວປ່ວຍຕາອັກເສບ ຫຼັງໄປພົບແພດບອກ ຄົນລາວໃຫ້ມາປົວຢູ່ລາວ

ຂອບໃຈ! ບິນ ບັນລືລິດ ດາລານັກສະແດງໄທ ຊ່ວຍເຫຼືອນ້ອງນ້ອຍລູກຊອດໄທລາວປ່ວຍຕາອັກເສບ ຫຼັງໄປພົບແພດບອກ ຄົນລາວໃຫ້ມາປົວຢູ່ລາວ

4th May 2020 0 By Education

ເປັນເລື່ອງລາວທີ່ສ້າງສຽງຊື່ນຊົມໃນນໍ້າໃຈສອງຝັ່ງຂອງໄທລາວ ທີ່ໃຫ້ການຊ່ວຍເຫຼືອກັນ ຂະນະດຽວກັນກໍ່ມີສຽງວິພາກວິຈານໄປເຖິງການເຮັດວຽກຂອງເຈົ້າໜ້າທີ່ແພດຈໍານວນໜຶ່ງທີ່ເຮັດໜ້າທີ່ສອງມາດຕະຖານ ແບ່ງແຍກຊົນຊາດ ກໍລະນີ ເດັກນ້ອຍອາຍຸ 4ປີ ລູກຊອດໄທລາວ ປ່ວຍໜັກຕາອັກເສບ ແຕ່ບໍ່ມີເງິນປິ່ນປົວ ເມື່ອໄປໂຮງໝໍເພື່ອພົບແພດ ກັບໄດ້ຍິນສຽງຕອບຮັບອັນເຈັບແສບກັບມາວ່າ ເປັນຄົນລາວກໍ່ຕ້ອງໄປປິ່ນປົວຢູ່ລາວ.

ແຕ່ຫຼ້າສຸດ ມີຜູ້ໃຈບຸນຈໍານວນຫຼາຍເຂົ້າມາຊ່ວຍເຫຼືອແລ້ວ ແລະ ໜຶ່ງໃນນັ້ນແມ່ນ ບິນ ບັນລືລິດ ດາລານັກສະແດງທີ່ມີຊື່ສຽງຂອງໄທ ຜູ້ໃຈບຸນ ຊ່ວຍເຫຼືອຄົນທຸກຍາກຕະຫຼອດມາ ຈົນໄດ້ສົມຍານາມວ່າ ເທວະດາເທິງດິນ.

ເຫດການດັ່ງກ່າວຖືກເຜີຍແຜ່ຢູ່ສື່ສັງຄົມອອນລາຍ ເຟສບຸກຊື່ວ່າ ພິກັດຂ່າວຊາວອຸບົນ ໂພສຂໍ້ຄວາມລະບຸວ່າ ແມ່ເຖົ້າພາຫຼານອາຍຸ 4ປີ ທີ່ພໍ່ເປັນຄົນໄທ ແລະ ແມ່ເປັນຄົນລາວ ເຊິ່ງກໍາລັງຕົກວຽກຍ້ອນໄດ້ຮັບຜົນກະທົບຈາກໂຄວິດ ໄປຫາແພດທີ່ໂຮງໝໍ ແລະ ຖືກປະຕິເສດການປິ່ນປົວຮັກສາ.

ເມື່ອວັນທີ 3 ພຶດສະພາ 2020 ມີລາຍງານວ່າ ທີ່ບໍລິເວນເພີງພັກໃນສວນຢາງບ້ານໜອງໄກ່ປ່າ ໝູ່ທີ່ 11 ຕໍາບົນ ກອງໂພນ ອໍາເພີນາຕານ ຈັງຫວັດອຸບົນລາດຊະທານີ ພົບເດັກຍິງວານິສາ ອາຍຸ 4ປີ ພ້ອມດ້ວຍທ້າວ ບຸນສານ ບຸດດາພັນ ອາຍຸ 45ປີ ຜູ້ເປັນພໍ່ ແລະ ນາງເພັງ ຮູບສວຍ ອາຍຸ 77ປີ ເຊິ່ງເປັນແມ່ເຖົ້າ ເຝົ້າເບິ່ງແຍງດູແລຫຼານສາວດ້ວຍຄວາມເປັນຫ່ວງ ທີ່ຕ້ອງນອນຮ້ອງໄຫ້ ຈາກການທີ່ຕາທັງ 2 ເບື້ອງປວມບວມໃຫຍ່ຂຶ້ນ.

