ສ່ອງເບິ່ງ! ຜູ້ທີ່ສາມາດເດີນທາງເຂົ້າ-ອອກ ສປປ ລາວ ໄດ້ໃນໄລຍະນີ້ ນັກສຶກສາລາວຮຽນຢູ່ຕ່າງປະເທດຄືໜຶ່ງໃນນັ້ນ

ສ່ອງເບິ່ງ! ຜູ້ທີ່ສາມາດເດີນທາງເຂົ້າ-ອອກ ສປປ ລາວ ໄດ້ໃນໄລຍະນີ້ ນັກສຶກສາລາວຮຽນຢູ່ຕ່າງປະເທດຄືໜຶ່ງໃນນັ້ນ

15th May 2020 0 By Education

ເຖິງແມ່ນວ່າປັດຈຸບັນ ສປປ ລາວ ເຮົາຈະມີຂ່າວດີຕໍ່ເນື່ອງສໍາລັບການບໍ່ພົບຜູ້ຕິດເຊື້ອໂຄວິດ-19 ເປັນເວລາ 1ເດືອນກວ່າ ເຊິ່ງຖືເປັນສັນຍານເຕືອນທີ່ດີທີ່ລາວເຮົາຈະເອົາຊະນະພະຍາດຮ້າຍນີ້ໄດ້. ແຕ່ລັດຖະບານກໍ່ບໍ່ໄດ້ລະເຫຼີງໃຈ ຍັງຕຸມເຂັ້ມໃຫ້ປະຊາຊົນສືບຕໍ່ປະຕິບັດບາງມາດຕະການໃນຄໍາສັ່ງ 06/ນຍ ແຕ່ກໍ່ມີການຜ່ອນຜັນບາງມາດຕະການລົງແລ້ວ, ເຊິ່ງແອັດມິນໄດ້ນໍາສະເໜີໄປກ່ອນແລ້ວຫຼາຍຫົວຂໍ້ ສາມາດຕິດຕາມອ່ານຄືນໄດ້.

ແນວໃດກໍ່ຕາມ ໃນມາດຕະການເຂັ້ມງວດທີ່ໃຫ້ສືບຕໍ່ປະຕິບັດນັ້ນ ເປັນຕົ້ນແມ່ນການສືບຕໍ່ປິດຮ້ານບັນເທີງ, ຕະຫຼາດກາງຄືນ, ສືບຕໍ່ປິດດ່ານ ແລະ ໂຈະການອອກວີຊາໃຫ້ບຸກຄົນທົ່ວໄປ ແຕ່ໃນນັ້ນກໍ່ລະບຸ ແລະ ກໍານົດຜູ້ທີ່ມີສິດເດີນທາງເຂົ້າ-ອອກ ສປປ ລາວ ໄວ້ໃນແຈ້ງການສະບັບເລກທີ 580/ຫສນຍ, ລົງວັນທີ 15 ພຶດສະພາ 2020 ວ່າ: ໃຫ້ສືບຕໍ່ປິດ່ດ່ານປະເພນີ, ດ່ານທ້ອງຖິ່ນ ແລະ ດ່ານສາກົນ ສໍາລັບການເຂົ້າ-ອອກ ຂອງບຸກຄົນທົ່ວໄປ ເວັ້ນເສຍແຕ່ລົດຂົນສົ່ງສິນຄ້າ ຜູ້ທີ່ໄດ້ກໍານົດໄວ້ໃນຂໍ້ທີ 4.9 ຂອງແຈ້ງການສະບັບນີ້ ແລະ ຜູ້ທີ່ໄດ້ຮັບອະນະຍາດຈາກຄະນະສະເພາະກິດ.

ພ້ອມນີ້ກໍ່ໃຫ້ສືບຕໍ່ໂຈະການອອກວີຊາທຸກປະເພດ ໃຫ້ບຸກຄົນທົ່ວໄປ ທີ່ເດີນທາງມາຈາກ ຫຼື ຜ່ານປະເທດ ທີ່ຍັງມີການລະບາດ ຂອງພະຍາດໂຄວິດ-19, ຍົກເວັ້ນແຕ່ ສໍາລັບນັກການທູດ, ຊ່ຽວຊານ, ວິຊາການ ແລະ ແຮງງານຕ່າງປະເທດ ທີ່ມີຄວາມຈຳເປັນ ແລະ ຮີບດ່ວນ ເຂົ້າມາປະຕິບັດວຽກງານ ຢູ່ສະຖານທູດ, ບັນດາກິດຈະການ ແລະ ໂຄງການຕ່າງໆ ທີ່ມີຄວາມສຳຄັນ ແລະ ຈຳເປັນ, ແຕ່ຕ້ອງປະຕິບັດມາດຕະການຕ່າງໆ ຕາມຄຳແນະນຳ ຂອງຄະນະສະເພາະກິດ. ສຳລັບຂັ້ນຕອນ ໃນການປະຕິບັດຕົວຈິງ ກະຊວງການຕ່າງປະເທດ ຈະອອກຄຳແນະນຳຕ່າງຫາກ.

ທັງນີ້ສໍາລັບ ຜູ້ທີ່ກໍານົດໄວ້ໃນຂໍ້ 4.9 ໃນແຈ້ງການສະບັບດັ່ງກ່າວແມ່ນ ອະນຸຍາດໃຫ້ຊາວຕ່າງປະເທດ ທີ່ໄດ້ມາເຮັດວຽກ, ອອກແຮງງານ ແລະ ສຶກສາຢູ່ ສປປ ລາວ ກັບຄືນປະເທດຂອງຕົນຕາມຈຸດປະສົງ, ສໍາລັບນັກສຶກສາລາວ ແລະ ແຮງງານລາວ ທີ່ຕ້ອງການກັບຄືນໄປຮຽນ ຫຼື ອອກແຮງງານ ຢູ່ຕ່າງປະເທດແມ່ນສາມາດເດີນທາງໄປໄດ້ ແຕ່ຕ້ອງໄດ້ປະຕິບັດຕາມລະບຽບການ ຂອງປະເທດທີ່ຈະເດີນທາງໄປນັ້ນ.