ອົງການອະນາໄມໂລກ ແຈງຄືນ ການໃສ່ຜ້າປິດປາກດັງ “ຜ້າທໍາມະດາ” ກໍ່ສາມາດປ້ອງກັນໂຄວິດ-19 ໄດ້

ອົງການອະນາໄມໂລກ ແຈງຄືນ ການໃສ່ຜ້າປິດປາກດັງ “ຜ້າທໍາມະດາ” ກໍ່ສາມາດປ້ອງກັນໂຄວິດ-19 ໄດ້

6th June 2020 0 By Education

ອົງການອະນາໄມໂລກອອກມາປ່ຽນຈຸດຢືນຄັ້ງໃຫຍ່ ໜ້າກາກອະນາໄມຜ້າ ສາມາດໃຊ້ປ້ອງກັນເຊື້ອໂຄວິດ-19 ໄດ້.

ມື້ນີ້ ວັນທີ 6 ມິຖຸນາ 2020 ດຣ ມາເຣຍ ຟານ ເຄິດໂຮຟ ຫົວໜ້າຜູ້ຊ່ຽວຊານທາງເທັກນິກໂຄວິດ-19 ຂອງອົງກອນອະນາໄມໂລກ(WHO) ລະບຸວ່າ ໄດ້ອອກຄໍານະນໍາໃໝ່ຫຼ້າສຸດກ່ຽວກັບການໃສ່ໜ້າກາກອະນາໄມ ໂດຍລະບຸວ່າ ທຸກຄົນຄວນຈະໃສ່ໜ້າກາກອະນາໄມເມື່ອຢູ່ໃນທີ່ສາທາລະນະ ເພື່ອຊ່ວຍຢຸດການລະບາດຂອງເຊື້ອໂຄວິດ-19 ໂດຍລະບຸຊັດເຈນວ່າ ໜ້າກາກອະນາໄມທີ່ປະຊາຊົນທົ່ວໄປຄວນໃຊ້ ຄວນເປັນໜ້າກາກຜ້າເຊິ່ງສາມາດເຮັດເອງໄດ້ ແລະບໍ່ແມ່ນໜ້າກາກອະນາໄມທາງການແພດ ຫາກເປັນຜູ້ສູງອາຍຸ ທີ່ມີອາຍຸ 60ປີຂຶ້ນໄປ ແລະ ມີໂລຫປະຈໍາຕົວ ຄວນໃສ່ໜ້າກາກອະນາໄມທາງການແພດ ເພາະຈະປ້ອງກັນການຕິດເຊື້ອໂຄວິດ-19ໄດ້ດີກວ່າໜ້າກາກຜ້າ.

ນັບເປັນການປ່ຽນຈຸດຢືນຄັ້ງໃຫຍ່ຂອງອົງການອະນາໄມໂລກກ່ຽວກັບນ້າກາກອະນາໄມຈາກເດີມທີ່ເຄີຍຢືນຢັນມາຕະຫຼອດຫຼາຍເດືອນທີ່ຜ່ານມາ ນັບຕັ້ງແຕ່ເລີ່ມເກີດການລະບາດຂອງພະຍາດໂຄວິດ-19 ວ່າ ບໍ່ມີຫຼັກຖານທີ່ພຽງພໍທີ່ຈະສະໜັບສະນູນວ່າຜູ້ທີ່ມີສຸຂະພາບແຂງແຮງຄວນໃສ່ໜ້າກາກອະນາໄມ ເນື່ອງຈາກອົງການອະນາໄມໂລກຢ້ານວ່າ ຫາກແນະນໍາໃຫ້ທຸກຄົນໃສ່ໜ້າກາກອະນາໄມ ຈະເຮັດໃຫ້ໜ້າກາກອະນາໄມແບບທີ່ໃຊ້ທາງການແພດເກີດການຂາດແຄນສໍາລັບບຸກຄະລາກອນທາງການແພດ.

ນອກຈາກນີ້ ຍັງອາດເຮັດໃຫ້ຄົນຊະລ່າໃຈຄິດວ່າ ພຽງໃສ່ໜ້າກາກອະນາໄມກໍ່ພຽງພໍແລ້ວ ທີ່ຈະປ້ອງກັນການຕິດເຊື້ອໂຄວິດ-19 ແລະ ອາດຈະລະເລີຍການປະຕິບັດມາດຕະການອື່ນໆເຊັ່ນ social distancing.

ຢ່າງໃດກໍ່ຕາມ ທ່ານໝໍ ເທດຣອສ ອາດານອມ ເກເບຣເຍຊັສ ຜູ້ອໍານວຍການອົງການອະນາໄມໂລກ ຢໍ້າວ່າ: ການໃສ່ໜ້າກາກຜ້າ ເປັນພຽງ ໜຶ່ງໃນວິທີຫຼຸດຄວາມສ່ຽງໃນການຕິດເຊື້ອໂຄວິດ-19 ເທົ່ານັ້ນ ແລະ ອົງການອະນາໄມໂລກຍັງຄົງຢືນຢັນຕາມເດີມວ່າໜ້າກາກອະນາໄມແບບທີ່ໃຊ້ທາງການແພດ ຄວນໃຊ້ກັບຜູ້ປ່ວຍ ແລະ ບຸກຄະລາກອນທາງການແພດເທົ່ານັ້ນ ບໍ່ແມ່ນປະຊາຊົນທົ່ວໄປທີ່ບໍ່ປ່ວຍ.

ສ່ວນສາເຫດຂອງການປ່ຽວຈຸດຢືນຄັ້ງໃຫຍ່ຂອງອົງການອະນາໄມໂລກ ກ່ຽວກັບໜ້າກາກອະນາໄມນີ້ ດຣ ເຄິດໂຮຟ ລະບຸວ່າ: ເປັນເພາະມີຂໍ້ມູນໃໝ່ ຈາກຜົນການສຶກສາຫຼາຍອັນໃນຊ່ວງບໍ່ພຽງເທົ່າໃດອາທິດທີ່ຜ່ານມາ ທີ່ສະແດງວ່າໜ້າກາກຜ້າ ສາມາດປ້ອງກັນການໄດ້ຮັບລະອອງຝອຍນ້ອຍໆ ທີ່ມີເຊື້ອໄວຣັສໂຄວິດ-19 ໄດ້.

ທັງນີ້, ມີຫຼາຍປະເທດໃນທົ່ວໂລກທີ່ໄດ້ມີການແນະນໍາ ຫຼື ເຖິງຂັ້ນບັງຄັບ ໃຫ້ປະຊາຊົນສວມໜ້າກາກອະນາໄມແບບຜ້າ ຫຼື ເຟຊຊິລ(Face Shield) ເພື່ອປິດຄຸມໃບໜ້າ ເມື່ອຢູ່ໃນສາທາລະນະ ຕັ້ງແຕ່ກ່ອນທີ່ອົງການອະນາໄມໂລກຈະອອກຄໍາແນະນໍາໃໝ່ນີ້.