ອັບເດດຫຼ້າສຸດ! ເງື່ອນໄຂການເດີນທາງເຂົ້າ-ອອກປະເທດ ຂອງພົນລະເມືອງລາວ ຫຼັງເລີ່ມເຂົ້າສູ່ການຜ່ອນຜັນໄລຍະ 3

ອັບເດດຫຼ້າສຸດ! ເງື່ອນໄຂການເດີນທາງເຂົ້າ-ອອກປະເທດ ຂອງພົນລະເມືອງລາວ ຫຼັງເລີ່ມເຂົ້າສູ່ການຜ່ອນຜັນໄລຍະ 3

2nd June 2020 0 By Education

ເນື່ອງຈາກສະພາບການລະບາດຂອງພະຍາດໂຄວິດ-19 ໃນປະເທດເຮົາເລີ່ມຜ່ອນຄາຍລົງ ໂດຍບໍ່ພົບຜູ້ຕິດເຊື້ອໃໝ່ຕິດຕໍ່ກັນເປັນເວລາເກືອບ 2 ເດືອນແລ້ວ, ດັ່ງນັ້ນ ລັດຖະບານຈຶ່ງໄດ້ມີການຜ່ອນຜັນບັນດາມາດຕະການລົງເລື້ອຍໆ, ຫຼ້າສຸດ ກະຊວງການຕ່າງປະເທດ ອອກຄໍາແນະນໍາ ສໍາລັບການເດີນທາງເຂົ້າ-ອອກ ສປປ ລາວ ໃນໄລຍະການດໍາເນີນມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ອີກຄັ້ງ ຫຼັງລັດຖະບານປະກາດຜ່ອນຜັນມາດຕະການຕ່າງໆ ເປັນໄລຍະທີ 3 ແລ້ວ.

ອີງຕາມຄໍາແນະນໍາ ຂອງກະຊວງການຕ່າງປະເທດ ສະບັບເລກທີ 00001444/ຕປທ.ສພກ, ລົງວັນທີ 1 ມິຖຸນາ 2020 ເຊິ່ງໃນຄໍາແນະນໍາດັ່ງກ່າວປະກອບໄປດ້ວຍຫຼາຍຂໍ້ກໍານົດສໍາລັບການເດີນທາງເຂົ້າ-ອອກ ສປປ ລາວ ແຕ່ແອັດມິນຈະຍົກຂຶ້ນມາຂຽນໃຫ້ແຟນເພຈໄດ້ສຶກສານໍາບາງຂໍ້ເທົ່ານັ້ນ ໂດຍສະເພາະແມ່ນ ພົນລະເມືອງລາວທີ່ຕ້ອງການເດີນທາງກັບເຂົ້າປະເທດ.

ສໍາລັບພົນລະເມືອງລາວ ທີ່ມີຈຸດປະສົງຢາກເດີນທາງເຂົ້າ ສປປ ລາວ ໃຫ້ລົງທະບຽນຢູ່ສະຖານເອກອັກຄະລັດຖະທູດ ຫຼື ສະຖານກົງສູນໃຫຍ່ ແຫ່ງ ສປປ ລາວ ຢູ່ປະເທດທີ່ຕົນອາໄສຢູ່ ໂດຍແຈ້ງຂໍ້ມູນລະອຽດ(ສາເຫດການຕົກຄ້າງ, ວັນ, ເວລາ, ດ່ານທີ່ມີຈຸດປະສົງຈະເດີນທາງເຂົ້າ…) ເພື່ອຄົ້ນຄ້ວາພິຈາລະນາ ຊອກຫາຊ່ອງທາງໃນການອໍານວຍຄວາມສະດວກໃນການເດີນທາງກັບ ສປປ ລາວ.

ແນວໃດກໍ່ຕາມ, ຫຼັງຈາກໄດ້ຮັບສິດເດີນທາງເຂົ້າປະເທດລາວແລ້ວ ກໍ່ຕ້ອງປະຕິບັດຕາມມາດຕະການທີ່ຄະນະສະເພາະກິດວາງອອກທຸກຢ່າງ. ສິ່ງສໍາຄັນ ທຸກໆການສະເໜີເຂົ້າ ສປປ ລາວ ຕ້ອງສົ່ງເຖິງຫົວໜ້າກອງເລຂາຄະນະສະເພາະກິດສູນກາງ ລ່ວງໜ້າຢ່າງໜ້ອຍ 7ວັນ.

ສ່ວນຂາອອກ ສໍາລັບພົນລະເມືອງລາວ ທີ່ມີຄວາມຈໍາເປັນຮີບດ່ວນເດີນທາງໄປຕ່າງປະເທດ ຕ້ອງໄດ້ຮັບອະນຸຍາດຈາກພາກສ່ວນກ່ຽວຂ້ອງ ເພື່ອອໍານວຍຄວາມສະດວກໃນການເດີນທາງ ແຕ່ຕ້ອງປະຕິບັດຕາມກົດໝາຍ ແລະ ລະບຽບການຂອງປະເທດປາຍທາງ.