ຕົວເລກໜ້າເສົ້າ! ທົ່ວໂລກມີຜູ້ຕິດເຊື້ອໂຄວິດ-19 ສູງເຖິງ 4 ລ້ານຄົນ ພ້ອມເສຍຊີວິດແລ້ວເກືອບ 3ແສນຄົນ

ຕົວເລກໜ້າເສົ້າ! ທົ່ວໂລກມີຜູ້ຕິດເຊື້ອໂຄວິດ-19 ສູງເຖິງ 4 ລ້ານຄົນ ພ້ອມເສຍຊີວິດແລ້ວເກືອບ 3ແສນຄົນ

10th May 2020 0 By Education

ອັບເດດຍອດຜູ້ຕິດເຊື້ອໂຄວິດ-19 ໃນທົ່ວໂລກ, ຫຼ້າສຸດ ພຸ່ງຂື້ນສູງເຖິງ 4ລ້ານຄົນແລ້ວ, ຂະນະດຽວກັນ ເສຍຊີວິດເກືອບ 3ແສນຄົນ ແລະ ສະຫະລັດອາເມລິກາຍັງຄອງອັນດັບໜຶ່ງທີ່ມີການລະບາດຮ້າຍແຮງທີ່ສຸດ.

ສື່ໄທລາຍງານໃຫ້ຮູ້ວ່າ: ມື້ນີ້ ວັນທີ 10 ພຶດສະພາ 2020 ມະຫາວິທະຍາໄລຈອນສ໌ ຮອບກິນສ໌ ໃນສະຫະລັດ ເປີດເຜີຍຂໍ້ມູນຕົວເລກຜູ້ຕິດເຊື້ອ ແລະ ເສຍຊີວິດຈາກການລະບາດຂອງໄວຣັດໂຄວິດ-19 ຫຼ້າສຸດ ມີຜູ້ຕິດເຊື້ອທົ່ວໂລກພຸ່ງສູງເຖິງຫຼາຍກວ່າ 4ລ້ານຄົນແລ້ວ ເຊິ່ງເຊົ້າມື້ນີ້ ຢູ່ທີ່ 4.008.497 ຄົນ, ສ່ວນຜູ້ເສຍຊີວິດກໍ່ເພີ່ມຂຶ້ນເປັນ 278.135 ຄົນ.

ໂດຍສະຫະລັດຍັງຄົງເປັນປະເທດທີ່ມີການລະບາດຮ້າຍແຮງທີ່ສຸດ ຄິດເປັນ 1/4 ຂອງຜູ້ຕິດເຊື້ອ ແລະ 1/3 ຂອງຜູ້ເສຍຊີວິດໃນທົ່ວໂລກ ແຕ່ບັນດາຜູ້ຊ່ຽວຊານເຕືອນວ່າ ຈໍານວນທີ່ແທ້ຈິງຂອງຜູ້ຕິດເຊື້ອໜ້າຈະສູງກວ່ານີ້ຫຼາຍ ເນື່ອງຈາກໃນຫຼາຍປະເທດຍັງມີການກວດຫາເຊື້ອໃນອັດຕາທີ່ຕໍ່າຫຼາຍ ເຊິ່ງເຮັດໃຫ້ຂໍ້ມູນບໍ່ກົງກັບຄວາມຈິງ.

ສ່ວນຕົວເລກຜູ້ເສຍຊີວິດລາຍວັນຍັງຄົງຫຼຸດລົງຢ່າງຕໍ່ເນື່ອງໃນຫຼາຍປະເທດ ເຊິ່ງລວມທັງສະເປນ ແຕ່ຍັງມີຄວາມວິຕົກກັງວົນວ່າການຜ່ອນຄາຍມາດຕະການລັອກດາວອາດນໍາໄປສູ່ການລະບາດຮອບ 2ໄດ້ ໃນຂະນະທີ່ຫຼາຍປະເທດກໍາລັງກຽມຄວາມພ້ອມສໍາລັບການແກ້ບັນຫາເສດຖະກິດຕົກຕໍ່າຢ່າງຮຸນແຮງຈາກການລະບາດຂອງໄວຮັດທີ່ສົ່ງຜົນກະທົບຕໍ່ຕະຫຼາດ ແລະ ຫ່ວງໂສ້ອຸປະທານທົ່ວໂລກ.

ທີ່ມາ: https://www.tnnthailand.com/