ເມື່ອໄດ້ເງິນອຸດໜູນຄົນຊະລາກໍ່ຮີບເໝົາລົດພາຫຼານໄປຫາແພດທີ່ໂຮງໝໍແຫ່ງໜຶ່ງ ໃນຈັງຫວັດອຸບົນລາດຊະທານີ ແຕ່ຖືກປະຕິເສດການປິ່ນປົວ ເນື່ອງຈາກບໍ່ມີເງິນຈ່າຍເພາະຫຼານເປັນຕ່າງດ້າວ ພໍ່ໄທແມ່ລາວ ຕ້ອງຈ່າຍຄ່າເອັກສະເລກ່ອນ 8.000ບາດ ເຈົ້າໜ້າທີ່ແຈ້ງ ເປັນຄົນລາວກໍ່ຕ້ອງໄປປິ່ນປົວທີ່ລາວ ສຸດທ້າຍແມ່ເຖົ້າຕ້ອງໄດ້ພາຫຼານກັບບ້ານ.

ເຖິງຢ່າງໃດກໍ່ຕາມ ປັດຈຸບັນນີ້ ນ້ອງວານິສາ ໄດ້ຮັບການຊ່ວຍເຫຼືອແລ້ວຈາກຜູ້ໃຫຍ່ໃຈດີຫຼາຍພາກສ່ວນພາຍໃນໝູ່ບ້ານ, ອໍາເພີ ແລະ ຈັງຫວັດທີ່ພວກກ່ຽວອາໄສຢູ່ ໂດຍໄດ້ຊໍາລະຄ່າເອັກສະເລຕາ ແລະ ແອັດມິດນອນພັກປິ່ນປົວຢູ່ໂຮງໝໍ, ເຊິ່ງອາການຂອງນ້ອງດີຂຶ້ນເລື້ອຍໆ ສາມາດກິນນົມໄດ້, ອາລົມດີຂຶ້ນ ແລະ ຫຼິ້ນເຄື່ອງຫຼິ້ນທີ່ນາງພະຍາບານນໍາມາໃຫ້ໄດ້ແລ້ວ.

ທັງນີ້ ຜູ້ໃຫຍ່ໃຈດີທີ່ຊ່ວຍເຫຼືອນ້ອງວານິສານັ້ນ ມາຈາກຫຼາຍພາກສ່ວນ ເຊິ່ງໜຶ່ງໃນນັ້ນແມ່ນ ບິນ ບັນລືລິດ ເທວະດາເທິງດິນ ທີ່ເມື່ອຮັບຮູ້ກໍລະນີຂອງນ້ອງວານິສາ ກໍ່ຮີບປະສານຫາໂຮງໝໍທີ່ນ້ອງພັກຢູ່ໃຫ້ທໍາການປິ່ນປົວຢ່າງເຕັມທີ່. ແນວໃດກໍ່ຕາມ ເຖິງຈະພົບເລື່ອງບໍ່ດີ ເລື່ອງທີ່ເຮັດໃຫ້ເສຍຄວາມຮູ້ສຶກໃນເບື້ອງຕົ້ນ ແຕ່ກໍ່ຍັງໂຊກດີທີ່ ຍັງມີຄົນໄທໃຈບຸນອີກຈໍານວນຫຼາຍ ໃຫ້ການຊ່ວຍເຫຼືອຄອບຄົວນີ້.