ຖວທ ແຈ້ງ ອະນຸຍາດໃຫ້ເປີດສະຖານທີ່ທ່ອງທ່ຽວ ແລະ ກິດຈະການບໍລິການອື່ນໆໄດ້ແລ້ວ

ຖວທ ແຈ້ງ ອະນຸຍາດໃຫ້ເປີດສະຖານທີ່ທ່ອງທ່ຽວ ແລະ ກິດຈະການບໍລິການອື່ນໆໄດ້ແລ້ວ

17th May 2020 0 By Education

ຖືວ່າເປັນຂ່າວດີໃຫ້ກັບບັນດາຜູ້ປະກອບການຂະແໜງການທ່ອງທ່ຽວ ແລະ ບໍລິການເປັນຢ່າງຍິ່ງ ເມື່ອລັດຖະບານໄດ້ອະນຸຍາດໃຫ້ກັບມາເປີດບໍລິການໄດ້ອີກຄັ້ງ ຫຼັງສະພາບການລະບາດຂອງພະຍາດໂຄວິດ-19 ພາຍໃນ ສປປ ລາສວ ເຮົາເລີ່ມເບົາບາງລົງ ແຕ່ກໍ່ຕ້ອງຮັບປະກັນໄດ້ການຈັດຕັ້ງມາດຕະການຕ່າງໆທີ່ຂັ້ນເທິງວາງອອກຢ່າງເຂັ້ມງວດ ໂດຍສະເພາະໃນໄລຍະນີ້ ເຊິ່ງເປັນໄລຍະການຈັດຕັ້ງບາງມາດຕະການຜ່ອນຜັນ ຊ່ວງວັນທີ 18 ພຶດສະພາ ຫາ 1 ມິຖຸນາເທົ່ານັ້ນ.

ອີງຕາມແຈ້ງການ ຂອງກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ເລື່ອງສືບຕໍ່ປະຕິບັດບັນດາມາດຕະການ ໃນການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວດ-19 ໃນໄລຍະແຕ່ວັນທີ 18 ພຶດສະພາ ຫາວັນທີ 1 ມີຖຸນາ 2020 ສະບັບເລກທີ 166/ຖວທ, ລົງວັນທີ 16 ພຶດສະພາ 2020, ເຊິ່ງໃນແຈ້ງການດັ່ງກ່າວລະບຸໄວ້ລະອຽດເຖິງມາດຕະການຕ່າງໆ ແຕ່ແອັດມິນຈະຍົກຂື້ນມານໍາສະເໜີພຽງບາງຂໍ້ເທົ່ານັ້ນ.

ໂດຍສະເພາະແມ່ນ ຂໍ້ທີ 5 ການອະນຸຍາດໃຫ້ສະຖານທີ່ທ່ອງທ່ຽວ, ໂຮງແຮມ, ຣີສອດ, ເຮືອນພັກ, ຮ້ານອາຫານ, ຮ້ານກາເຟ, ຮ້ານຕັດຜົມ, ຮ້ານເສີມສວຍ, ຮ້ານນວດ ແລະ ຮ້ານສະປາທຸກປະເພດ ເປີດບໍລິການ ແຕ່ຕ້ອງປະຕິບັດຕາມຄໍາແນະນໍາຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19  ວາງອອກຢ່າງເຂັ້ມງວດ.

ທັງນີ້, ສໍາລັບມາດຕະການ ຫຼື ຄໍາແນະນໍາຕ່າງໆ ທີ່ບັນດາຜູ້ປະກອບການຈະຕ້ອງຈັດຕັ້ງປະຕິບັດຕາມນັ້ນ ສາມາດອ່ານລາຍລະອຽດຕາມແຈ້ງການທີ່ແອັດມິນຕິດຂັດໄວ້ໃນນີ້ໄດ້.