ໃຜປະສົງຢາກເດີນທາງໄປຕ່າງປະເທດຕອນນີ້ ໄປໄດ້ແຕ່ໃຫ້ປະຕິບັດເງື່ອນໄຂຕາມນີ້

ໃຜປະສົງຢາກເດີນທາງໄປຕ່າງປະເທດຕອນນີ້ ໄປໄດ້ແຕ່ໃຫ້ປະຕິບັດເງື່ອນໄຂຕາມນີ້

17th May 2020 0 By Education

ທຸກວັນນິ້ບ້ານເຮົາຍັງປະຕິບັດການກວດກາຄົນເຂົ້າ-ອອກເມືອງຢ່າງເຄັ່ງຄັດ ແລະບໍ່ອະນຸຍາດໃຫ້ຄົນທົ່ວໄປສາມາດໄປມາຕາມໃຈເທື່ອ ປະເທດອື່ນກໍ່ເຊັ່ນດຽວກັນ ຕາບໃດທີ່ພະຍາດໂຄວິດ-19 ຍັງລະບາດຢູ່ ບ້ານເຂົາກໍ່ບໍ່ຢາກຮັບເອົາຄົນນອກເຂົ້າເວັ້ນແຕ່ກໍລະນີຈຳເປັນ, ດັ່ງນັ້ນ ຖ້າພົນລະເມືອງຊາວຕ່າງປະເທດທີ່ມາຢູ່ລາວຢາກກັບຄືນປະເທດ ຫຼື ແມ່ນແຕ່ຄົນລາວຢາກເດີນທາງໄປບ້ານເຂົາກໍ່ຕ້ອງໄດ້ແຈ້ງສະຖານເອກອັກຄະລັດຖະທູດ ຜູ້ຕາງໜ້າລັດຖະບານຂອງປະເທດນັ້ນໆຢູ່ປະເທດເຮົາກ່ອນວ່າເພິ່ນອະນຸຍາດໃຫ້ໄປບໍ?


ໄປແບບນີ້ບໍ່ໄດ້ອີກແລ້ວ ຮັກສາໄລຍະຫ່າງໄວ້

ອີງຕາມຄຳແນະນຳ ສະບັບເລກທີ 00001380/ກປທ.ສນກ ລົງວັນທີ 15 ພຶດສະພາ ສໍາລັບການເດີນທາງເຂົ້າ-ອອກ ສປປ ລາວ ໃນໄລຍະດໍາເນີນມາດຕະການປ້ອງກັນ, ຄວບຄຸມແລະ ແກ້ໄຂການລະບາດຂອງພະຍາດໂຄວິດ-19 ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ 19 ຂອງກະຊວງການຕ່າງປະເທດ ຂໍຖືເປັນກຽດແຈ້ງມາຍັງທ່ານຊາບວ່າ: ເນື່ອງຈາກວ່າ ລັດຖະບານລາວ ຍັງສືບຕໍ່ປິດດ່ານຊາຍ ແດນທາງບົກ ແລະ ທາງອາກາດໃນຂອບເຂດທົ່ວປະເທດ ເພື່ອປ້ອງກັນ ແລະ ສະກັດກັ້ນການລະບາດທີ່ຮ້າຍແຮງ ຢູ່ ສປປ ລາວ ຂອງພະຍາດ ໂຄວິດ-19, ບຸກຄົນ ຫຼື ນິຕິບຸກຄົນໃດ ທີ່ມີຈຸດປະສົງຈະເດີນທາງເຂົ້າ-ອອກ ສປປ ລາວ ຈະຕ້ອງໄດ້ປະຕິບັດຕາມຂັ້ນຕອນ ແລະ ມາດຕະການ ດັ່ງລຸ່ມນີ້:

ສຳລັບຂາອອກ ພົນລະເມືອງຕ່າງປະເທດທີ່ມີສະຖານເອກອັກຄະລັດຖະທູດປະຈໍາ ສປປ ລາວ ຕ້ອງໄປລົງທະບຽນຢູ່ ສະຖານເອກອັກຄະລັດຖະທູດດັ່ງກ່າວເພື່ອແຈ້ງຈຸດປະສົງການຂໍເດີນທາງອອກ ສປປ ລາວ ແລະ ຕ້ອງໄດ້ປະຕິບັດຕາມລະບຽບການທີ່ກ່ຽວຂ້ອງ ຂອງປະເທດທີ່ຈະເດີນທາງເຂົ້າ; ສະຖານເອກອັກຄະລັດຖະທູດທີ່ກ່ຽວຂ້ອງຕ້ອງເຮັດຫນັງສືສະເຫນີມາຍັງກະຊວງການຕ່າງປະເທດ ພ້ອມບັນຊີລາຍຊື່, ເລກທີຫນັງສືຜ່ານແດນ, ວັນເວລາ, ດ່ານທີ່ຈະເດີນທາງອອກ, ພາຫະນະໃນການເດີນທາງ ແລະ ລາຍລະອຽດອື່ນໆ ເພື່ອພິຈາລະນາອໍານວຍຄວາມສະດວກ.

ສໍາລັບ ພົນລະເມືອງລາວ ທີ່ມີຄວາມຈໍາເປັນເດີນທາງໄປຕ່າງປະເທດ ສາມາດເດີນທາງໄປໄດ້ ຖ້າໄດ້ຮັບອະນຸຍາດຈາກປະເທດເຈົ້າພາບ ແຕ່ຕ້ອງປະຕິບັດຕາມກົດຫມາຍ ແລະ ລະບຽບການຂອງປະເທດດັ່ງກ່າວ. ຄໍາແນະນໍາສະບັບນີ້ ໃຊ້ປ່ຽນແທນຄໍາແນະນໍາສະບັບເລກທີ 1342 /ຕປທ.ສພ ລົງວັນທີ 07 ພຶດສະພາ 2020 ແລະ ມີຜົນສັກສິດນັບແຕ່ມື້ລົງລາຍເຊັນ(15 ພຶດສະພາ ເຖິງວັນທີ 01 ມີຖຸນາ 2020).