ເມືອງພູວົງເຂັ້ມງວດຄຸ້ມຄອງລາສິນຄ້າ ດ້ານລາຄາຊີ້ນໝູຢູ່ທີ່ 45.000ກີບຕໍ່ກິໂລ

ເມືອງພູວົງເຂັ້ມງວດຄຸ້ມຄອງລາສິນຄ້າ ດ້ານລາຄາຊີ້ນໝູຢູ່ທີ່ 45.000ກີບຕໍ່ກິໂລ

6th May 2020 0 By Education

ເພື່ອເປັນການປ້ອງກັນການສວຍໂອກາດຂື້ນລາຄາສິນຄ້າຕາມລໍາພັງໃຈຂອງແມ່ຄ້າຊາວຂາຍ  ກໍ່ຄືການປົກປ້ອງສິດຜົນປະໂຫຍດຂອງຜູ້ບໍລິໂພກ ໃນຊ່ວງໄລຍະວິກິດການລະບາດຂອງພະຍາດ ໂຄວິດ-19 ທາງຫ້ອງການອຸດສະຫະກໍາ ແລະ ການຄ້າເມືອງພູວົງ ແຂວງອັດຕະປື  ໄດ້ສຸມໃສ່ວຽກງານການກວດກາ ແລະ ເຂັ້ມງວດການຂາຍສີນຄ້າຂອງຜູ້ປະກອບການຕ່າງໆໃນຂອບເຂດທົ່ວເມືອງຢ່າງເປັນເຈົ້າການ.

ທ່ານ ວິໄລວັນ ໄຊຍະບຸນຍຮາຍ ວ່າການຫົວໜ້າຫ້ອງການອຸດສະຫະກໍາ ແລະ ການຄ້າ ເມືອງພູວົງ ແຂວງອັດຕະປື ໃຫ້ຮູ້ວ່າ: ອໍານາດການປົກຄອງເມືອງ ພູວົງ ກໍ່ຄືຫ້ອງການອຸດສະຫະກໍາ ແລະ ການຄ້າເມືອງ ໄດ້ຖືສໍາຄັນ ແລະ ເຂັ້ມງວດໃນການຄຸ້ມຄອງລາຄາສີນຄ້າໃນທອ່ງຕະຫຼາດ ບໍ່ໃຫ້ມີການເໜັງຕີ ສູງເກີນໄປ ໂດຍສະເພາະໃນໄລຍະຂອງການປະຕິບັດມາດຕະການປ້ອງກັນການລະບາດຂອງພະຍາດ ໂຄວິດ 19.

ເຊິ່ງໃນການຄຸ້ມຄອງລາຄາສິນຄ້າພາຍໃນເມືອງພູວົງ ແມ່ນປະຕິບັດຕາມສໍາສັ່ງແຈ້ງການຂອງກະຊວງອຸດສະຫະກໍາ ແລະ ການຄ້າວາງອອກ ເຊິ່ງໄດ້ແຕ່ງຕັ້ງພະນັກງານວິຊາການລົງເຄື່ອນໄຫວສົມທົບກັບພາກສ່ວນກ່ຽວຂ້ອງ ຕິດຕາມກວດກາຢ່າງເຂັ້ມງວດ ແລະ ໄດ້ສ້າງບົດບັນທືກຮ່ວມກັບຜູ້ປະກອບການຄ້າຂາຍພາຍໃນເມືອງ ເພື່ອຮັບປະກັນບໍ່ໃຫ້ມີການສວຍໂອກາດຂື້ນລາຄາຂອງສິນຄ້າ.

ທ່ານ ວິໄລວັນ ໄຊຍະບຸນຮາຍ ຍັງໄດ້ກ່າວຕື່ມວ່າ: ປະຈຸບັນລາຄາສີນຄ້າພາຍໃນເມືອງພູວົງ ໂດຍສະເພາະສິນຄ້າປະເພດເຄື່ອງອຸປະໂພກ ແລະ ບໍລິໂພກ ທີ່ຂາຍໃນທ່ອງຕະຫຼອດ ແມ່ນຢູ່ໃນເກນປົກກະຕິ, ສໍາລັບສີນຄ້າປະເພດຊີ້ນງົວ ຂາຍໃນລາຄາ 1 ກິໂລຕໍ່ 70 ພັນກີບ, ຊີ້ນຄວາຍ 65 ພັນກີບຕໍ່ 1 ກິໂລ, ຊີ້ນໜູ 45 ພັນກີບຕໍ່ 1 ກິໂລ, ສ່ວນເຂົ້າສານປະເພດຕ່າງໆ ກິໂລລະ 7 ພັນ ຫາ 9 ພັນກີບ ແລະ ສິນຄ້າອື່ນໆ ກໍ່ເຫັນວ່າມີການຂາຍຢູ່ໃນລາຄາປົກກະຕິ.

ທີ່ມາ: attapeu media