ຂ່າວດ່ວນ!!! ແຮງງານມຽນມາທີ່ກັບຈາກລາວຫຼັງມາເຮັດວຽກຢູ່ບໍ່ແກ້ວກວດພົບເຊື້ອໂຄວິດ-19

ຂ່າວດ່ວນ!!! ແຮງງານມຽນມາທີ່ກັບຈາກລາວຫຼັງມາເຮັດວຽກຢູ່ບໍ່ແກ້ວກວດພົບເຊື້ອໂຄວິດ-19

10th July 2020 0 By Education

ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຂວງບໍ່ແກ້ວ ແຈ້ງການກ່ຽວກັບການຈັດສົ່ງແຮງງານມຽນມາທີ່ເຂົ້າມາອອກແຮງງານ ຢູ່ເຂດເສດຖະກິດສາມຫຼ່ຽມຄໍາກັບຄືນປະເທດແລ້ວກວດພົບເຊື້ອພະຍາດໂຄວິດ-19 ຢູ່ນະຄອນຢາງກຸ້ງ ສ.ມຽນມາ ຕາມເວັບໄຊກະຊວງສາທາລະນະສຸກ ສ.ມຽນມາ.

ອີງຕາມແຈ້ງການສະບັບເລກທີ 279/ສພກ.ບກ, ລົງວັນທີ 10 ກໍລະກົດ 2020 ຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຂວງບໍ່ແກ້ວ ໃຫ້ຮູ້ວ່າ: ໃນວັນທີ 24 ມິຖຸນາ 2020 ຄະນະຄຸ້ມຄອງເຂດເສດຖະກິດພິເສດສາມຫຼ່ຽມຄໍາ ໄດ້ຈັດສົ່ງແຮງງານມຽນມາທີ່ເຂົ້າມາອອກແຮງງານຢູ່ເຂດເສດຖະກິດພິເສດສາມລ່ຽມຄໍາກັບຄືນປະເທດຈໍານວນ 184 ຄົນ, ຍິງ 66 ຄົນ. ຜ່ານການມອບ-ຮັບຢ່າງເປັນທາງການ ໂດຍຊ້ອງໜ້າເຈົ້າໜ້າທີ່ທັງສອງຝ່າຍ ທີ່ດ່ານສາບ້ານມອມ ເມືອງຕົ້ນເຜິ້ງ ແຂວງບໍ່ແກ້ວ.

ຫຼັງຈາກນັ້ນຝ່າຍມຽນມາກໍ່ໄດ້ນໍາຕົວແຮງງານທັງໝົດ ກັກບໍລິເວນ ຕາມມາດຕະການທາງການມຽນມາກໍານົດ ຢູ່ເມືອງກໍາມະຍຸດ ນະຄອນຢາງກຸ້ງ ສ.ມຽນມາ ຈົນຮອດວັນທີ 4 ກໍລະກົດ 2020 ພະແນກການຕ່າງປະເທດແຂວງບໍ່ແກ້ວ ໄດ້ຮັບຂໍ້ມູນຈາກທາງການມຽນມາວ່າ: ມີແຮງງານທີ່ກັບຈາກເຂດເສດຖະກິດພິເສດສາມຫຼ່ຽມຄໍາ ຕິດເຊື້ອໂຄວິດ-19 ຊື່ ທ້າວ ອຸມິນມິນ ອາຍຸ 43 ປີ ຮ່ວມກັບຜູ້ກັກຕົວຢູ່ສູນດຽວກັນ ທີ່ເດີນທາງມາຈາກຫຼາຍປະເທດຄື: ແຮງງານທີ່ກັບຈາກປະເທດໄທຕິດເຊື້ອຕິດເຊື້ອ 1ຄົນ, ປະເທດສິງກະໂປຕິດເຊື້ອ 1ຄົນ, ປະເທດບັງກາລາເທດ ຕິດເຊື້ອ 3 ຄົນ ແລະ ປະເທດອິນເດຍຕິດເຊື້ອ 1 ຄົນ ແລະ ກັບຈາກປະເທດລາວ 1ຄົນ ລວມທັງໝົດເປັນ 7 ຄົນ.

ຄະນະສະເພາະກິດຂັ້ນແຂວງ ຈຶ່ງໄດ້ສົມທົບກັບຄະນະສະເພາະກິດເມືອງຕົ້ນເຜິ້ງ, ຄະນະຄຸ້ມຄອງເຂດເສດຖະກິດພິເສດ ແລະ ຄະນະສະພາບໍລິຫານເຂດເສດຖະກິດພິເສດສາມຫຼ່ຽມຄໍາລົງສືບສວນ, ເກັບກໍາຂໍ້ມູນ ຈຶ່ງນໍາຕົວແຮງງານຊາວມຽນມາຈໍານວນ 4 ຄົນ ທີ່ເຄີຍໄດ້ອາໄສ, ກິນ ແລະ ນອນ ຢູ່ກັບທ້າວ ອູມິນມິນ ດໍາເນີນການແຍກປ່ຽວ ເພື່ອກັກບໍລິເວນ ຕິດຕາມອາການຢູ່ສູນ ທີ່ເຂດເສດຖະກິດພິເສດສາມຫຼ່ຽມຄໍາໄດ້ກໍານົດ ເຊິ່ງໄກຈາກເຂດຊຸມຊົນ ໄດຍມີເຈົ້າໜ້າທີ່ ລປພ ເວນຍາມທາງເຂົ້າ-ອອກ, ເພາະກັບເຈາະເລືອດວິເຄາະຢູ່ເຂດພິເສດສາມຫຼ່ຽມຄໍາ ຜົນອອກມາເປັນລົບ ແລະ ເພື່ອຄວາມແນ່ນອນ ທີມງານແພດ ກໍ່ໄດ້ໄປກວດອຸນຫະພູມທຸກໆເຊົ້າ-ແລງ ເຫັນວ່າມີອາການເປັນປົກກະຕິ.

ຮອດວັນທີ 7 ກໍລະກົດ 2020 ທາງສູນວິເຄາະນະຄອນຫຼວງວຽງຈັນ ໄດ້ນໍາສົ່ງຜົນກວດກັບຄືນມາແຂວງບໍ່ແກ້ວເຫັນວ່າເປັນຜົນລົບທັງ 4ຕົວຢ່າງ ສະແດງວ່າບໍ່ມີຜູ້ຕິດເຊື້ອພະຍາດໂຄວິດ-19.

ເຖິງຢ່າງໃດກໍ່ຕາມ ມາຮອດປັດຈຸບັນ ແຂວງບໍ່ແກ້ວຍັງບໍ່ທັນມີຜູ້ຕິດເຊື້ອໂຄວິດ-19 ແຕ່ພວກເຮົາກໍ່ຍັງມີຄວາມສ່ຽງສູງ. ສະນັ້ນ, ຈຶ່ງຈໍາເປັນຕ້ອງສືບຕໍ່ປະຕິບັດມາດຕະການຕ່າງໆທີ່ລະບຸໄວ້ໃນແຈ້ງການສະບັບເລກທີ 697/ຫສຮຍ ແລະ ແຈ້ງການແນະນໍາ ສະບັບເລກທີ 545/ຈຂ.ບກ, ລົງວັນທີ 1 ກໍລະກົດ 2020 ຢ່າງເຂັ້ມງວດ.