ຄວາມຈິງເປັນແນວໃດ? ສາວໂພສລະບາຍ ຂໍຄວາມຊ່ວຍເຫຼືອຈາກກູ້ໄພ ແຕ່ຫຼັງແລ້ວວຽກ ຂໍເງິນຫຼັກລ້ານ

ຄວາມຈິງເປັນແນວໃດ? ສາວໂພສລະບາຍ ຂໍຄວາມຊ່ວຍເຫຼືອຈາກກູ້ໄພ ແຕ່ຫຼັງແລ້ວວຽກ ຂໍເງິນຫຼັກລ້ານ

12th May 2020 0 By Education

ກາຍມາເປັນກະແສໃຫ້ສັງຄົມວິພາກວິຈານໄປຕ່າງໆນາໆ ເມື່ອມີສາວໃຊ້ສື່ສັງຄົມອອນລາຍ ອອກມາໂພສຂໍ້ຄວາມກ່ຽວກັບກໍລະນີການຂໍຄວາມຊ່ວຍເຫຼືອຂົນຍ້າຍສົບຜູ້ເສຍຊີວິດ ຈາກໜ່ວຍກູ້ໄພແຫ່ງໜຶ່ງ ແຕ່ເມື່ອແລ້ວວຽກ ກັບຖືກເອີ້ນຄ່າໄປເອົາສົບຈໍານວນ 2,5ລ້ານກີບ, ນອກຈາກນີ້ ຍັງມີຄົນມາຖາມຂາຍໂລງສົບໃນລາຄາແພງໃຫ້ອີກ. ແຕ່ຄວາມຈິງແທ້ເປັນແນວໃດນັ້ນ ຍັງບໍ່ມີໃຜສາມາດຕອບໄດ້.

ໂດຍສາວຜູ້ໃຊ້ເຟສບຸກຊື່ Akongvilai Sisomphou ໂພສຂໍ້ຄວາມລະບຸວ່າ: ລະບາຍສູ່ກັນຟັງ ເລັກນ້ອຍເນາະ ກ່ຽວກັບ ກູ້ໄພ162x ທີ່ມາຊ່ວຍເຫລືອມື້ເຊົ້ານີ້, ຂ້າງບ້ານມາຂໍຄວາມຊ່ວຍເຫລືອ ວ່າລູກຊາຍເພີ່ນເສຍຊີວິດ, ຢາກຫາໃຫ້ກູ້ໄພ ຊ່ວຍໄປເອົາສົບກັບມາໃຫ້ແນ່, ທາງເເມ່ເຮົາກະໂທຫາກູ້ໄພ162…. (ຂໍສະຫງວນສິດ) ແຕ່ທາງກູ້ໄພເພີ່ນຮັບແລ້ວ ເອົາເບີ 020 78xx1623 ໃຫ້ ວ່າເເມ່ນເບີຫົວຫນ້າ, ເຊິ່ງເບີນີ້ກໍໄດ້ໄປເອົາສົບມາໃຫ້ ແລ້ວຮຽກຄ່າໄປເອົາ 2.500.000 ກີບ.

ໂດຍຄົນຂ້າງບ້ານກໍ່ດ້ວຍຄວາມບໍ່ຮູ້ ກະຈົກໃຫ້ ເພີ່ນກະຄິດວ່າເປັນຄ່າບໍລິການ ຂອງກູ້ໄພ ແລ້ວທາງທີມທີ່ເພີ່ນເອົາສົບມາ (ບໍ່ຢາກລະບຸວ່າເປັນກູ້ໄພ) ກໍ່ຖາມຂາຍໂລງ ທີ່ມີລາຄາແພງ ແຕ່ທາງແມ່ເພີ່ນບໍ່ຊື້, ເຊີ່ງພໍຮອດຕອນແລງມາແມເພີ່ນກໍ່ເລົ່າໃຫ້ຟັງ ເຮົາກະຕົກໃຈ ເພາະ ເຮົາກໍຮູ້ຈັກອ້າຍ ຮັກຜູ້1 ທີ່ເຮັດກູ້ໄພຄືກັນ ເລີຍໂທໄປປືກສາເພີ່ນ ເພີ່ນກະຮັບຮູ້ແລ້ວ ກໍຈະແກ້ໄຂບັນຫາໃຫ້, ໂດຍທາງເຮົາທີ່ໂພສບໍ່ໄດ້ຢາກໄດ້ເງີນຄືນແຕ່ຢາກໃຫ້ເປັນບົດຮຽນແກ່ທຸກຄົນ, ກໍ່ຂອບໃຈທີ່ເພີ່ນຊ່ວຍ ແຕ່ເທື່ອຫນ້າກໍຢາກໃຫ້ແຈ້ງແນ່ວ່າມີຄ່າໃຊ້ຈ່າຍ ອີ່ຕົນຄົນບໍ່ມີ ຂໍໃຫ້ກູ້ໄພຊ່ວຍ ພັດຊໍ້າຊວຍກວ່າເກົ່າ.

ພາບປະກອບຂ່າວເທົ່ານັ້ນ

ເຖິງຢ່າງໃດກໍ່ຕາມ ປັດຕຸບັນຍັງບໍ່ມີພາກສ່ວນໃດມາໃຫ້ຄວາມກະຈ່າງແຈ້ງກ່ຽວກັບກໍລະນີດັ່ງກ່າວ, ດັ່ງນັ້ນ ວອນໃຫ້ພາກສ່ວນກ່ຽວຂ້ອງອອກມາຊີ້ແຈງ ໄຂຂໍ້ຂ້ອງໃຈໃຫ້ກັບສັງຄົມດ້ວຍ.