ເອົາຕະຫຼອດແທ້! ອຸຕຸແຈ້ງ ພົບສັນຍານແຜ່ນດິນໄຫວຢູ່ເຂດບ້ານນາຕຸງ ເມືອງພຽງ ແຂວງໄຊຍະບູລີ

ເອົາຕະຫຼອດແທ້! ອຸຕຸແຈ້ງ ພົບສັນຍານແຜ່ນດິນໄຫວຢູ່ເຂດບ້ານນາຕຸງ ເມືອງພຽງ ແຂວງໄຊຍະບູລີ

14th May 2020 0 By Education

ໄລຍະນີ້ ເລີ່ມກັບມາໄດ້ຍິນຂ່າວແຜ່ນດິນໄຫວໃນລາວອີກແລ້ວ ຈາກກ່ອນໜ້ານີ້ຊ່ວງຕົ້ນເດືອນພຶດສະພາ ພົບສັນຍານການເກີດເຫດແຜ່ນດິນໄຫວຢູ່ເມືອງວັງວຽງ, ແຕ່ຫຼ້າສຸດ ວັນທີ 13 ພຶດສະພາ 2020 ພົບສັນຍານການເກີດແຜ່ນດິນໄຫວຢູ່ເຂດບ້ານນາຕຸງ ເມືອງພຽງ ແຂວງໂຊຍະບູລີ ດ້ວຍຄວາມແຮງ 3.4 ຣິກເຕີ.

ກົມອຸຕຸນິຍົມ ແລະ ອຸທົກກະສາດລາຍງານໃຫ້ຮູ້ວ່າ: ລາຍງານ ສະພາບ ແຜ່ນດິນໄຫວ ໃນວັນທີ 13 ພຶດສະພາ 2020 ໄດ້ພົບສັນຍານການເກີດແຜ່ນດິນໄຫວ ພາຍໃນປະເທດ ລາວ ຈໍານວນ 1 ຄັ້ງ ບໍລິເວນເຂດ ບ້ານ ນາຕຸງ, ເມືອງ ພຽງ, ແຂວງ ໄຊຍະບູລີ ສະພາບຂອງແຜ່ນດິນໄຫວທີ່ມີຂະໜາດນ້ອຍ ໃນເວລາ 18:13:34 ຂອງໂມງ ທ້ອງຖິ່ນ ຈຸດສູນກາງ ເສັ້ນຂະໜານທີ່ 18°50’38” ອົງສາ ເໜືອ ແລະ ເສັ້ນແວ່ງທີ່ 101°45’07” ຕາເວັນອອກ ຄວາມແຮງສັ່ນສະເທືອນແທກໄດ້ 3.4 ຮິກເຕີ່, ມີຄວາມເລີກຈາກໜ້າດິນ 5 Km; ສ່ວນຜົນກະທົບຈາກເຫດການແຜ່ນດີນໄຫວ ໃນເບື້ອງຕົ້ນ ແມ່ນບໍ່ມີຜົນເສຍຫາຍ.

ພ້ອມນີ້ ກໍ່ໄດ້ລາຍງານສະພາບອາກາດປະຈໍາວັນທີ 14 ພຶດສະພາ 2020 ໄວ້ວ່າ ຄວາມກົດດັນຕໍ່າຂອງອາກາດຮ້ອນທີ່ມີກໍາລັງປານກາງຍັງສືບຕໍ່ປົກຄຸມຢູ່ທົ່ວທຸກຂອງປະເທດລາວ,ສົມທົບກັບກະແສລົມຕາຕົກ – ຕາເວັນຕົກສ່ຽງໃຕ້ພັດປົກຄຸມ, ຊຶ່ງຍັງຈະເຮັດ ໃຫ້ອາກາດຮ້ອນ ຫາ ຮ້ອນເອົ້າໃນຕອນກາງເວັນ ແລະ ຈະມີຝົນຕົກຟ້າ ຮ້ອງຟ້າເຫຼື້ອມ ໃນລະດັບຄ່ອຍ ແລະ ຕົກປານກາງ ພ້ອມມີລົມພັດແຮງຢູ່ບາງທ້ອງຖີ່ນ ແຂວງພາກ ເໜືອດ້ານຕາເວັນອອກ ລົງຫາ ພາກກາງ ແລະ ພາກໃຕ້.