ຈົກ 40ລ້ານກວ່າໂດລາ ກຽມສ້າງຂົວມິດຕະພາບລາວ-ໄທ ແຫ່ງທີ 5

ຈົກ 40ລ້ານກວ່າໂດລາ ກຽມສ້າງຂົວມິດຕະພາບລາວ-ໄທ ແຫ່ງທີ 5

30th June 2020 0 By Education

ເປັນທີ່ກ່າວຂານມາດົນກ່ຽວກັບຂົວມິດຕະພາບລາວ-ໄທແຫ່ງທີ5ຈາກບໍລິຄຳໄຊຫາບຶງການຂອງໄທ ເຊິ່ງສອງຝ່າຍໄດ້ຜ່ານແບບລວມເຖິງເຈລະຈາກັນຫຼາຍຮອບກ່ອນມາຮອດມື້ນີ້ ເຊິ່ງຂ່າວຫຼ້າສຸດແຈ້ງວ່າ ຄາດຈະມີການເຊັນສັນຍາກັບບໍລິສັດຮັບເໝົາພາຍໃນເດືອນສິງຫາທີ່ຈະມາເຖິງນີ້ ຫຼັງຈາກນັ້ນກໍ່ເລີ່ມດຳເນີນການກໍ່ສ້າງໃຫ້ສຳເລັດພາຍໃນ3 ປີ.

ຂົວມິດຕະພາບ ສປປລາວ ແລະ ລາຊະອານາຈັກໄທ ແຫ່ງທີ 05 ລະຫວ່າງ ປາກຊັນ-ບຶງການ ທີ່ວ່ານີ້ຈະມີມູນຄ່າກໍ່ສ້າງທັງໝົດຫຼາຍກວ່າ 40 ລ້ານໂດລາສະຫະລັດ (ໃນນັ້ນປະເທດໄທ 25,7 ລ້ານໂດລາສະຫະລັດ ແລະ ສປປລາວ 15,41 ລ້ານໂດລາສະຫະລັດ), ປັດຈຸບັນທາງລັດຖະບານ ແລະ ຄະນະຮັບຜິດຊອບທັງສອງຝ່າຍ ໄດ້ຕົກລົງເປັນເອກະພາບກັນເອົາຮູບແຄນເປັນສັນຍາລັກຮູບຊົງເສົາກາງນໍ້າ.

ໃນການກໍ່ສ້າງຈະມີຄວາມແຕກຕ່າງຂອງສອງຝາກຝັ່ງດັ່ງນີ້: ວຽກທາງເຊື່ອມຕໍ່ເບື້ອງໄທ 1.340 ລ້ານບາດ, ອາຄານດ່ານ 610 ລ້ານບາດ, ກໍ່ສ້າງຂົວ 680 ລ້ານບາດ ລວມເປັນ 2.630 ລ້ານບາດ ປະມານ 680ຕື້ກີບ; ສ່ວນເບື້ອງລາວ ມູນຄ່າການກໍ່ສ້າງທາງເຊື່ອມຕໍ່ 370 ລ້ານບາດ, ອາຄານດ່ານ 440 ລ້ານບາດ, ມູນຄ່າກໍ່ສ້າງຂົວ 490 ລ້ານບາດ ລວມທັງໝົດ 1.300 ລ້ານບາດ 340 ຕື້ກີບ.

ສຳລັບຮູບຊົງສັນຍາລັກໜ້າອາຄານ ໄດ້ຕົກລົງເປັນເອກະພາບກັນ ເລືອກເອົາ ສັນຍາລັກ ເປັນໂຕເສົາລາ 03 ໂຕ (ໂຕຜູ້, ໂຕແມ່ ແລະ ລູກ) ຢູ່ເທິງແທ່ນ ຫຼື ເດີ່ນຫຍ້າ ຕໍ່ໜ້າອາຄານດ່ານ, ເນື່ອງຈາກວ່າໂຕເສົາລາ ເປັນສັດທີ່ຫາຍາກ ແລະ ມີຖິ່ນອາໄສ ຊຶ່ງພົບເຫັນຢູ່ແຂວງບໍລິຄຳໄຊ ເທົ່ານັ້ນ ໃນ ສປປລາວ ແລະ ຮູບຊົງສັນຍາລັກປະຕູເມືອງ ແມ່ນກຳນົດເອົາຈອມທາດພະບາດໂພນສັນມາໃສ່ເປັນສັນຍາລັກ.

ກ່ຽວກັບການຊົດເຊີຍຜົນກະທົບເນື້ອທີ່ດິນສວນ, ນາ ຂອງພໍ່ແມ່ປະຊາຊົນທີ່ຢູ່ບໍລິເວນສົ້ນຂົວຜ່ານການຄົ້ນຄວ້າມີມູນຄ່າທັງໝົດປະມານ 3,3 ຕື້ກີບ, ມີເນື້ອທີ່ດິນທີ່ໄດ້ຮັບຜົນກະທົບຢູ່ບໍລິເວນສົ້ນຂົວໃນເບື້ອງຕົ້ນສະເພາະແລວທາງ, ແລວຂົວ ແລະ ບໍລິເວນອາຄານດ່ານ ມີປະມານ 78 ເຮັກຕາ, ປັດຈຸບັນທາງຄະນະຮັບຜິດຊອບກຽມທາບທາມລາຄາຫົວໜ່ວຍການຊົດເຊີຍເບື້ອງຕົ້ນໃຫ້ປະຊາຊົນ ເບື້ອງສອງຝາກທາງທີ່ເປັນເຂດຈະກໍ່ສ້າງສາງ ແລະ ອາຄານຕ່າງໆທີ່ເປັນການລົງທຶນຂອງບໍລິສັດເອກະຊົນຕື່ມອີກຈຳນວນ 109 ເຮັກຕາ ເພື່ອມາຄິດໄລ່ລາຄາຫົວໜ່ວຍຊົດເຊີຍແຕ່ລະປະເພດ.

ຈຸດທີ່ຕັ້ງຂອງຂົວ ແມ່ນຕັ້ງຢູ່ເຂດບ້ານກ້ວຍອຸດົມ ຫ່າງຈາກເທດສະບານແຂວງບໍລິຄຳໄຊ ມາທາງທິດເໜືອຕາມທາງເລກ 13 ໃຕ້ປະມານ 10 ກິໂລແມັດ ແລະ ຈາກທາງເລກ 13 ໃຕ້ ເຂົ້າໄປຫານໍ້າຂອງ ປະມານ 2,5 ກິໂລແມັດ.