ຖືເປັນບົດຮຽນ! ຖືກປັບໃໝເສຍເງິນມັດໃຫຍ່ຍ້ອນໂພສປະຈານຄົນອື່ນລົງເຟສບຸກ

ຖືເປັນບົດຮຽນ! ຖືກປັບໃໝເສຍເງິນມັດໃຫຍ່ຍ້ອນໂພສປະຈານຄົນອື່ນລົງເຟສບຸກ

30th December 2019 0 By Education

ວັນທີ 24 ທັນວາ 2019 ທີ່ຜ່ານມາ, ເຈົ້າໜ້າທີ່ພະແນກສະກັດກັ້ນ ແລະ ຕ້ານການຄ້າມະນຸດ ປກສ ແຂວງຄໍາມ່ວນ ໄດ້ສຶກສາອົບຮົມຜູ້ກະທໍາຜິດ ຊື່ນາງແຕ່ງຄໍາ ທີ່ມີການນິນທາ ແລະ ມີການໃສ່ຮ້າຍປ້າຍສີບຸກຄົນອື່ນຜ່ານສື່ສັງຄົມອອນລາຍທາງເຟສບຸກ Facebook ເພື່ອບໍ່ໃຫ້ໄປກະທໍາຜິດອີກ ພ້ອມປັບໄມເປັນເງິນ ຈໍານວນ 9ລ້ານກີບ

ພາບປະກອບ

ພັທ ຂວັນໃຈ ເກດວິໄລຫົວໜ້າພະແນກສະກັດກັ້ນ ແລະ ຕ້ານການຄ້າມະນຸດ ປກສ ແຂວງຄໍາມ່ວນ ໃຫ້ຮູ້ວ່າ: ໃນວັນທີ 1 ພະຈິກ 2019,ນາງເພັດວິໄລ ອາຍຸ 29ປີ ອາຊີບຄ້າຂາຍ ຢູ່ບ້ານສົມສະອາດ, ເມືອງທ່າແຂກ ແຂວງຄໍາມ່ວນ ໄດ້ມາແຈ້ງຄວາມວ່ານາງແຕ່ງຄໍາອາຍຸ 45ປີ ຢູ່ບ້ານສົມສະອາດ ເມືອງທ່າແຂກ ແຂວງຄໍາມ່ວນ ເອົາຮູບພາບຂອງຜູ້ກ່ຽວພ້ອມຂໍ້ຄວາມປ້ອຍດ່າ ໃສ່ຮ້າຍປ້າຍສີລົງສື່ສັງຄົມອອນລາຍເຟສບຸກ Facebook ໃນທາງທີ່ເສື່ອມເສຍ, ດັ່ງນັ້ນ ເຈົ້າໜ້າທີ່ຈຶ່ງໄດ້ລົງກວດກາ, ຕິດຕາມ, ເກັບກໍາຂໍ້ມູນ, ເກັບກໍາຫຼັກຖານ ເຫັນວ່າມີມູນຄວາມຈິງແທ້ ຈຶ່ງນໍາຕົວນາງແຕ່ງຄໍາໄປສອບສວນ.

ນາງແຕ່ງຄໍາຮັບສາລະພາບວ່າ: ໃນວັນທີ 1ມັງກອນ 2017 ໄດ້ຕັ້ງກອງທຶນຫວຍ ເຊິ່ງຜູ້ກ່ຽວເປັນແມ່ຫວຍມີສະມາຊິກທັງໝົດ 25ຄົນ, ເກັບເດືອນລະ 10.000 ບາດ,_ ມາຮອດວັນທີ 1 ເມສາ 2017, ນາງເພັດວິໄລ ໜຶ່ງໃນລູກຫວຍໄດ້ເປຍເອົາມືຂອງຜູ້ກ່ຽວ ຈໍານວນ 240.000ບາດ, ພາຍຫຼັງນາງເພັດວິໄລໄດ້ເງິນມາແລ້ວ ຜູ້ກ່ຽວໄດ້ເອົາໄປຈ່າຍຄືນໃຫ້ນາງແຕ່ງຄໍາຜູ້ເປັນແມ່ຫວຍພຽງແຕ່ 148.700ບາດ ຍັງຄ້າງຢູ່ 91.300ບາດ ທີ່ນາງເພັດວິໄລບໍ່ໄດ້ຈ່າຍໃຫ້ແມ່ຫວຍ, ດັ່ງນັ້ນ ຈຶ່ງເຮັດໃຫ້ນາງແຕ່ງຄໍາບໍ່ພໍໃຈ ແລະໄດ້ມີການຮ້ອງຟ້ອງນາງເພັດວິໄລ ໄປຍັງສານປະຊາຊົນເຂດ 1 ແຂວງຄໍາມ່ວນ ຈຶ່ງໄດ້ຕັດສິນໃຫ້ນາງເພັດວິໄລ ໃຊ້ແທນເງິນຈໍານວນດັ່ງກ່າວ ຄືນໃຫ້ນາງແຕ່ງຄໍາຕາມຄໍາຕັດສິນຂອງສານ

ມາຮອດວັນທີ 28 ຕຸລາ 2019  ນາງແຕ່ງຄໍາໄດ້ເກີດມີຄວາມໂກດແຄ້ນຕໍ່ນາງເພັດວິໄລ ຈຶ່ງໄດ້ຂຽນຂໍ້ຄວາມປ້ອຍດ່າ, ໃສ່ຮ້າຍປ້າຍສີພ້ອມທັງປະກອບຮູບພາບຂອງນາງເພັດວິໄລລົງເຟສບຸກຂອງຜູ້ກ່ຽວ ເພື່ອໃຫ້ສັງຄົມຮັບຮູ້, ເມື່ອນາງເພັດວິໄລພົບເຫັນ ຈຶ່ງໄດ້ມາແຈ້ງຄວາມຕໍ່ເຈົ້າໜ້າທີ່ກອງບັນຊາການ ປກສ ແຂວງຄໍາມ່ວນ ໃນວັນທີ 1 ພະຈິກ 2019, ດັ່ງນັ້ນ ເຈົ້!ໜ້າທີ່ຈຶ່ງໄດ້ເຊີນເອົາຕົວນາງແຕ່ງຄໍາມາສຶກສາອົບຮົມ, ກ່າວເຕືອນ ແລະ ສ້າງບົດບັນທຶກເພື່ອເປັນຫຼັກຖານ ພ້ອມທັງເສຍຄ່າປົວແປງຈິດໃຈ ຈໍານວນ 9ລ້ານກີບໃຫ້ນາງເພັດວິໄລ.

ສຸດທ້າຍ ນາງແຕ່ງຄໍາໄດ້ຍອມຮັບສາລະພາບວ່າຕົນເອງເຮັດຜິດແທ້ ແລະ ຂໍອາໄພທີ່ເຮັດໃຫ້ນາງເພັດວິໄລເສື່ອມເສຍ ພ້ອມທັງປະຕິຍານຕົນເອງວ່າຈະບໍ່ກະທໍາຜິດອີກໃນຄັ້ງຕໍ່ໄປ.

ທີ່ມາ: ໜັງສືພິມຄວາມສະຫງົບ